Аляксандр Лукашэнка павіншаваў супрацоўнікаў сферы інфармацыі і сувязі з прафесійнымі святамі

5 мая 2021

Прэзідэнт Беларусі Аляксандр Лукашэнка павіншаваў супрацоўнікаў сферы інфармацыі і сувязі з Днём друку і Днём работнікаў радыё, тэлебачання і сувязі.

"Дзякуючы высокаму прафесіяналізму беларускіх журналістаў, выдаўцоў, паліграфістаў і сувязістаў у краіне створаны і даступны кожнаму якасны і дакладны кантэнт, які дазваляе людзям аб'ектыўна ацэньваць рэаліі сённяшняга жыцця. Распавядаючы пра падзеі ў  краіне і свеце, рэалізуючы актуальныя грамадска-палітычныя, сацыяльна-эканамічныя, творчыя праекты, вы ствараеце эмацыйны фон і фарміруеце палітычную культуру ў грамадстве", - гаворыцца ў віншаванні.

Аляксандр Лукашэнка адзначыў, што шмат у чым ад грамадзянскай пазіцыі работнікаў гэтай сферы, умення ва ўмовах знешняга інфармацыйнага прэсінгу аргументавана і цвёрда адстойваць інтарэсы Беларусі залежыць непахіснасць спрадвечных каштоўнасцяў народа, традыцый і дзяржаўнага суверэнітэту.

"Перакананы, што ў Год народнага адзінства вашы талент і крэатыўнасць, кампетэнтнасць і адданасць справе будуць служыць высакароднай місіі ўмацавання нацыянальнай самасвядомасці беларусаў - усеагульнага гонару за гераічнае мінулае і здзяйсненні папярэдніх пакаленняў, пачуцця датычнасці кожнага да дасягненняў сучаснасці, усведамлення асабістай адказнасці за будучыню роднай зямлі", - падкрэсліў Прэзідэнт.