Сёння ў Палацы Незалежнасці гаварылі аб фінансавым аздараўленні сельгаспрадпрыемстваў і аб завяршэнні ўборачнай кампаніі. Асноўным пытаннем нарады ў Прэзідэнта стала эфектыўнасць усяго аграрнага сектара.
Завяршыць працу на палях да 7 лістапада было адным з даручэнняў Кіраўніка дзяржавы. Аляксандр Лукашэнка падрабязна цікавіўся станам спраў на месцах. На фінальным этапе кампаніі галоўныя задачы аграрыяў - падрыхтаваць глебу пад ураджай будучага года, зрабіць запас угнаенняў і забяспечыць зімоўку жывёлы на фермах. У той жа час ідзе ацэнка фінансавага стану арганізацый. Каб падтрымаць неплацежаздольных удзельнікаў рынку, летам мінулага года быў падпісаны ўказ аб іх фінансавым аздараўленні. Гэтай формай дзяржпадтрымкі карыстаюцца больш за 300 арганізацый. Наколькі эфектыўная гэтая дапамога - яшчэ адно пытанне, якое абмеркавалі на вышэйшым узроўні. Па выніках года ўрад прапануе ўнесці ва ўказ змяненні.
У прыватнасці, праектам указа прадугледжваецца зніжэнне памеру арэнднай платы за прадпрыемства з 5 да 2 працэнтаў, а таксама адкрываюцца новыя магчымасці па ацэнцы, здачы ў арэнду і продажы комплексаў. Па выніках размовы Прэзідэнт даручыў дапрацаваць праект указа. І звярнуў увагу на тое, што ключавыя рашэнні па аказанні падтрымкі праблемным прадпрыемствам павінны прымаць мясцовыя ўлады. У цэлым гэты год для АПК склаўся ўдала. Да 7 лістапада ўборачныя работы ў асноўным завяршылі. Аляксандр Лукашэнка абмеркаваў праблемныя пытанні з кожным губернатарам, а таксама адзначыў працу спецыялістаў на сяле. За 10 месяцаў тэмп росту валавой прадукцыі ва ўсіх катэгорыях гаспадарак склаў амаль 103 працэнты.
Плануецца, што канчатковыя вынікі аграрнага года падвядуць у пачатку 2018. Будзе арганізавана асобнае мерапрыемства з удзелам Кіраўніка дзяржавы, дзе таксама адзначаць лепшых працаўнікоў сельскагаспадарчай сферы.
