Аб ролі беларускага навукоўца, інтэграцыі навукі і вытворчасці, фінансаванні і стварэнні прарыўных распрацовак. Гэтыя і іншыя тэмы гучалі сёння падчас II З'езда навукоўцаў Беларусі.
Удзел у форуме прыняў Кіраўнік дзяржавы. Сярод гасцей навукоўцы Акадэміі навук, іх калегі з Азербайджана, Арменіі, Балгарыі, Казахстана, Кітая, Латвіі, Расіі. А таксама вышэйшыя службовыя асобы краіны, кіраўнікі кампаній, дэпутаты, прадстаўнікі дыпкорпуса. Разам з Прэзідэнтам дэлегаты абмеркавалі прыярытэты доўгатэрміновага развіцця. Безумоўна, гаварылі аб праблемах. Нямала дыскусій было прысвечана цяжкасцям укаранення навуковых распрацовак. Інтэлектуальную эліту Кіраўнік дзяржавы арыентаваў на вырашэнне актуальных праблем у АПК, мадэрнізацыі кампаній і іншых сферах эканомікі.
Гаварылі і пра тое, як пазбегнуць уцечкі кадраў у навуковай сферы, удасканаленне выкладання ў ВНУ - адукацыю заўтрашняга дня. 2017-ы стаў па-сапраўднаму знакавым для навуковай галіны. Размова не толькі аб глабальных адкрыццях, але і пераўтварэнні ўсёй сістэмы. Экспартныя кантракты ў Беларусі сёння заключаны з 60 краінамі. За пяць гадоў выпуск навукова-тэхнічнай і інавацыйнай прадукцыі вырас больш як удвая. Пытанне харчовай бяспекі, у тым ліку, вырашана з апорай на новыя айчынныя тэхналогіі. Не без дапамогі навукоўцаў Беларусь будуе першую атамную станцыю. Мноства абмеркаванняў было засяроджана вакол ключавога дакумента форуму - праекта стратэгіі "Навука і тэхналогіі". У ім вызначана будучая мадэль краіны "Беларусь інтэлектуальная". Яе ключавыя кампаненты: лічбавая эканоміка і стварэнне IT-краіны. Аляксандр Лукашэнка запэўніў, што канструктыўныя ініцыятывы і прарыўныя ідэі навукоўцаў дзяржава заўсёды падтрымае.
Чакаецца, што рэалізацыя стратэгіі "Навука і тэхналогіі" да 2040 года дасць навукаёмістасць ВУП 3 %, а доля прарыўных даследаванняў і распрацовак узрасце да 30 %. Адзначым, з'езд навукоўцаў - выніковае мерапрыемства Года навукі.
