Аб ролі Мінска ў якасці перагаворнай пляцоўкі па ўкраінскім пытанні ішла размова сёння на сустрэчы Аляксандра Лукашэнкі з Леанідам Кучмам. Ён зноў прадстаўляе Кіеў на перамовах, якія аднавіліся ў беларускай сталіцы.
Нагадаем, Леанід Кучма быў кіраўніком украінскай дзяржавы з 1994 па 2005. Але з палітыкі не пайшоў, экс-прэзідэнт па-ранейшаму ўцягнуты ў многія пытанні. Пры ім у 2014 была дасягнута першая дамоўленасць аб спыненні агню ў краіне. Леанід Кучма быў прадстаўніком Украіны на перамовах аб міры на працягу 4 з паловай гадоў. Восенню мінулага года ён пакінуў гэтую працу. Напярэдадні новы Прэзідэнт Украіны Уладзімір Зяленскі папрасіў экс-прадстаўніка зноў уключыцца ў працу кантактнай групы па ўрэгуляванні сітуацыі ў Данбасе. Палітык згадзіўся і праанансаваў, што ўжо ёсць прапановы, якія дапамогуць у мінскім працэсе.
Сёння на сустрэчы з Кіраўніком беларускай дзяржавы Леанід Кучма яшчэ раз пацвердзіў, што беларуская сталіца па-ранейшаму мае каласальнае значэнне для Кіева. Мінску альтэрнатывы няма. Прэзідэнт Беларусі не ўтойваў, што Леанід Кучма заўсёды жаданы госць у нашай краіне.
На сустрэчы абмеркавалі і пытанні эканомікі. Аснова двухбаковых адносін - тавараабарот. Так, па выніках мінулага года ён склаў 5 з паловай мільярдаў долараў.
Леанід Кучма: Для мірнага дыялогу альтэрнатывы Мінску няма
5 июня 2019