Бяспека як галоўны запыт грамадства і як ключавы, штодзённы клопат і адказнасць улады. З такім агульным пасылам у аўторак з удзелам Прэзідэнта Беларусі прайшло пасяджэнне Савета Бяспекі. Галоўнакамандуючы расставіў акцэнты ў знешняй і ўнутранай палітыцы ў сферы бяспекі, вылучыўшы абсталяванне арміі, уключаючы нашу саюзную элітную групоўку АДКБ, мадэрнізацыю - размова пра ваенна-прамысловы комплекс і яго распрацоўкі - плюс, безумоўна, дысцыпліну і парадак у арміі. Міністру абароны і органам пракуратуры даручана не біць па хвастах, а эфектыўна не дапушчаць падзення аўтарытэту арміі.
Свет не стаў больш бяспечным, і любыя спробы сілавікоў і ўлады да самазаспакаення і расслабленасці могуць каштаваць дзяржаве і грамадству занадта дорага, упэўнены беларускі лідар. Па прыклады далёка хадзіць не трэба. Гэта і пра мілітарызм і новую гонку ўзбраенняў у свеце, і пра задушлівую палітыку санкцый і эканамічнага шантажу, і, вядома, пра шматпакутную Украіну. У выніку свет - за крок да глабальнага канфлікту, падсумаваў Прэзідэнт.
З ключавых элементаў унутранай бяспекі і правапарадку Прэзідэнта ў першую чаргу хвалюе алкагалізацыя насельніцтва, гібель на дарогах і ў пажарах - штогод страчваем паўтары тысячы чалавек, што недапушчальна шмат для кампактнай Беларусі. Яшчэ з праблем, паднятых на Савеце Бяспекі, - хатняе насілле, наркаманія, атручванне сурагатным алкаголем і новая мода ганяць на снегаходах і квадрацыклах, пагражаючы жыццю і здароўю грамадзян. Тэмы такія сур'ёзныя, што ім прысвяцяць асобнае пасяджэнне, хоць жорсткія даручэнні сілавікі ўжо атрымалі.
