Вялікі блок эканамічных пытанняў абмяркоўвалі напярэдадні ў Палацы Незалежнасці

Спектр пытанняў шырокі, кропкава прайшліся па самых актуальных тэмах. Без увагі не застаўся беларуска-расійскі парадак дня. Прэзідэнт даручыў ураду паскорыць узгадненне праграмы дзеянняў па паглыбленні інтэграцыі. Дарожныя карты павінны быць гатовыя ў лістападзе. Не толькі з Расіяй, але і з Еўрасаюзам трэба актывізаваць працу па вырашэнні візавых пытанняў. У найбліжэйшы час МЗС унясе свае прапановы Кіраўніку дзяржавы. Прыняты рашэнні і па бязвізе, для тых, хто прыязджае ў нашу краіну. Так, Аляксандр Лукашэнка падтрымаў прапанову пашырыць бязвізавую зону ў Гродзенскай і Брэсцкай абласцях. Указ ужо падпісаны. Абмяркоўвалі ход буйных інвестпраектаў у дрэваапрацоўцы. Адзін з іх - запуск вытворчасці на Светлагорскім цэлюлозна-кардонным камбінаце. Прэзідэнта запэўнілі, прадпрыемства будзе ўведзена ў тэрмін, г.з. у другім паўгоддзі. Сярод іншых праектаў  заводы ў Добрушы і Шклове. Іх Кіраўнік дзяржавы даручыў дапрацаваць і ўнесці канчатковы варыянт дакументаў на працягу месяца. На пастаянным кантролі ў Прэзідэнта і ход жніва. Аляксандр Лукашэнка даў адпаведныя даручэнні, каб уборачная кампанія прайшла ў тэрмін.