Чэмпіянат свету па біятлоне сярод юніёраў стартуе ў Раўбічах на наступным тыдні. Біятлонныя перамогі нашых дарослых біятланістак моцна гучаць на сусветнай арэне. Статус маючага адбыцца першынства пад Мінскам таксама высокі. Па значнасці ў календары міжнароднай федэрацыі гэтага віду спорту турнір пасля дарослага займае другое месца. І сёння ступень гатоўнасціі, як і ўзровень работ па рэканструкцыі спарткомплексу, праінспектаваў Прэзідэнт. Аляксандр Лукашэнка стаў на лыжы і асабіста праверыў якасць трас.
З падрабязнасцямі Мікалай Стула. Спарткомплекс "Раўбічы" з'явіўся на спартыўнай карце свету ў далёкім 1974 годзе. У Савецкім Саюзе гэта была асноўная база падрыхтоўкі для біятланістаў, яна запомнілася незвычайнай ружай вятроў на стрэльбішчы, а таксама складанай трасай. Раўбічы прымалі чэмпіянат свету, Еўропы, этап Кубка свету - гэта значыць усе самыя буйныя спаборніцтвы. Аднак старэла матэрыяльна-тэхнічная база, яна не дазваляла не тое што праводзіць спаборніцтвы высокага ўзроўню, нават паўнавартасныя зборы для нацыянальных каманд сталі рэдкасцю. Таму з 2010 года тут пачалася рэканструкцыя. У 2014 комплекс здалі ў эксплуатацыю. Падлічылі - змяненні за чатыры гады каштавалі 805 мільярдаў рублёў.
Па першым уражанні спецыялістаў, комплекс адзін з лепшых у Еўропе. Хутка сваю ацэнку дасць міжнародная супольнасць біятланістаў. Пачынаючы з панядзелка, у Беларусь пачнуць з'язджацца на чэмпіянат свету сярод юніёраў.
А сёння Раўбічы інспектаваў Прэзідэнт. Аляксандру Лукашэнку распавялі пра тэхнічныя характарыстыкі абноўленага комплексу. Працягласць трасы павялічана да 7 з паловай кіламетраў, шырыня 6 метраў - такое мала дзе сустрэнеш у Еўропе. Стрэльбішча асноўнае на 38 біятлонных установак. Ёсць яшчэ і запасное. Прэзідэнт парыруе: калі ўсё так цудоўна, чаму спарткомплекс недастаткова загружаны?
Загрузіць Раўбічы пад завязку не праблема, гаворыць першы віцэ-прэзідэнт Нацыянальнага алімпійскага камітэта, а па сумяшчальніцтве і кіраўнік баскетбольнай федэрацыі Максім Рыжанкоў. Комплекс шматфункцыянальны, тут створаны замкнёны цыкл падрыхтоўкі, гэта значыць умовы для трэніровак, харчаванне, аднаўленне. Вось баскетбалісткі нацыянальнай зборнай хутка збіраюцца ў Раўбічы. Акрамя таго, месца павінна быць цікава і замежным камандам. Бо ёсць бясспрэчныя плюсы, якія рэдка дзе сустрэць на іншых біятлонных базах: ад аэрапорта зусім побач, ад двухмільённай сталіцы таксама недалёка.
Падчас кароткага агляду біятлоннага стадыёна Кіраўнік дзяржавы звяртае ўвагу на эстэтычныя недахопы напярэдадні юніёрскага чэмпіянату свету. Праталіны на схіле перад стрэльбішчам відавочна не дададуць фарбаў тэлевізійнай карцінцы, якая пойдзе ў тым ліку і за мяжу. Надвор'е дазваляе зараз зрабіць штучны снег.
Без трасы і стрэльбішча біятлон уявіць немагчыма. Сучасны біятлон не абыходзіцца і без вакс-кабін. Тут рыхтуюць лыжы, менавіта тут закладваюць перавагу спартсмена на дыстанцыі. Не падмажаш - не паедзеш.
Гутарка з біятлоннымі спецыялістамі зайшла аб хуткім чэмпіянаце свету. Аляксандр Лукашэнка цікавіцца перспектывамі і дэманструе дзіўную дасведчанасць аб моцных і слабых баках нават тых спартсменаў, якія знаходзяцца ў другім складзе нацыянальнай зборнай.
Пасля таго як Прэзідэнту далажылі аб гатоўнасці комплексу, Аляксандр Лукашэнка вырашае асабіста выпрабаваць трасу ў кампаніі трэнера Аляксандра Сымана і дырэктара комплексу Андрэя Асташэвіча. Пераадолеўшы некалькі кругоў, Кіраўнік дзяржавы канстатуе - умовы для спартсменаў сапраўды добрыя. Раз ёсць умовы, калі ж будуць вынікі ад маладых спартсменаў, задаецца пытаннем Аляксандр Лукашэнка.
Чэмпіянат свету па біятлоне сярод юніёраў стартуе ў Раўбічах ужо 17 лютага. Што б там ні было заваяваць медалі - так задача не стаіць. Галоўнае, падвесці гэтых спартсменаў да дарослага біятлона ў канкурэнтаздольным стане. Зараз у камандзе 20 чалавек. Да іх падрыхтоўкі падключылі нават славутую канькабежку Анжаліку Кацюгу, хоць здавалася б, якая сувязь у каньковай і лыжнай падрыхтоўкі?
У свеце шмат біятлонных комплексаў. Усе яны пабудаваны па адных і тых жа прынцыпах. Раўбічы адрозніваюцца ў лепшы бок наяўнасцю крытага ціра. Тут ідэальныя ўмовы для прыстрэльвання зброі.
Цір да таго ж могуць выкарыстоўваць і стралкі. Юніёрскі чэмпіянат свету стане яшчэ адным іспытам перад вачамі функцыянераў з Міжнароднага саюза біятланістаў. Па інфраструктуры комплекс, безумоўна, адпавядае ўсім неабходным нормам. Зараз справа за малым - стварыць святочны антураж і правесці спаборніцтвы на высокім арганізацыйным узроўні. Калі ўсё пройдзе гладка, то Беларусь пры пэўных умовах ужо ў 2017 годзе можа стаць гаспадыняй этапу Кубка свету па біятлоне.
