Дамовіцца аб дакладным узаемадзеянні пагранічнікаў неабходна на пасяджэнні Вышэйшага Дзяржсавета Саюзнай дзяржавы. Сёння пра гэта заявіў Прэзідэнт Аляксандр Лукашэнка, наведваючы пагранзаставу "Дзівін" Пінскага пагранатрада.
Прэзідэнту далажылі аб мерапрыемствах па ахове дзяржмяжы на гэтым участку, а таксама аб гарантаванні пагранбяспекі Беларусі ў цэлым. Пагранічная застава "Дзівін" уведзена ў эксплуатацыю ў маі мінулага года, ахоўвае ўчастак дзяржмяжы з Украінай працягласцю больш за 30 кіламетраў. Гэта сучасны высокатэхналагічны комплекс, уключаючы сістэму жыццезабеспячэння, найноўшыя ўзоры тэхнічных сродкаў аховы мяжы, аўтамабільнай тэхнікі. На ўчастку адказнасці - 8 населеных пунктаў. Аляксандр Лукашэнка звярнуў увагу на стан дзяржмяжы на ўсходнім кірунку. Ёсць падстава абмеркаваць гэта пытанне з Расіяй на будучым пасяджэнні Вышэйшага Дзяржсавета ў Мінску.
Кіраўнік дзяржавы азнаёміўся і з узорамі тэхнікі. Некаторыя з іх выкананыя па спецзаказе пагранічных войскаў. Таксама Прэзідэнту паказалі інтэграваныя сістэмы аховы і тэхналогіі анлайн-назірання за межамі дзяржавы. Ахоўваць мяжу дапамагае штучны інтэлект. Спецпрыборы аўтаматычна вызначаюць характар парушэння. Сёння ішла размова і аб эфектыўнасці падрыхтоўкі кадраў. Аляксандр Лукашэнка адзначыў: на мяжы вайсковец атрымлівае часам больш вопыту, чым ва Узброеных сілах. Таму варта скаардынаваць колькасць на карысць пагранічных войскаў.
Ужо пасля наведвання заставы Кіраўнік дзяржавы пагаварыў з вайскоўцамі-пагранічнікамі і іх сем'ямі. На сустрэчу з Прэзідэнтам далёка ісці не прыйшлося. Літаральна за хвіліну хады прама ля заставы быў пабудаваны жылы дом на 16 кватэр. Яго здалі летась у прамым сэнсе пад ключ. У размове з Прэзідэнтам паміж радкамі адчувалася: служба ў гэтым камфортным месцы непасрэдна адбіваецца і на баявым духу саміх байцоў, і на настроі сваякоў. Вядома, меў значэнне і той факт, што Аляксандр Лукашэнка сам служыў у гэтых месцах. Таму па-сапраўднаму сур'ёзныя тэмы часта чаргаваліся з эмацыянальнымі, душэўнымі гісторыямі, успамінамі і перажываннямі.
