На тыдні Аляксандр Лукашэнка наведаў бабруйскую "Славянку"

Усе даручэнні Прэзідэнта на жорсткім кантролі. Важная асаблівасць новай эканамічнай рэальнасці - прадпрыемствы перапрафілююцца, пачынаюць выпускаць актуальную, патрэбную менавіта зараз, прадукцыю. На тыдні адну з такіх вытворчасцяў наведаў Кіраўнік дзяржавы.

Бабруйская "Славянка" спецыялізуецца на пашыве вопраткі, аднак зараз тут наладзілі выпуск масак і касцюмаў спецабароны. Аб тым, што пабывае на падобных вытворчасцях, Аляксандр Лукашэнка гаварыў на мінулым тыдні. Кіраўнік Адміністрацыі падрыхтаваў падрабязны спіс такіх прадпрыемстваў. Усе яны нацэленыя на выкананне жорсткага даручэння - задаволіць масавы попыт на прадметы абароны. 

Працэс пастаянна кантралявалі адказныя вышэйшыя службовыя асобы

Кадры наведвання прадпрыемстваў кіраўніком Адміністрацыі, старшынёй Савета Рэспублікі, дзяржсакратаром Савета бяспекі бачыла ўся краіна. Як і абяцаў Прэзідэнт, забеспячэнне ўрачоў, бальніц і насельніцтва таксама ацаніў асабіста. Акрамя таго, такія паездкі - і гэта традыцыя - добрая магчымасць правесці рэвізію эканомікі рэгіёна ў цэлым. Унутраная эканамічная бяспека экспартнай Беларусі непарыўна звязаная з умовамі на сусветных рынках. Зараз няпросты час для ўсіх, але паступова бар'еры ў гандлі пачынаюць здымацца.

"Славянка" ўжо пашыла для медыкаў 3,5 млн. масак

Тут штодня выпускаюць не менш як 150 тысяч гэтых вырабаў. Прычым ужо зразумела: масак шыюць значна больш, чым нам неабходна. Менавіта таму кіраўнікі прадпрыемства звярнуліся да Прэзідэнта з просьбай дазволіць прадаваць на экспарт.  Падобныя просьбы гучалі ўжо не раз. Таму Аляксандр Лукашэнка расставіў усе акцэнты. Калі ёсць запас, прадаваць можна і трэба. Але не з мэтай напакаваць кішэню. У такі няпросты час усе мы павінны кіравацца прынцыпам узаемадапамогі: дапамагаюць нам, дапамагаем і мы. Але бяспека сваіх людзей, сваіх урачоў - прыярытэт.