Сёння Прэзідэнт сустрэўся з паслом Ірана з нагоды завяршэння яго дыпламатычнай місіі.
Як адзначыў Аляксандр Лукашэнка, узровень супрацоўніцтва паміж дзвюма краінамі варта павышаць і значна. Аб'ём двухбаковага гандлю пакуль невялікі. З пачатку года ён складае 38 мільёнаў долараў. Галоўная прычына гэтага - узмацненне ў апошнія гады рэжыму аднабаковых фінансава-эканамічных санкцый у дачыненні да Ірана.
Гаворачы аб гандлёвым узаемадзеянні, Кіраўнік дзяржавы адзначыў, што ў абедзвюх краін ёсць вялізны нявыкарыстаны патэнцыял. Таму эканамічнае супрацоўніцтва неабходна нарасціць, даручыў Прэзідэнт. У экспартным пакеце Беларусі ў Іран - беларуская машынабудаўнічая класіка, касметыка, будматэрыялы, оптыка. З Ірана мы атрымліваем арэхі, садавіну, медыцынскія прыборы.
Невялікае падзенне паказчыкаў сумеснай эканомікі аднак не перашкодзіла рэалізаваць шэраг інвестыцыйных праектаў: Напрыклад, адзін з самых вялікіх у Беларусі лагістычных комплексаў быў пабудаваны з прыцягненнем іранскіх інвестыцый. Ён адкрыўся тры гады таму.
Акрамя таго, вясной стала вядома, што вытворца аўтамабіляў Samand плануе вярнуцца ў нашу краіну - на беларуска-іранскай эканамічнай камісіі ў Тэгеране ў маі быў падпісаны адпаведны мемарандум. Сёлета краіны падпісалі і дарожную карту супрацоўніцтва на найбліжэйшыя два гады. Прэзідэнт Аляксандр Лукашэнка лічыць 2017-ы вызначальным годам у адносінах дзвюх краін. Супрацоўніцтва Беларусі і Ірана можна і трэба развіваць.
Махамад Рэза Сабуры, Надзвычайны і Паўнамоцны Пасол Ірана ў Беларусі: "Я і ўсе ў кіраўніцтве Ірана абсалютна салідарныя з Вамі. Мы сапраўды не выкарысталі ў поўнай меры патэнцыял двухбаковых адносін. Усё, што вырабляецца ў Беларусі, запатрабавана ў Іране і наадварот. Нам трэба прыкласці намаганні для развіцця ўзаемаадносін. Але, спадар Прэзідэнт, вы добра разумееце, што па аб'ектыўных прычынах былі вызначаны бар'еры".
Дыпламатычным адносінам Мінска і Тэгерана больш за 20 гадоў. Аляксандр Лукашэнка двойчы наведваў Іран. Адбыліся і два візіты ў адказ лідара Ісламскай Рэспублікі.
Летась ва Уфе на палях самітаў БРІКС і Шанхайскай арганізацыі супрацоўніцтва прайшла сустрэча Аляксандра Лукашэнкі з Хасанам Рухані.
Сёння Кіраўнік дзяржавы выказаў гатоўнасць асабіста сустрэцца з прэзідэнтам Ірана і абмеркаваць развіццё двухбаковых адносін. Як адзначыў Аляксандр Лукашэнка, маючая адбыцца сустрэча павінна быць добра падрыхтавана, прынятыя раней рашэнні неабходна яшчэ раз вывучыць і пакінуць толькі тое, што мы разам можам рэалізаваць.