Нагадаем, тады рабочая паездка Прэзідэнта ў Мінскую вобласць павярнулася цэлым шэрагам гучных адставак. Па выніках наведвання прадпрыемства Барысаўдрэў Аляксандр Лукашэнка падпісаў указ, паводле якога за неналежнае выкананне даручэнняў Прэзідэнта па мадэрнізацыі вытворчасці Барысаўдрэў ад пасады вызваленыя губернатар Мінскай вобласці і шэраг службовых асоб. Сёння прызначаныя новыя кіраўнікі рэгіёнаў.
Аб новых асобах у структуры выканаўчай улады і пастаўленых перад імі задачах - Сяргей Гусачэнка.
Кадравы дзень у Кіраўніка дзяржавы апынуўся кампактным па персаналіях, затое гучным па прызначэннях. У губернатарскім корпусе краіны адразу некалькі перастаноў. Вакантнае крэсла кіраўніка сталічнага рэгіёну заняў Сямён Шапіра, зараз ужо экс-губернатар Гродзенскай вобласці. Выведучы рэгіён на перадавыя пазіцыі, падцягваць да высокага ўзроўню кіраванец будзе і Міншчыну. Вядома, не з нуля. У вобласці ёсць дасягненні і нядрэнная база, закладзеная ранейшым кіраўніком Барысам Батурам, якога Прэзідэнт пахваліў за эфектыўную дзейнасць.
Мінская вобласць Сямёну Шапіру знаёмая нядрэнна. Любанскі раён - гэта радзіма, усяго ў рэгіёне ён працаваў каля 20 гадоў. Узначальваў адзін з флагманаў АПК Міншчыны - агракамбінат Дзяржынскі. Па Гродзенскай вобласці, прызнаецца, смуткаваць будзе. Зрэшты, наперадзе цэлы спектр сур'ёзных задач для сталічнага рэгіёну: істотнае развіццё прамысловасці, сельскай гаспадаркі і сацыяльнай сферы.
Цэнтральны і самы вялікі па плошчы рэгіён краіны дастаўся, што называецца, амбіцыйнаму кіраванцу. Міністрам сельскай гаспадаркі Шапіра стаў у 47, губернатарам прымежнага рэгіёну - яшчэ не размяняўшы паўвекавы юбілей. Малады ўзрост калі і быў дзесьці перашкодай, але не адбіўся на выніку. А гэта галоўны крытэрый у ацэнцы працы дзяржкіраванца.
Губернатарам Гродзенскай вобласці сёння прызначаны Уладзімір Краўцоў. Чалавек у структуры выканаўчай улады не новы. Дэпутат Палаты прадстаўнікоў да абрання ў парламент у 2012-м больш за 10 гадоў працаваў у структуры Магілёўскага аблвыканкама, пяць з іх займаючы пасаду намесніка старшыні. Каменціруючы прызначэнне, Прэзідэнт гаворыць пра стыль кіраўніцтва, называючы Краўцова інтэлігентным кіраванцам.
Паўночна-Заходні рэгіён - на Рэспубліканскай дошцы пашаны. У 2012-м Гродзенская вобласць сярод пераможцаў ва ўсіх сферах дзейнасці. Магутны аграрны край не першы год паказвае самыя высокія вынікі па ўраджайнасці большасці сельгаскультур. Зрэшты, патэнцыял вобласці далёка не вычарпаны. І новаму губернатару трэба будзе не толькі ўтрымаць высокую планку, але і рухацца далей.
Прадстаўляючы кіраўнікоў на новыя пасады, Аляксандр Лукашэнка акцэнтуе ўвагу на развіцці, першым чынам, эканамічных паказчыкаў у рэгіёнах і заклікае кіраванцаў да дынамічнай, абдуманай і канкрэтнай працы: без паспешных рашэнняў, але з бачным вынікам.
Часу на разварушванне ў губернатараў папросту няма. Задачы пастаўленыя, і, нягледзячы на заканчэнне працоўнага тыдня, наўрад ці ў працоўным графіку новых кіраўнікоў наперадзе будуць значыцца два выхадныя.
