Гэты панядзелак прайшоў і пад знакам кадравых рашэнняў Прэзідэнта. Аляксандр Лукашэнка сёння абнавіў кіраўніцтва сталічнай мэрыі і прызначыў новага кіраўніка адміністрацыі Маскоўскага раёна. Перад кіраванцамі пастаўленыя тры асноўныя задачы: павышэнне ўзроўню зарплаты, вырашэнне пытанняў занятасці і цэнаўтварэння. Яшчэ адно патрабаванне - па-новаму паглядзець на працу ЖКГ. Бо як паказвае статыстыка, падчас прамых тэлефонных ліній і прыёмаў грамадзян менавіта гэтая сфера выклікае нямала нараканняў і пытанняў. Працягне Ілона Красуцкая.
Апошні тыдзень Байнэт актыўна абмяркоўваў кадравыя рашэнні Прэзідэнта. Новы міністр працы і сацабароны. Кіраванцы ў нафтаперапрацоўчым комплексе. Падчас прызначэння свайго памочніка, галоўнага інспектара па Мінску, Прэзідэнт паставіў некалькі задач: навядзенне парадку ў сталіцы, паляпшэнне працы ЖКГ і стварэнне рабочых месцаў. Выконваць гэтыя даручэнні трэба ў тандэме. Сёння Кіраўнік дзяржавы абнавіў кіраўніцтва сталічнай мэрыі.
Такое рашэнне зразумелае. Аляксандр Лукашэнка не раз публічна выказваў нездаволенасць мінскімі ўладамі. Крытыку Прэзідэнта часцей за ўсё выклікала сістэма ЖКГ. Чаго вартыя некалькі гучных нарад, дзе Прэзідэнту прыходзілася асабіста прымаць нетрывіяльныя рашэнні. А яшчэ даўгабуды, цэны ў магазінах, занятасць. Змяняць трэба многае - адсюль кадравы панядзелак. Прысвечаны выключна гораду.
Такім чынам, у мінскага мэра Андрэя Шорца з'явіліся адразу тры новыя намеснікі. На пасаду першага намесніка старшыні Мінскага гарвыканкама прызначаны Фёдар Рымашэўскі. Раней узначальваў камітэт будаўніцтва і інвестыцый мэрыі. Ужо экс-дырэктар Мінскбуда будзе курыраваць пытанні горадабудаўнічага комплексу, ЖКГ і транспарт. Яшчэ адзін намеснік мінскага мэра - Аляксандр Крапак. Раней кіраўнік адміністрацыі Партызанскага і Маскоўскага раёнаў Мінска. Зрэшты, яму добра знаёмыя і калідоры мэрыі. Яшчэ адна адзнака ў біяграфіі - кіраўнік камітэта эканомікі Мінгарвыканкама. Таму заканамерна зноў вернецца да эканамічных пытанняў. Медыйная персона – урач Ігар Юркевіч - расстаўся з пасадай кіраўніка камітэта па ахове здароўя. Зараз яго профіль - сацыяльная сфера і ідэалогія. А вось Андрэй Жайловіч зойме ранейшае крэсла Аляксандра Крапака, узначаліць самы малады раён беларускай сталіцы - Маскоўскі. Усе кіраванцы выдатна ведаюць горад, выраслі ў Мінску, у розны час працавалі на ключавых пасадах. Відавочна, каманда маладая, вопытная і перспектыўная. Прэзідэнт ускладае вялікія надзеі. І ставіць вялікія задачы.
Кіраўнік дзяржавы ніколі не ўтойваў: падбор кандыдатаў - выбар доўгі і няпросты. Трэба ўлічыць асабістыя якасці, прафесійныя заслугі прэтэндэнтаў, выслухаць рэкамендацыі і ацэнкі з боку. Рашэнне ўзважанае і забірае шмат часу. Здавалася б: задач пакуль усяго тры, але іх важнасць складана пераацаніць. Мінск павінен стаць прыкладам для ўсёй краіны. Належныя вынікі і сцэнарый кіравання - у той жа час арыенцір для кіраўнікоў у рэгіёнах.
Наказ Прэзідэнта: разумны і гаспадарчы падыход ва ўсім. Безумоўна, чакаем ініцыятыў. Талковых, але без рэформ і ўзрушэнняў. І галоўнае - чуць людзей. Дапамагчы, падтрымаць, вырашыць звычайныя жыццёвыя пытанні. Але ўжо ў суаўтарстве кіраўнікі і мінчане павінны вярстаць карысныя ініцыятывы для горада.
Прынцыповае патрабаванне Прэзідэнта - па-новаму паглядзець на працу ЖКГ. Як паказвае статыстыка, падчас прамых тэлефонных ліній і прыёмаў грамадзян менавіта гэтая сфера выклікае нямала нараканняў і пытанняў з боку насельніцтва. Сярод даручэнняў Кіраўніка дзяржавы - перагледзець фарміраванне тарыфаў на камунальныя паслугі, убачыць рэальную цану і працэнт выдаткаў.
Беларуская сталіца - брэнд. Як забяспечым ад глабальнага (бяспекі) да банальнага (глянцу і руху грамадскага транспарту) - па нас будуць меркаваць госці з-за мяжы. Тысячы турыстаў зараз актыўна карыстаюцца перавагамі 5-дзённага тура без візавай адзнакі ў пашпарце. Не важна, пройдуць яны па цэнтральных вуліцах Мінска або спыняцца ў Маскоўскім раёне горада. Ад беларускай сталіцы павінны застацца толькі самыя лепшыя ўражанні.
