Узор таго бізнесу, які неабходны Беларусі. Высокую ацэнку прадпрыемству даў Прэзідэнт, калі наведваў сёння вытворчасць "Вітэкс". Першае касметычнае прадпрыемства ў нашай краіне. Тут створаны поўны цыкл вытворчасці - ад распрацоўкі рэцэптуры да рэалізацыі прадукцыі праз сваю тавараправодную сетку. Аляксандр Лукашэнка азнаёміўся з магутнасцямі кампаніі і асартыментам. Сёння тут выпускаюць больш за 2 000 відаў касметыкі.
На экспарт прадпрыемства адпраўляе больш за палову сваіх тавараў. Геаграфія продажаў - больш за тры дзясяткі краін блізкага і далёкага замежжа. З мінулага года беларускую касметыку сталі прадаваць у Канадзе, Пакістане і Бахрэйне. "Вітэкс" - шматпрофільнае прадпрыемства.
Так, 15 гадоў таму кампанія стала ўласнікам стратнай гаспадаркі ва Уздзенскім раёне і на яе базе стварыла сельгасфіліял прадпрыемства. Рэканструявалі фермы, абнавілі парк збожжаўборачнай тэхнікі, пабудавалі сховішчы. За гэтыя гады з некалі стратнай гаспадарка ператварылася ў лепшую ў краіне. А "Вітэкс" выйшаў на рынак з цалкам новай прадукцыяй, прапанаваўшы беларусам натуральныя сокі і яблычныя чыпсы. Прэзідэнт адзначыў, гэтае прадпрыемства - доказ таго, што працаваць эфектыўна можна.
Прадпрыемства працягвае пашырацца. У наступным годзе завершыцца будаўніцтва новага корпуса па вытворчасці касметыкі ва Уздзенскім раёне. Гэта плюс тры сотні рабочых месцаў. Усяго на прадпрыемстве (у тым ліку з улікам сельгаспадаркі) працаўладкавана каля тысячы чалавек.