Тры амерыканскія кангрэсмены, а таксама прадстаўнікі Дзярждэпартамента сёння сустрэліся з Прэзідэнтам Беларусі. Аляксандр Лукашэнка падкрэсліў на сустрэчы, што наша краіна зацікаўленая ў паўнавартасным супрацоўніцтве са Злучанымі Штатамі. Заакіянскія парламентарыі ў сваю чаргу адзначылі, што паміж дзвюма краінамі існуе шмат сфер для выгаднага ўзаемадзеяння. Нягледзячы на некаторыя палітычныя рознагалоссі, эканамічныя сувязі паміж Беларуссю і ЗША дастатокова моцныя. Беларускі экспарт з пачатку года павялічыўся на 56 працэнтаў, а колькасць сумесных прадпрыемстваў, якія працуюць у рэспубліцы, набліжаецца да чатырох соцень. Навошта амерыканскія кангрэсмены прыляцелі ў Мінск і на якую перазагрузку адносін гатовыя бакі, высветліў Аляксей Адашкін.
Мінск і Вашынгтон прызнаюць наяўнасць некаторых палітычных рознагалоссяў. Выкліканыя яны, у прыватнасці, дастаткова палітызаванымі ацэнкамі з боку амерыканцаў стану спраў у галіне дэмакратыі і правоў чалавека ў нашай краіне. Тым не менш, бакі гатовыя ісці на нармалізацыю адносін. Для гэтага выбраны самы прыдатны рэжым - тое, што амерыканцы называюць step by step (або "крок за крокам" па-руску). І сёння галоўная мэта або першы крок - гэта аднаўленне ўзаемнага даверу паміж Мінскам і Вашынгтонам.
Тры прадстаўнікі ніжняй палаты амерыканскага парламента (два дэмакраты і адзін рэспубліканец) сёння з цікавасцю разглядалі залы Палаца Незалежнасці. Кангрэсмены ЗША яшчэ ні разу не былі ў гэтым будынку. Хаця напэўна бачылі ў эфіры амерыканскага тэлебачання, якое ў лютым падрабязна асвятляла перамовы "нармандскай чацвёркі". Папярэднія парламенцкія дэлегацыі з-за акіяна наведвалі Мінск і сустракаліся з Прэзідэнтам у чэрвені 2009-га і кастрычніку 2010-га. Настаў час ізноў сустрэцца за сталом перамоў, а не ў завочных дыялогах праз масмедыя. Беларусь гатовая адчыніць свае дзверы - з гэтага пачынае гутарку Аляксандр Лукашэнка.
Першым да дыялогу падключаецца Дана Рарабакер, які прадстаўляе ў Капітоліі інтарэсы выбаршчыкаў штата Каліфорнія.
68-гадовы кангрэсмен у свой час працаваў журналістам, рэдактарам газеты, а ў 80-я гады мінулага стагоддзя з'яўляўся старшым спічрайтарам прэзідэнта Рэйгана. Не па чутках знаёмы з паліттэхналогіямі і з інструментамі па ўплыве на грамадскую думку з дапамогай СМІ.
Дана Рарабакер прапанаваў сёння павысіць узровень дыпламатычнага прадстаўніцтва і вярнуць пасла ЗША ў Мінск і пасла Беларусі ў Вашынгтон.
Дана Рарабакер, член палаты прадстаўнікоў кангрэса ЗША ад штата Каліфорнія: "Гэты візіт першы за многія гады. Паўза вельмі зацягнулася. Мы павінны разглядаць гэты візіт як пачатак дыялогу, а не адзінкавую падзею. Асабіста мяне вельмі парадавала тое, што я ўбачыў у Беларусі. Асабліва я рады, што мае ўяўленні аб вашай краіне, сфарміраваныя здалёку, за ўсе гэтыя гады аказаліся не зусім справядлівымі і дакладнымі. У вас сапраўды ёсць чым ганарыцца і насамрэч адкрываецца вельмі шмат сфер, у якіх нашы краіны маглі б супрацоўнічаць. Мы павінны пастарацца зрабіць так, каб той узровень адносін, які мы можам наладзіць сёння, быў пашыраны на карысць нашых народаў".
Аляксандр Лукашэнка ў гутарцы з кангрэсменамі адзначае, што апошнім часам кантакты паміж нашымі краінамі актывізаваліся, у тым ліку абмен візітамі афіцыйных дэлегацый і дзелавых людзей. Нездарма сёння за сталом і кіраўнік верхняй палаты беларускага парламента.
Мінулай восенню ў Нью-Ёрку Міхаіл Мясніковіч у статусе прэм'ер-міністра прыняў удзел у беларуска-амерыканскім бізнес-форуме. Прадстаўнікі вядучых айчынных прадпрыемстваў-экспарцёраў правялі перамовы з заакіянскімі партнёрамі. Да мерапрыемства праявілі цікавасць звыш сотні амерыканскіх кампаній. Сёлета за першыя пяць месяцаў беларускі экспарт у Амерыку павялічыўся на 56 працэнтаў. Гэта ў тым ліку стала магчымым дзякуючы арганізацыі дзелавога форуму на Манхэтэне.
У Беларусі зарэгістраваныя 382 сумесныя прадпрыемствы з амерыканскім капіталам.
Злучаныя Штаты з'яўляюцца адным з вядучых інвестараў у эканоміку нашай краіны. Толькі за мінулы год з-за акіяна паступіла амаль 70 мільёнаў долараў на развіццё розных відаў бізнесу. З 2010 года працуе Савет дзелавога супрацоўніцтва паміж нашымі краінамі. У яго склад увайшлі такія кампаніі з гучнымі імёнамі, як "Майкрасофт", "Ханіўэл", "Сіскасістэмз", "Катэрпілер", "Каліган" і іншыя.
Праграміст Сяргей Русак - адзін з пяці соцень супрацоўнікаў беларуска-амерыканскай IT-кампаніі, створанай у 1998 годзе. Спачатку гэта была невялікая фірма, у якой працавала толькі 40 чалавек. З далучэннем да Парку высокіх тэхналогій у 2007-м адкрылася новая старонка ў гісторыі кампаніі - прыбытковая.
Уладзімір Чарніцкі, дырэктар кампаніі: "Пяць гадоў таму наш абарот быў у раёне 500 тысяч долараў за месяц, на сёння ён складае 1 мільён 300 тысяч долараў за месяц. Мы гэтыя грошы прадаём дзяржаве ў банкі і потым аплачваем свае выдаткі: зарплата, арэнда, набыццё абсталявання і іншае. Асабліва бурны рост пайшоў пасля таго, як мы сталі рэзідэнтамі ПВТ, таму што вельмі выгадныя ўмовы, можна спакойна і свабодна творча працаваць, што мы і робім".
Адначасова ў гэтай кампаніі вядуць прыкладна 15 буйных праектаў. Сярод заказчыкаў - фінансавыя арганізацыі, амерыканскія банкі, магазіны. Усе, каму трэба ўласнае праграмнае забеспячэнне. Згодна са статыстыкай, летась экспарт паслуг з Беларусі ў ЗША склаў амаль 290 мільёнаў долараў. З іх большая частка - гэта менавіта прыбытак IT-сектара.
Але ўзаемаадносіны паміж Беларуссю і ЗША не абмяжоўваюцца эканамічнымі сувязямі. Важны аспект - супрацоўніцтва ў сферы бяспекі. Напрыклад, з 2004 года Мінск дазваляе Вашынгтону выкарыстоўваць беларускую паветраную прастору і нашы аэрадромы пры палётах у Афганістан. Са студзеня 2011-га праз тэрыторыю Беларусі ажыццяўляецца і чыгуначны транзіт грузаў для сіл ЗША ў Цэнтральнай Азіі. Кангрэсмены сёння асабліва адзначылі ўклад Мінска ва ўрэгуляванне сітуацыі ва Украіне. Прэзідэнт Аляксандр Лукашэнка падзяліўся сваім бачаннем таго, як дасягнуць міру ў суседняй краіне.
Група амерыканскіх парламентарыяў сёння наведала і Нацыянальную акадэмію навук. Для заакіянскіх гасцей правялі экскурсію па музеі айчыннай інтэлектуальнай фабрыкі. Асабліва доўгі прыпынак ля макета Беларускай АЭС. У сферы высокіх тэхналогій Беларусь і ЗША могуць плённа супрацоўнічаць. Менавіта ўзаемадзеянне ў галіне навукі кангрэсмен Рарабакер назваў своеасаблівым лакаматывам па збліжэнні дзвюх краін.
Дана Рарабакер, член палаты прадстаўнікоў кангрэса ЗША ад штата Каліфорнія: "Я думаю, што мы можам працаваць разам з Беларуссю, Расіяй і, можа быць, Украінай у галіне атамнай энергетыкі. Прыярытэтам будуць, вядома, новыя бяспечныя тэхналогіі. Таксама мы маглі б разам працаваць у галіне касмічных і энергазберагальных тэхналогій. У нас у прынцыпе можа з'явіцца вельмі шмат і іншых магчымасцяў".
Уладзімір Гусакоў, старшыня Прэзідыума НАН Беларусі: "Супрацоўніцтва паміж беларускімі навукоўцамі і амерыканскімі не спынялася ніколі, але мы маем намер гэтае супрацоўніцтва актывізаваць. Гэта можа быць у галіне фізікі, інфарматыкі, у галіне фізіка-тэхнічных навук, у галіне біятэхналогій, нанаматэрыялаў, нанатэхналогій, аграрных тэхналогій і г. д.".
У групы амерыканскіх кангрэсменаў аказалася дастаткова насычаная праграма ў Беларусі. Напярэдадні яны ўсклалі кветкі на памятных для беларусаў месцах з трагічнай гісторыяй. Акрамя таго, кангрэсмен Рарабакер расказаў журналістам, што ўзяў з сабой у гэтую паездку сваю дачку, якая асаблівае задавальненне атрымала ад паходу ў цырк у Мінску. Таксама свайго роду дыпламатыя, бо 11-гадовая міс Рарабакер напэўна падзеліцца са сваімі аднакласнікамі ўражаннямі ад паездкі ў Мінск.
