Перад маштабным спартыўным форумам - II Еўрапейскімі гульнямі - да павелічэння турыстычнага патоку рыхтуюць і прапускныя пункты. Аб іх мадэрнізацыі і ў цэлым нацыянальнай мытні сёння дакладваў кіраўнік профільнага ведамства. Беларусь - краіна транзітная. Ад дзеянняў мытні па сутнасці залежыць рэалізацыя нашага транзітнага патэнцыялу. Грузапаток праз краіну расце, што разам з аўтаматызацыяй працэсаў кантролю і аптымізацыяй адміністрацыйных працэдур дае пазітыўны вынік - напаўняльнасць бюджэту ў параўнанні з мінулым годам вырасла. Асаблівая ўвага да працы на расійскім напрамку. У прыватнасці, намаганні, якія прымае беларускі бок па недапушчэнні тавараў з санкцыйнага спісу. З моманту ўвядзення эканамічных мер беларускія спецыялісты выявілі больш чым 2 тысячы правапарушэнняў, узбуджана 30 крымінальных спраў па фактах незаконнага перамяшчэння тавараў. Пры гэтым аўтарамі чорных схем часта аказваюцца менавіта расіяне. Падрабязнасці ў рэпартажы Ілоны Красуцкай.
У рабочым графіку Кіраўніка дзяржавы сёння некалькі публічных мерапрыемстваў. Спачатку Аляксандр Лукашэнка сустрэўся з сенатарам Мар'янай Шчоткінай, а пасля з кіраўніком Мытнага камітэта. Гутарка глабальная - як хутка і бяспечна прапусціць праз дзяржмяжу дзясяткі тысяч чалавек. Наперадзе маштабнае спартыўнае мерапрыемства - II Еўрапейскія гульні ў Мінску. Зрэшты, гэта далёка не адзіная тэма гутаркі.
Святы святамі, і пакуль свет ахоплены футбольнай эйфарыяй, супрацоўнікам мытнай службы працы дадалося. За час мундыялю мяжу Беларусі перасеклі амаль 33 тысячы балельшчыкаў, што накіроўваліся ў Расію. Усе разам спрацавалі эфектыўна. Кіраўнік Мытнага камітэта даложыць Прэзідэнту: добрыя паказчыкі ў ведамства ў цэлым і за першае паўгоддзе. Грузапаток праз нашу краіну вырас, што адбілася і на паступленні плацяжоў у бюджэт. Яны склалі больш чым 2 мільярды долараў - рост на чвэрць у параўнанні з такім жа перыядам мінулага года. Гэта гаворыць і аб актыўнай і празрыстай працы бізнесу.
Візуалізуем адзін дзень з жыцця беларускіх мытнікаў. За суткі дзяржаўную мяжу перасякаюць амаль 64 тысячы чалавек, 15,5 тысячы легкавых аўтамабіляў, 6 тысяч грузавікоў, 210 чыгуначных саставаў і 75 самалётаў.
Такі трафік цяжка ўявіць напачатку суверэнітэту. Больш чым за чвэрць стагоддзя Мытнаму камітэту ўдалося павялічыць прапускную здольнасць у 10 разоў. Эфектыўна абслугоўваць таварапаток у адзіночку не можа ніводная дзяржава. Калегі па абодва бакі мяжы павінны працаваць у тандэме. Спыняюць беларускія спецыялісты і спробы правесці так званы санкцыйны тавар на тэрыторыю Расіі.
З моманту ўвядзення эканамічных мер беларускія спецыялісты выявілі больш за 2 000 адміністрацыйных правапарушэнняў, заведзена 30 крымінальных спраў па фактах незаконнага перамяшчэння 25 000 тон тавараў санкцыйнай групы. Нягледзячы на ўсе прынятыя меры, ад расійскага боку паступаюць прэтэнзіі наконт якасці працы нашых спецыялістаў.
Напярэдадні на магілёўскім кірунку затрыманыя дзве фуры з санкцыйнымі таварамі, якія ехалі з Беларусі ў Расію. Дакументы, пададзеныя вадзіцелямі, аказаліся падробленымі. Суправаджаў груз грамадзянін Расіі, які да таго ж значыўся ў міждзяржаўным вышуку. І такіх прыкладаў дзясяткі. У лістападзе мінулага года буйная партыя груш накіроўвалася ў Расію пад выглядам каўчуку, па падробленых дакументах у суседнюю дзяржаву хацелі адправіць больш за 80 тон шампіньёнаў, яблыкаў і буякоў. Увогуле, пералічваць можна доўга. І, як правіла, аўтарамі чорных схем аказваюцца менавіта расіяне. Аляксандр Лукашэнка лічыць, што трэба максімальна шырока асвятляць гэтыя факты.
Пасля дакладу Прэзідэнту ў гутарцы з журналістамі Юрый Сянько адзначыў, што маніторынг гэтага пытання працягваецца як мытнай службай, так і праваахоўнымі органамі.
Удасканальваюцца не толькі тэхналогіі і метады працы супрацоўнікаў ведамства, мытні ў цэлым. У чэрвені наступнага года Беларусь прыме ІІ Еўрапейскія гульні. На 10 дзён Мінск стане спартыўнай сталіцай свету. Прыедуць 4 000 спартсменаў, каля 2 000 трэнераў і афіцыйных прадстаўнікоў дэлегацый. А яшчэ дзясяткі тысяч гасцей. Але не за гарамі і чэмпіянат свету па хакеі, які прыме наша краіна і Латвія. Да гэтай падзеі актыўна рыхтуецца мытня.
У прыватнасці, мадэрнізуюцца пункты пропуску ў розных кірунках, каб сустрэць такі паток балельшчыкаў і гасцей. Зараз актыўна змяняецца пункт "Брузгі" на беларуска-польскай мяжы.
Пасля мадэрнізацыі прапускная здольнасць для грузавога транспарту павялічыцца ўдвая, тут таксама з'явяцца дадатковыя палосы і мытныя калідоры. Цалкам абновіцца сістэма відэаназірання і аўтаматычнай фіксацыі транспарту. Павялічыцца хуткасць перадачы даных, а значыць, скароціцца час мытнага афармлення. Усе гэтыя новаўвядзенні заробяць ужо ў наступным годзе, напярэдадні правядзення ІІ Еўрапейскіх гульняў.
Беларусь не проста ў чаканні сапраўднага спартыўнага свята, для сусветнай супольнасці гэта яшчэ і прэзентацыя іміджавага праекта. Для нашай краіны імідж -гэта заявіць пра сябе проста з парога - падчас перасячэння дзяржаўнай мяжы. Як правіла, у гэты час складаецца і першае ўражанне аб краіне.
