"На змену зразумелым правілам гульні ў сусветнай палітыцы прыходзіць анархія. Знікаюць гарантыі недапушчэння новага маштабнага канфлікту..." Адкрыта пра праблемы сучаснай светабудовы - эмацыянальнае выступленне Прэзідэнта Беларусі сёння на саміце Шанхайскай арганізацыі супрацоўніцтва ў Бішкеку. Аляксандр Лукашэнка не толькі апісаў хваробы сучаснасці, але і прапанаваў беларускі погляд на іх вылячэнне. Шэраг ініцыятыў, такіх як "Хельсінкі-2" або спалучэнне еўразійскай і еўрапейскай інтэграцыі, ужо прасоўваюцца айчыннай дыпламатыяй і падтрыманы шматлікімі палітыкамі ў свеце. Але ў сталіцы Кыргызстана беларускі лідар назваў і шэраг стратэгічных навацый, якія перш не гучалі на такім высокім узроўні.
На палях саміту беларускі лідар правёў шэраг найважнейшых двухбаковых сустрэч. У перагаворным марафоне Кітай, Расія, Індыя, Узбекістан, Таджыкістан, Пакістан і Кыргызстан. У прыватнасці, з Уладзімірам Пуціным абмеркавалі тактыку і стратэгію глыбокай саюзнай інтэграцыі, гатоўнасць да новай сустрэчы на вышэйшым узроўні і ўдзел Расіі ў II Еўрапейскіх гульнях. Са старшынёй Сі Цзіньпінам гаварылі пра найхутчэйшае завяршэнне інвестпраектаў з удзелам кітайскага капіталу ў Беларусі і статусны міжнародны форум на базе "Вялікага каменя". З прэм'ер-міністрамі Індыі і Пакістана абмяркоўваліся новыя праекты, экспарт беларускіх тэхналогій пад ключ і візіты ў Беларусь на вышэйшым узроўні. Яны традыцыйна становяцца драйверамі палітыкі і эканомікі.
