26 декабря 2019
У Новы год з новай працай уваходзяць адразу два дзясяткі кіраўнікоў. Гэта стала вядома па выніках кадравага чацвярга ў Прэзідэнта. Ратацыя ў рэгіёнах закранула 4 вобласці: Гродзенскую, Віцебскую, Магілёўскую і Гомельскую. Адразу скажам, сёння без гучных сенсацый. Сярод прыкметных фігур новы кіраўнік канцэрна "Белдзяржхарчпрам". Тым не менш прагучалі важныя рэчы для ўсіх.
Арыенцір для новых кадраў Кіраўнік дзяржавы акрэсліў проста - людзі, эканоміка, прафесіяналізм. Асаблівай расшыфроўкі не патрэбна. Трэба вырашаць пытанні жыхароў рэгіёна. Думаць, як дадаць у эканоміцы. І ўсё гэта абапіраючыся на асабісты прафесіяналізм.
Наталля Брэвус пра тых, на каго абапіраецца ўлада.
Кадравы чацвер
Папярэднія выхадныя сталі добрым часам для таго, каб стварыць святочны настрой, упрыгожыць елку. Такое ўжо адчуваецца і ў Палацы Незалежнасці - тут ужо красуецца галоўны навагодні сімвал. Але вось атмасфера сёння была рабочая. Пад Новы год усе імкнуцца завяршыць справы, каб увайсці ў год без хвастоў. А дзясятак рэгіянальных кіраўнікоў у 2020 увойдзе з новай працай.
"Будзе за што падняць бакал у навагоднюю ноч", - жартавалі журналісты аб новых кадрах у кулуарах. Але вось самім кіраўнікам відавочна не да смеху. Бо ў падарунак атрымалі ні многа ні мала - давер Прэзідэнта. Лёгкага жыцця Кіраўнік дзяржавы не абяцаў.
Прэзідэнт: расслабляцца нельга!
Узгадняючы прызначэнні, Прэзідэнт так і сказаў: "Разлічваю на ваш прафесіяналізм". Кадравыя рашэнні закранулі адразу некалькі рэгіёнаў Беларусі. Новыя кіраўнікі райвыканкамаў у Полацку, Верхнядзвінску, Талачыне, Нароўлі, Карэлічах, Ашмянах, Касцюковічах, Крычаве. А таксама ў Гомельскім і Гродзенскім аблвыканкамах і адміністрацыях. Усе гэтыя людзі паспелі папрацаваць на месцах, ведаюць рэгіянальную спецыфіку і запыты людзей. З разуменнем паставіцца да кожнай праблемы просіць Прэзідэнт.
Хутка будзе прынята рашэнне па развіцці Віцебскага рэгіёна
Зусім нядаўна ішла дыскусія, як развіваць АПК паўночнага рэгіёна. Тады Аляксандр Лукашэнка не падтрымаў ідэю стварэння суперхолдынга, а скіраваў на тое, каб развіваць наяўныя інтэграцыйныя структуры. Дакладна вызначыцца з кіраваннем. Галоўнае - ісці ад зямлі.
Прэзідэнт анансуе, што адразу пасля свят вернемся да размовы. Ігар Марковіч, які застаўся ў рэгіёне, ён проста пераедзе з Верхнядзвінска ў Полацк, разумее, што залежыць ад эфектыўнасці АПК.
Зона адказнасці кіраўнікоў райвыканкамаў - першым чынам стратныя прадпрыемствы
Зрэшты, вопыт Віцебскай вобласці будзе запатрабаваны і ў іншых рэгіёнах. Там таксама павінны ўсвядоміць, што ўзяць пад асаблівы кантроль 2-3 праблемныя прадпрыемствы нескладана.
Вось у Касцюковічах, нягледзячы на прыстойны прамысловы сектар, не забываюць і сельскую гаспадарку. У дапамогу - праграма развіцця паўднёва-ўсходніх тэрыторый.
Прэзідэнт: Трэба ісці да людзей і працаваць з людзьмі
Не наракаць на праблемы, а працаваць так, каб іх станавілася ў людзей менш. Прыкладна так можна пазначыць меседж Прэзідэнта для вертыкалі. Людзі не просяць звышнатуральнага - усяго толькі разабрацца з бытавымі праблемамі, часцей за ўсё ў ЖКГ.
У Белдзяржхарчпраме новы кіраўнік
Па выніках кадравага дня ёсць прызначэнні, якія паўплываюць на працу рэальнага сектара. Пасаду гендырэктара "Мінск-Крышталь" зойме Ігар Шустаў. Прадпрыемства ўваходзіць у канцэрн "Белдзяржхарчпрам", топ-пазіцыю ў якім зараз заняў Анатоль Бубен. Пару месяцаў таму і там, і там здарыліся гучныя адстаўкі. Былы кіраўнік ведамства Аляксандр Забела пакінуў сваю пасаду праз карупцыю на гэтым мінскім заводзе.
А. Лукашэнка: Даравання за карупцыю не будзе!
Што ж, будзем спадзявацца, топ-менеджары беларускага лідара пачулі. Як гаворыцца, энергію, якую трацяць на прыкрыццё карупцыйных схем, лепш было б накіраваць на што карыснае. Падумаць, як палепшыць эканоміку прадпрыемстваў, як замацавацца на новых рынках - іх часам ліхаманіць. Канкурэнцыя, і з улікам паглыблення інтэграцыі з Расіяй, толькі ўзмацняецца. Асабліва ў вытворчасці цыгарэт і алкаголю.
Задача Белдзяржхарчпрама - новыя рынкі продажаў
Анатоль Бубен, лічы, двойчы ўвайшоў у адну раку. Новая пасада для яго - гэта, па сутнасці, вяртанне: у нулявых кіраваў Гродзенскім лікёрагарэлачным заводам, сыходзіў і вось вярнуўся з павышэннем. Пад крылом Белдзяржхарчпрама амаль 40 прадпрыемстваў - і гэта не толькі вытворцы алкаголю і тытунёвай прадукцыі, але беларуская кандытарская, цукровая галіны, кансервавыя заводы. Кормім сябе, гэта добра, надзённае пытанне, як больш прадаваць на экспарт.
Прэзідэнт: Праца ў вас адказная, але цікавая
У рабочым парадку Прэзідэнт узгадніў прызначэнні намеснікаў у некаторых міністэрствах - прамысловасці, юстыцыі, прыроды. Звяртаючыся сёння да кіраўнікоў, Прэзідэнт так і сказаў: "Праца чакае няпростая і адказная, але цікавая". Разлічваюць, што вопыт і дзелавыя якасці новых кіраванцаў дазволяць зладзіцца з задачамі, якія прагучалі ад першай асобы.
