Прэзідэнт Беларусі сёння накіраваўся з афіцыйным візітам у В'етнам. Раніцай борт №1 вылецеў з Нацыянальнага аэрапорта Мінск. У праграме візіту перамовы Аляксандра Лукашэнкі з прэзідэнтам В'етнама Чыонг Тан Шангам, сустрэчы з генеральным сакратаром Кампартыі і прэм'ер-міністрам краіны. У рамках візіту сёння ў Ханоі праходзіць беларуска-в'етнамскі бізнес-форум.
Кіраўнік беларускай дзяржавы ўжо двойчы наведваў В'етнам з афіцыйнымі візітамі. Пакуль агульная эканоміка відавочна адстае ад узроўню палітычнага дыялогу. Мінску і Ханою па сілах весці некалькі агульных праектаў, якія могуць стаць узорнымі прыкладамі супрацоўніцтва. Тавараабарот краін сёння ацэньваюць на 170 мільёнаў долараў. У В'етнаме працуе зборачная вытворчасць Мінскага аўтамабільнага завода. Па выніках бізнес-форуму ў Ханоі падпісаны пакет кантрактаў паміж беларускімі і в'етнамскімі кампаніямі. Чакаецца, што ў найбліжэйшыя гады сумесная эканоміка вырасце ў чатыры разы.
Уладзімір Сямашка, намеснік прэм'ер-міністра Беларусі: "Нармальная лічба - гэта 500-700 мільёнаў долараў мінімум. Пры вызначаным парытэце, калі сальда павінна быць блізкае да нуля. Быў падпісаны кантракт на 240 мільёнаў долараў паміж Беларускай калійнай кампаніяй і дзвюма в'етнамскімі кампаніямі на тры гады. Агульны аб'ём паставак - прыкладна 830 000 тон угнаенняў, прычым з дынамікай росту аб'ёмаў паставак. Вялікі кантракт падпісаў наш БелАЗ".
Пасля В'етнама Аляксандр Лукашэнка накіруецца з афіцыйным візітам у Туркменістан. Кіраўнік дзяржавы правядзе перамовы з прэзідэнтам краіны Гурбангулы Бердымухамедавым, па выніках якіх будуць падпісаныя міжнародныя дакументы. Адносіны паміж Мінскам і Ашхабадам даўно выйшлі за рамкі проста сяброўскіх. Дзве краіны заклалі калійны падмурак будучага стратэгічнага супрацоўніцтва. У туркменскіх Каракумах Беларусь пад ключ будуе Гарлыкскі горна-ўзбагачальны калійны камбінат. Кошт праекта - мільярд долараў. Чакаецца, што падчас візіту Прэзідэнт Беларусі наведае сумесную беларуска-туркменскую выставу-кірмаш і алімпійскі гарадок. Аляксандр Лукашэнка таксама прыме ўдзел у міжнароднай канферэнцыі "Палітыка нейтралітэту: міжнароднае супрацоўніцтва ў імя міру, бяспекі і развіцця".
