Гэты чацвер у прэзідэнцкім графіку прайшоў пад знакам міжнародных сустрэч. Кропкавае супрацоўніцтва з рэгіёнамі Расіі - фундамент двухбаковых адносін Мінска і Масквы. Гэта заўсёды падкрэслівае наш Прэзідэнт. Сёння Кіраўнік беларускай дзяржавы сустрэўся з губернатарам Іркуцкай вобласці. Шматвектарнасць беларускай палітыкі не ўлічвае адлегласці. Прыклад таму - яшчэ адзін партнёр краіны ў арабскім свеце і на афрыканскім кантыненце. Аб развіцці адносін, у тым ліку эканамічных, ішла размова на сустрэчы Аляксандра Лукашэнкі з парламенцкай дэлегацыяй Егіпта.
Усе важныя дэталі перамоў прама зараз у нашага аглядальніка Ілоны Красуцкай.
Першы снег у Беларусі як пад заказ для сібірскіх гасцей. І, мякка кажучы, нешта дзіўнае для арабскіх партнёраў. Усё ж у Егіпце зараз бархатны сезон, плюс 22. Але нягледзячы на розніцу тэмператур, у Беларусі заўсёды сустракаюць вельмі цёпла. А інакш і быць не можа. Наша краіна адкрытая да дыялогу, наладжвае адносіны з найбліжэйшымі або самымі геаграфічна аддаленымі партнёрамі.
Спачатку ў прэзідэнцкім графіку сустрэча з кіраўніком парламента Егіпта. Нягледзячы на тое, што гэта першы візіт у гісторыі па лініі міжпарламенцкіх кантактаў, Аляксандр Лукашэнка і Алі Абдэль Аль Саед бачацца не ўпершыню - праводзілі двухбаковыя перамовы падчас візіту беларускага лідара ў Егіпет. Дарэчы, сенатар адзін з ініцыятараў стварэння груп сяброўства ў парламентах дзвюх краін. Сёння бакі абмеркавалі актуальныя пытанні ўзаемадзеяння з апорай на дамоўленасці, дасягнутыя двума прэзідэнтамі.
Тады на перамовах у Каіры лідары дамовіліся: супрацоўніцтва неабходна зрабіць больш паўнаважкім і выніковым. Прэзідэнты падпісалі дзясятак дакументаў. Сярод іх аб супрацоўніцтве ў галіне прававой дапамогі, сельскай гаспадаркі і навукі.
За студзень-верасень лічба ўзаемнага гандлю наблізілася да 80 мільёнаў долараў, але, як адзначаюць эксперты, да канца года перавысіць сотню. З канвеераў у Каіры сыходзяць беларускія трактары і грузавікі. Дзейнічае зборачная вытворчасць МАЗ і МТЗ. На рынку таксама прадэманстравана прадукцыя "Амкадор", Гомсельмаш. Гэтыя брэнды, а таксама Белкамунмаш, "Атлант" і ММЗ плануюць адкрыць свае вытворчасці ў Егіпце.
Візіт дэлегацыі пяцідзённы, з акцэнтам на пашырэнне гандлёва-эканамічнага і гуманітарнага ўзаемадзеяння. Парламенты дзвюх краін паспелі падпісаць пагадненне аб супрацоўніцтве.
Як гаворыцца, сур'ёзным праектам адлегласць ужо дакладна не перашкода. З пяцідзённым візітам у Беларусі зараз і губернатар Іркуцкай вобласці Сяргей Леўчанка.
Ад Сібіры да беларускай сталіцы сапраўды шлях няблізкі - амаль 6 тысяч кіламетраў. Разам з губернатарам у Мінск прыехала прадстаўнічая дэлегацыя. Асноўны акцэнт на ўмацаванне эканамічнага супрацоўніцтва. Пакуль тавараабарот з гэтым расійскім рэгіёнам не cамы вялікі - амаль 80 мільёнаў долараў. Тым не менш, апошнія гады бачна добрая дынаміка, рост у асноўным адбываецца за кошт прадукцыі беларускага машынабудавання. Акрамя класікі, прынцыпова новыя праекты.
Вобласць пераарыентавалася на нашу тэхніку, на вуліцах можна сустрэць беларускія аўтобусы. Іркуцкую прапіску даўно атрымала дылерская сетка МТЗ і МАЗа. Актыўна рэгіён супрацоўнічае з Магілёўліфтмашам. На тэрыторыі апераджальнага развіцця ва Усоллі-Сібірскім працуе сумеснае прадпрыемства.
На кожным кроку ў Іркуцкай вобласці і беларускія кафэ, магазіны касметыкі, абутку, тэкстылю і трыкатажу. І гэта заканамерна. Усё ж наша дыяспара налічвае 50 тысяч чалавек. Таму так лёгка нават за тысячы кіламетраў адчуваецца сувязь з гістарычнай радзімай. А яе прататыпам у цэнтры Сібіры стала беларуская вёска Тургенеўка.
Праграма візіту іркуцкай дэлегацыі ў Беларусі даволі шырокая. Губернатар наведае БелАЗ. У Прыангар’і на газакандэнсатных і вуглявых радовішчах патрэбна кар'ерная і грузавая тэхніка.
Сяргей Леўчанка пабывае і ў Брэсце. Менавіта там адбудзецца 3-е пасяджэнне рабочай групы па міжрэгіянальным супрацоўніцтве - абмяркуюць новыя магчымасці кааперацыі малога і сярэдняга бізнесу.
