Гэта Прэзідэнт Аляксандр Лукашэнка заявіў сёння на адкрыцці пленарнага пасяджэння XIX Сусветнага кангрэса рускай прэсы.
У маштабным форуме ўдзельнічаюць прадстаўнікі 52-х краін, сярод іх 238 журналістаў з 213-ці сродкаў масавай інфармацыі, а таксама дзяржаўныя і грамадскія дзеячы Беларусі і Расіі, кіраўнікі міжнародных арганізацый, дыпмісій, бізнес-супольнасць, палітолагі і медыяэксперты. Аляксандр Лукашэнка адзначыў, што прафесія журналіста ў новых тэхналагічных умовах кардынальна змянілася. Адбыўся пераход да новай сістэмы стварэння і распаўсюджвання інфармацыі - грамадзянскай журналістыкі. У якасці масмедыя можа выступіць практычна любы чалавек, які валодае тэлефонам і выхадам у Інтэрнэт. Прэзідэнт асабліва падкрэсліў, што сэнс сапраўднай свабоды слова не толькі ў магчымасці выбару, але і ў адказнасці за яго. У сваім выступленні Кіраўнік дзяржавы нямала гаварыў і пра так званыя гібрыдныя войны.
У розныя гады ўдзельнікамі Кангрэса рускай прэсы былі прэзідэнт Расіі Уладзімір Пуцін, канцлер Германіі Гельмут Коль, Генеральны сакратар ААН Кофі Анан і іншыя відныя дзяржаўныя і палітычныя дзеячы. На гэты раз у фармаце дыскусій удзельнікі абмяркоўваюць найважнейшыя тэмы: якія прыярытэты сучаснай цывілізацыі генерыруюцца ў медыяпрасторы; ці з'яўляецца яна крыніцай развіцця, партнёрства і добрасуседства краін і народаў у імя будучыні; як супрацьстаяць выклікам і пагрозам XXI стагоддзя і аб'яднаць намаганні ўсіх краін у барацьбе з пагрозамі і выклікамі міру і стабільнасці.
На палях Кангрэса рускай прэсы Аляксандр Лукашэнка сустрэўся з паслом добрай волі ЮНЕСКА, кіраўніком Сусветнай асацыяцыі рускай прэсы Віталем Ігнаценкам і першым намеснікам генеральнага дырэктара інфармацыйнага агенцтва ТАСС Міхаілам Гусманам. На сустрэчы абмяркоўваліся глабальныя тэмы, у тым ліку ініцыятывы, прапанаваныя Беларуссю падчас 26-й летняй сесіі Парламенцкай асамблеі АБСЕ. У прыватнасці, арганізацыя новага маштабнага міжнароднага форуму па аналогіі з Хельсінкскім працэсам. Віталь Ігнаценка высока ацаніў намаганні беларускага боку і асабіста Прэзідэнта Беларусі, накіраваныя на ўмацаванне стабільнасці і бяспекі ў рэгіёне і свеце ў цэлым. Кіраўнік дзяржавы сёння таксама даў кароткае інтэрв'ю агенцтву ТАСС. Гаварылі аб выніках пасяджэння Вышэйшага дзяржсавета ў Маскве, развіцці беларуска-расійскіх адносін па найважнейшых напрамках, аб перспектывах і праблемах Саюзнай дзяржавы. Вынікам размовы стане новая серыя праграмы з цыкла "Формула ўлады", якая, як плануецца, выйдзе ў жніўні.
