Што чакаюць ад галоўных медыярэсурсаў - Прэзідэнт абмеркаваў з кіраўнікамі найбуйнейшых СМІ Беларусі

Беларусі пакуль удаецца засцерагчы сваю інфармацыйную прастору ад масавых маніпуляцый і медыякратыі, калі нацыянальны парадак дня дыктуюць не ўласныя інтарэсы грамадства і дзяржавы, а знешнія сілы, алігархічныя групоўкі, палітычныя кланы і журналісты, што абслугоўваюць іх інтарэсы. Такую выснову можна зрабіць з аб'ектыўнага аналізу сітуацыі на медыярынку, які сёння прагучаў у Палацы Незалежнасці ад Кіраўніка дзяржавы. На сустрэчы з кіраўнікамі дзяржаўных СМІ Прэзідэнт прызнаў адставанне па форме падачы матэрыялаў, але не па змесце. Праўда ад лідараў меркаванняў, аўтарская журналістыка, тэхналагічнасць і апора на інфармацыйны суверэнітэт - з гэтага падмурка павінна і будзе павялічвацца айчынная медыяпрастора.

Узровень пагроз на медыяполі будзе расці

Сітуацыя, якая складваецца сёння на інфармацыйным полі, гарантуе і рост канкурэнцыі, і павелічэнне пагроз. Беларусь з усіх бакоў пранізана рознымі медыйнымі патокамі, таму пастаянна будзе сутыкацца з інсінуацыямі ў СМІ, а таксама адкрыта недакладнай інфармацыяй. На жаль, гэтыя медыйныя абстрэлы адбываюцца не толькі з боку сапернікаў, але і саюзнікаў. 

У Беларусі з'явіцца новы навінавы тэлеканал

Прэзідэнт падтрымаў прапанову аб стварэнні ў Беларусі новага навінавага тэлеканала. Ён з'явіцца на базе Агенцтва тэлевізійных навін Белтэлерадыёкампаніі. Мяркуецца, што медыярэсурс пачне працу ў канцы гэтага года або пачатку наступнага і будзе вяшчаць з 7:00 да 24:00.

Абмяркоўвалі ў Палацы Незалежнасці і сітуацыю на рынку СМІ краіны, тэму будаўніцтва медыяцэнтра, а таксама сістэму працы айчыннага вымяральніка тэлевізійнага рынку, якая павінна пачаць функцыянаваць да канца года.