Менавіта з гэтага моманту для замежных дыпламатаў пачынаецца місія ў нашай краіне. Кіраўнік дзяржавы выказаў надзею, што адносіны Беларусі з краінамі, якія прадстаўляюць новыя паслы, стануць годным прыкладам сяброўства і ўзаемавыгаднага супрацоўніцтва.
Наш аглядальнік Алеся Высоцкая сачыла за цырымоніяй.
Ля параднага ўваходу Палаца Рэспублікі - Рота ганаровай варты. Адзін за адным пад'язджаюць аўтамабілі прадстаўніцкага класа, пакуль без знакаў адрознення. Такі пратакол. У руках у дыпламатаў - белыя папкі. Гэта і ёсць даверчыя граматы, пасля ўручэння якіх першай асобе дзяржавы кіраўнікі дыпмісій лічацца пасламі. У дакуменце - імя, ранг дыпламата, а таксама просьба: верыць пасланцу гэтай краіны. Традыцыі ўжо стагоддзі, але, як і ў часы Візантыі, сёння таксама ўсё згодна са строгімі дыпламатычнымі канонамі.
Даверчыя граматы Прэзідэнту Беларусі ўручылі паслы Анголы, Гватэмалы, Гвінеі-Бісау, Ірана, Кот-д'Івуара, Лаоса, Літвы, Мексікі, Нігерыі, Перу, Філіпінаў і Чылі. Фарміраванне пояса добрасуседства - прыярытэт беларускай знешняй палітыкі, падкрэсліў Кіраўнік дзяржавы. Высока шанаваць мір і давер, сябраваць шчыра і без каменя за пазухай беларусаў навучыла гісторыя.
Аляксандр Лукашэнка, Прэзідэнт Рэспублікі Беларусь: Якія б рэгіёны вы ні прадстаўлялі, у самым сэрцы Еўропы ў асобе Беларусі вы знаходзіце прадказальнага і адкрытага партнёра. Мы не толькі гатовыя да прадуктыўнага ўзаемадзеяння, але і па-сяброўску заўсёды прыйдзем на дапамогу ў выпадку неабходнасці. Беларусь рэалізуе любыя ініцыятывы, якія дапамогуць умацаваць сувязі паміж краінамі і пашырыць гарызонты супрацоўніцтва”.
А гарызонтаў супрацоўніцтва з гэтымі краінамі - шмат. Напрыклад, з Літвой, дыпмісію якой у нашай краіне ўзначаліў Эвалдас Ігнатавічус. Беларусь разлічвае на нармалізацыю беларуска-еўрапейскіх адносін. Да таго ж у другой палове 2013 года гэтая дзяржава старшынствуе ў Еўрасаюзе. У Беларусі з Літвой шмат сумесных інтарэсаў - і ў галіне бяспекі, і ў гандлі, і ў прамысловай кааперацыі. Летась у беларускую эканоміку паступілі 173 мільёны долараў літоўскіх інвестыцый. А наш экспарт у гэтую краіну вырас амаль на 40%.
Лацінская Амерыка - таксама асаблівы вектар для знешняй палітыкі Беларусі. Летась агульны тавараабарот з дзяржавамі гэтага рэгіёну перавысіў 2 мільярды долараў. Ад простага гандлю з нашай краінай тут даўно перайшлі да сумесных праектаў. Гэта нафтаздабыча, будаўніцтва, прамысловасць, сельская гаспадарка.
Традыцыйнымі партнёрамі з'яўляюцца для Беларусі і краіны Азіі. Адкрываюцца новыя рынкі. Даверчую грамату Аляксандру Лукашэнку ўручыў сёння і пасол Ірана. Беларуска-іранскія кантакты носяць выключна мірны характар, падкрэсліў Аляксандр Лукашэнка. Для сумесных праектаў з удзелам капіталу з гэтай краіны ствараюцца камфортныя ўмовы. Ёсць што прапанаваць у супрацоўніцтве і Філіпінам, і краінам Афрыканскага кантынента.
Строгая цырымонія змянілася нефармальнай гутаркай. Аляксандр Лукашэнка, не мяняючы традыцыі, прапанаваў гасцям шампанскае Савецкае. Падышоў літаральна да кожнага і асабіста павіншаваў з пачаткам дыпмісіі. Улічваючы блізкасць менталітэтаў, самы працяглы дыялог атрымаўся з паслом суседкі Літвы.
Звяртаючыся да дыпламатаў, Аляксандр Лукашэнка выказаў надзею, што адносіны Беларусі з дзяржавамі, якія яны прадстаўляюць, стануць годным прыкладам сяброўства і ўзаемавыгаднага супрацоўніцтва.
Ад Палаца Рэспублікі аўтамабілі новых паслоў ад'язджалі ўжо з флагамі краін, якія яны прадстаўляюць. З гэтага моманту для замежных дыпламатаў пачалася місія ў нашай краіне.
