Амаль усе гасцінічныя комплексы ўжо расчынілі свае дзверы і гатовы прымаць гасцей і ўдзельнікаў планетарнага першынства па хакеі. І сёння ў Мінску на адкрыццё гасцініцы класа люкс - гатэля Рэнесанс - прыбыў Кіраўнік дзяржавы. Па традыцыі неад'емныя атрыбуты цырымоніі - чырвоная стужка і падарунак Прэзідэнта. Гэтым разам хрустальны ключ. Кіраўнік дзяржавы азнаёміўся з гатэлем і ўмовамі пражывання гасцей. Дарэчы, у маі Рэнесанс прыме дэлегацыі з шасці краін - удзельнікаў сусветнага першынства па хакеі.
Усе падрабязнасці ў рэпартажы Дар'і Белавусавай-Пятроўскай. Рэнесанс - міжнародны брэнд. Ва ўсім свеце знаходзяцца больш за 150 гатэляў падобнага ўзроўню. Прычым яны пабудаваны і ў гістарычным Лондане, і на курортах Карыбскага басейна. І сёння гатэль такога класа з'явіўся ў сталіцы Беларусі.
Планетарных форумаў такога высокага ўзроўню ў нашай краіне яшчэ не праходзіла. Чэмпіянат свету па хакеі - адна з найважнейшых спартыўных падзей краіны. Свята не толькі для беларусаў, але і аматараў лядовых баталій з розных кантынентаў. Таму да яго падрыхтоўкі асаблівая ўвага. Сёння Аляксандр Лукашэнка асабіста прыбыў на адкрыццё гатэля Рэнесанс. Бо менавіта тут падчас сусветнага першынства размесцяцца хакейныя каманды з 6 краін- удзельнікаў.
Прэзідэнта Беларусі сустракалі як дарагога госця. Па традыцыі ўрачыста Аляксандр Лукашэнка перарэзаў стужку і падарыў гатэлю сімвалічны хрустальны ключ.
Пасля афіцыйнай часткі Кіраўніку дзяржавы наладзілі невялікую экскурсію. Наведаўшы рэстаран гатэля, дарэчы, ён можа адначасова абслугоўваць да 160 кліентаў, Аляксандр Лукашэнка адзначыў, што еўрапейскі сэрвіс трэба аб'яднаць з добрымі па якасці беларускімі прадуктамі.
Затым Кіраўніку дзяржавы паказалі так званы бальны пакой. Праўда, гэтая зала прызначана не для танцаў, а для правядзення канферэнцый і бізнес-сустрэч. Як трансформер, з аднаго вялікага яна можа ператварыцца ў тры розныя памяшканні, разлічаныя на больш як 600 чалавек.
Дарэчы, спартсмены і госці сталіцы змогуць займацца спортам, не выязджаючы з гатэля. Тут ёсць сучасная трэнажорная зала, СПА-цэнтр, басейн, фінская і руская лазні. І вядома, асаблівая цікавасць да гасцінічных нумароў. У гатэлі іх больш за 260.
Вытанчаны інтэр'ер і арыгінальны дызайн. Нумары разлічаны на кліентаў рознага ўзроўню - ад стандартнага да прэзідэнцкага люкса. Ва ўсіх ёсць высакахуткасны Інтэрнэт, інтэрактыўнае тэлебачанне. Пабываўшы ў адным з нумароў, Кіраўнік дзяржавы адзначыў, што ў новых гасцініцах неабходна максімальна выкарыстаць беларускую прадукцыю, напрыклад, мэблю.
Новы гатэль належыць адной з самых буйных гасцінічных сетак свету - Marriott. Міжнародная кампанія ўключае ў сябе больш за 3,5 тысячы гасцініц па ўсім свеце. Генеральны менеджар мінскага гатэля Рэнесанс Францл Жэспер, у 90-е быў асабістым поварам Яе Вялікасці каралевы Даніі. Потым працаваў у Літве, Балгарыі, Нарвегіі, Казахстане. Для яго гатэль - візітная картка краіны. Таму для кожнага кліента Рэнесанс - гэта своеасаблівы экскурсавод па культуры той краіны, дзе пабудаваны гатэль.
Францл Жэспер, генеральны менеджар гасцініцы ЗАТ МПС-Гатэль, Мінск: У распрацоўцы дызайну мінскага гатэля Рэнесанс працавалі вядучыя беларускія архітэктары. У сваёй канцэпцыі яны выкарысталі ідэю Белавежскай пушчы. Таму вы можаце бачыць, што ў інтэр'еры вельмі шмат прысутнічае элементаў лесу, дрэва, камянёў - жывой прыроды.
Рэнесанс узвялі за два гады. Будавалі беларусы на грошы расійскага інвестара. Кіруе гатэлем датчанін, але ўжо ў найбліжэйшы час тут падрыхтуюць беларускіх спецыялістаў, у тым ліку і на кіруючыя пасады. Падчас гутаркі з інвестарамі і кіраўніцтвам гатэля на гэта звярнуў увагу Прэзідэнт. Беларусам варта пераймаць вопыт замежных калег у частцы кваліфікацыі гасцінічнага персанала.
У гатэлі строгі адбор супрацоўнікаў. Паколькі праца непасрэдна звязана з людзьмі, трэба быць камунікабельным і пажадана ведаць некалькі моў.
Сардэчна запрашаем у наш гатэль - гэту фразу на розных мовах свету Наталлі трэба будзе вымавіць не раз. Кансьерж гатэля прайшла некалькі этапаў гутаркі і гатовая да зносін з любым кліентам. Імідж гатэля - гэта не толькі дарагое аздабленне, але і прафесіяналізм супрацоўнікаў, падкрэсліваюць у Рэнесансе. І нават калі вы робіце першыя крокі ў гэтай працы, кампанія возьме на сябе ваша навучанне.
Юлія Сцяпанава, дырэктар па персанале гасцініцы Рэнесанс: На дадзеным момант гатэль практычна цалкам укамплектаваў свой штат, мы пачынаем навучанне супрацоўнікаў, як прафесійныя трэнінгі, так і трэнінгі наконт стандартаў кампаніі. Мы чакаем на працу людзей як з вопытам, так і без вопыту, як з англійскай мовай так і без яе. Што тычыцца адкрытых вакансій, то ў нас яшчэ ёсць вакансіі афіцыянтаў, мы набіраем маладых людзей без вопыту працы з невялікім веданнем англійскай мовы з тым, каб далей яго развіваць у кампаніі. У нас развіццю персанала надаецца вялікая ўвага, ёсць трэнінгі як агульнакарпаратыўныя, з пункта погляду каштоўнасцяў кампаніі, стандартаў працы, так і трэнінгі ў рамках аддзела. Ёсць 10-хвілінныя трэнінгі, якія праходзяць штодня, ёсць трэнінгі штомесячныя, што праходзяць у рамках аддзела і іх праводзяць вопытныя супрацоўнікі альбо кіраўнікі. Ёсць карпаратыўны трэнер, які навучае таксама ў адпаведнасці са стандартамі кампаніі па пэўнай зададзенай праграме.
Яшчэ некалькі гадоў таму ў Беларусі гасцінічных месцаў было ў 15 разоў менш, чым у іншых краінах Еўропы. Два гады таму ў Мінску працавала ўсяго 25 гасцініц. Да чэмпіянату свету па хакеі пабудавалі 14 новых. Старыя адрэстаўравалі. І зараз падчас сусветнага першынства будуць працаваць 43 гасцініцы на больш як 9 тысяч месцаў.
Узровень гатэляў у Мінску падыдзе любому кліенту. Нумары ад эканамкласа да VIP. Адпаведна і цэнавая разбежка - ад 35$ за суткі да 400. Пры гэтым цэны ў гасцініцах замарозілі. Тарыфы могуць падняцца максімум на 10%. Дарэчы, да 9 мая забраніраваны фактычна ўсе месцы, нават у тых гатэлях, якія пакуль не адкрыліся. Між тым на Мінск-Арэну і Чыжоўка-Арэну прададзена і забраніравана больш за паўмільёна білетаў. Пры гэтым пятую частку выкупілі іншаземцы. Зборная Беларусі пачне турнір матчам з амерыканцамі. На гэтую гульню білетаў ужо не дастаць. Да старту чэмпіянату свету па хакеі ў Мінску засталося менш за месяц.
