Гэтых людзей прынята зваць няйначай як залаты запас краіны. Пераможцы алімпіяд, лаўрэаты конкурсаў, спартсмены… Сёння, напярэдадні Дня Незалежнасці, лепшыя выпускнікі беларускіх ВНУ бралі ўдзел у цырымоніі ўскладання вянкоў да Вечнага агню на плошчы Перамогі.
А ўжо ўвечар прымалі віншаванні на Рэспубліканскім балі. Віншаваў іх асабіста Кіраўнік дзяржавы. І калі раніцай, падчас узнагароджвання заслужаных людзей, Аляксандр Лукашэнка больш гаварыў пра вынікі, дык тут - пра тое, што яшчэ толькі маецца зрабіць. І, судзячы па тых званнях, якія ў гэтых маладых людзей ужо ёсць, іх чакаюць па-сапраўднаму вялікія справы.
Рэпартаж Алесі Высоцкай. Журналісты сёння палявалі на іх, як папарацы на тэлезорак. Вось і Аляксея Ропана, выпускніка Белдзяржуніверсітэта інфарматыкі і радыёэлектронікі, наша здымачная група чакала сорак хвілін. Уладальніка чырвонага дыплома, які патрапіў у дваццатку лепшых праграмістаў свету, не адпускалі нашы калегі-газетчыкі. Аляксея чакае турнір у Вашынгтоне за званне лепшага айцішніка свету.
Такіх зорак, як Аляксей, па-зорнаму - з чырвонай дарожкай - сустракалі сёння на Рэспубліканскім балі выпускнікоў. Прыём на самым высокім узроўні ва ўсіх сэнсах. Ля ўваходу - артысты на хадулях.
Лёгкія сукенкі, іскрыстыя вочы і ўсмешкі. Вячэрні дрэс-код - нават у артыстаў мім-шоу. Госці адразу акуналіся ў атмасферу сучаснага балю.
Жывыя статуі - сярэбраныя і залатыя анёлы. Гасцям прапаноўвалі пагуляць - аніматары не давалі сумаваць. Дзяўчатам дарылі бутаньеркі. І кожны ахвотнік мог зрабіць фота на памяць нават з рэктарамі сваіх ВНУ.
Не меншай папулярнасцю для фота карыстаўся і струнны квартэт. Уся справа ў тым, што яго ўдзельніцы сядзелі на бутафорскіх крэслах вышынёй на тры метры.
Запрашэнне на баль атрымалі 200 маладых людзей, уладальнікі чырвоных дыпломаў. Пераможцы алімпіяд, лаўрэаты розных конкурсаў, спартсмены. З дасягненнямі некаторых можна было азнаёміцца на выставе. Госці маглі адпачыць на ўтульных канапах і пакаштаваць дэсерт з свежай садавіны, раскладзенай на століках вакол фантанаў белага і чорнага шакаладу.
Свята стала традыцыйным напярэдадні Дня Незалежнасці Беларусі. Сёння яны выпускнікі, але ўжо заўтра - маладыя спецыялісты. Тут будучыя эканамісты, дактары, ваенныя, юрысты. Залаты запас, або творчая маладая інтэлектуальная эліта.
Такія годныя віншаванняў і ад Кіраўніка дзяржавы. Яны павінны прымножыць дабрабыт сваёй краіны.
Для любой краіны таленавітыя маладыя кадры - найвялікшы набытак. У Беларусі поспехі такіх маладых людзей не застаюцца незаўважанымі. Створаны і працуе спецыяльных банк дадзеных аб юных талентах, які папаўняецца імёнамі, пачынаючы з іх школьных поспехаў. Далей адсочваецца і лёс такой маладой творчай эліты. Бо сёння яны, напрыклад, таленавітыя праграмісты, а заўтра могуць вывесці на новы ўзровень эканоміку і зрабіць тавары больш канкурэнтаздольнымі на сусветных рынках. Лепшыя з лепшых атрымалі сёння падзякі ад Прэзідэнта. Аляксандр Лукашэнка пажадаў усім здароўя, шчасця і добрага шляху ў жыцці.
І кожны з іх сёння загадаў сваё жаданне на будучае сталае жыццё, калі ўверх паляцелі жывыя матылькі, - кранальная цырымонія Рэспубліканскага балю выпускнікоў. Агульны настрой з лёгкім сумам па студэнцкіх гадах падхапілі гукі вальса. І па зале разнёсся дзівосны кветкавы водар: танцавальная пляцоўка запоўнілася пялёсткамі руж.