Скараціць расходы бюджэту на бягучы год, але не падарваць эканоміку ключавых прадпрыемстваў і не спыніць іх мадэрнізацыю. Сёння на ўзроўні Кіраўніка дзяржавы абмеркавалі меры па зняцці часткі цяжару на падтрымку рэальнага сектара з дзяржаўнай казны. У прыватнасці, урад прапануе зменшыць пакрыццё працэнтаў па крэдытах на два пункты. Прытым што сёння з бюджэту кампенсуецца да 22 працэнтаў па крэдытных стаўках банкаў, робячы пазыковыя сродкі суперільготнымі. Адкрываючы нараду, беларускі лідар паставіў адразу некалькі прынцыповых пытанняў. Па-першае, на каго ляжа дадатковая крэдытная нагрузка; па-другое, якая сума эканоміі бюджэтных сродкаў і наколькі эфектыўна сёння яны расходуюцца.
Па выніках нарады Аляксандр Лукашэнка накіраваў праект указа на дапрацоўку. Прынцыповае патрабаванне Прэзідэнта - разгружаючы бюджэт, перакласці крэдытны цяжар не толькі на прадпрыемствы, але і на банкі. Эканомія бюджэту, на думку міністра фінансаў, павінна скласці толькі сёлета каля 400 мільярдаў рублёў. Дадатковая нагрузка не падарве эканоміку прадпрыемстваў-пазычальнікаў, а эканоміць на сацыяльных гарантыях насельніцтву, скарачаючы траты дзяржказны, Беларусь не мае намеру.
Уладзімір Амарын, міністр фінансаў Беларусі:
"Прэзідэнтам па выніках нарады даручана дапрацаваць праект указа з тым, каб нагрузка, звязаная са зніжэннем дзяржпадтрымкі ў выглядзе кампенсацыі працэнтаў па крэдытах, клалася не толькі на крэдытаатрымальнікаў - суб'ектаў рэальнага сектара эканомікі, але раўнамерна і на банкаўскі сектар. Мы не плануем скарачаць сацыяльныя абавязацельствы. Яны ўсе выконваюцца ў поўным аб'ёме. Скарачэнне ў асноўным закране выдаткі капітальнага характару. Гэта выдаткі на капітальныя рамонты, набыццё абсталявання непершачарговага характару".
Аптымізацыя бюджэтных выдаткаў на бягучы год будзе прадоўжана. Стратэгія прапісаная ў ключавым указе прэзідэнта нумар 78. Адкарэкціраваны галоўны фінансавы дакумент краіны ўрад прадставіць Кіраўніку дзяржавы ўжо ў чэрвені.
