Такая дамоўленасць была дасягнутая сёння на сустрэчы прэзідэнтаў Аляксандра Лукашэнкі і Чан Дай Куанга. І Мінск, і Ханой не хаваюць шчырай зацікаўленасці ў дынамічным развіцці і ўмацаванні сувязяў. Цяперашні візіт в'етнамскага лідара ў Беларусь - таму яшчэ адно пацверджанне. Двухбаковыя адносіны такіх далёкіх геаграфічна, але такіх блізкіх па духу краін правераныя не толькі часам, але і выпрабаваннямі, якія выпалі на долю в'етнамцаў. Беларускі народ заўсёды быў побач. Ужо чвэрць стагоддзя гэтая дужая і дружалюбная аснова паслядоўна большае палітычнымі і эканамічнымі сувязямі. І вось чарговыя крокі на шляху збліжэння - стварэнне беларуска-в'етнамскага сумеснага прадпрыемства "МАЗ Азія". Паглыбленне кааперацыі ў галінах транспартнага машынабудавання і сельскай гаспадаркі, нафтахіміі і лёгкай прамысловасці. Чан Дай Куанг запрасіў Аляксандра Лукашэнку наведаць В'етнам, і запрашэнне з падзякай прынята. Падрабязнасці насычанага дня - у Аляксея Адашкіна.
Краіна дракона, які ўзлятае, - так вобразна гавораць пра В'етнам географы і складальнікі даведнікаў. Назва гэта гістарычная. Аднак у апошнія гады яна набыла новы сэнс. Эканоміка гэтай дзяржавы дэманструе зайздросны рост. Прагрэс такі, што эксперты заяўляюць пра з'яўленне ў кампаніі прызнаных азіяцкіх тыграў і в'етнамскага дракона, які імкнецца ўвысь. Новай зоркі Азіі.
67-павярховыя небаскробы ў сталіцы, магазіны модных еўрапейскіх дызайнераў, дарагія аўтамабілі сярод скутараў. І знешне, і ўнутрана В'етнам змяняецца. ВУП гэтай краіны ў пачатку ХХІ стагоддзя паказаў вялікі чатырохразовы рост. Паводле ацэнак экспертаў, В'етнам ужо да 2050 года будзе 22-й эканомікай свету - гэта значыць, ушчыльную падыдзе да парога Вялікай дваццаткі. Імклівыя змены ў краіне прыцягваюць замежныя карпарацыі. У тым ліку з Беларусі. На поўначы В'етнама ўжо завяршаецца будаўніцтва завода "МАЗ Азія".
Бізнесмен Нгуен Хунг добра зарабляе на любові в'етнамцаў да нашай тэхнікі. Яго кампанія на рынку ўжо трынаццаць гадоў. Фірма актыўна закупляе і БелАЗы, і МАЗы, і покрыўкі Белшына. З гэтага года будзе ўжо ў В'етнаме вырабляць беларускія грузавікі.
Галоўнай палітычнай сілай у В'етнаме і сёння застаецца Камуністычная партыя. У канцы 80-х тут пачалася свая перабудова, афіцыйна названая абнаўленнем. Але яна не разваліла, а ўмацавала В'етнам і дала магутны імпульс для развіцця эканомікі.
З красавіка мінулага года прэзідэнтам В'етнама з'яўляецца 61-гадовы Чан Дай Куанг. У рангу кіраўніка дзяржавы ён у Беларусі ўпершыню. Да гэтага наведваў нашу краіну ў статусе міністра грамадскай бяспекі. Сваё турнэ ў наш рэгіён Чан Дай Куанг пачаў менавіта з трохдзённага візіту ў Беларусь. Другі пункт маршруту - Масква.
Адлегласць паміж Мінскам і Ханоем - больш за сем тысяч кіламетраў. Тым не менш В'етнам для нас - самая блізкая ў Паўднёва-Усходняй Азіі дзяржава, дзе Беларусь ведаюць і шануюць. Краіны, апроч чыстай эканомікі, злучае дужае сяброўства, праверанае сапраўднай вайной. Каля двух сотняў беларусаў дапамагалі В'етнаму паўстагоддзя таму абараняць сваю незалежнасць. Сёння дужы поціск рукі лідараў пад успышкамі фотакамер стаў пралогам насычанага перамовамі дня. Гэта ж і сімвал узаемнай павагі і выгаднага супрацоўніцтва.
За чвэрць стагоддзя дыпламатычных адносін гэта ўжо трэці візіт в'етнамскага лідара ў Мінск. Столькі ж разоў і беларускі прэзідэнт наведваў гэтую азіяцкую краіну.
Прычым у 2015 Ханой стаў першай замежнай сталіцай, дзе пабываў Аляксандр Лукашэнка пасля інаўгурацыі. Такі жэст ва ўсходняй палітыцы, вядома ж, ацанілі.
Чан Дай Куанг, Прэзідэнт В'етнама: "У Беларусі і В'етнама агульная шматгадовая гісторыя, якая напісаная ў тым ліку крывёй. Калі мы вялі вайну за незалежнасць, вы былі побач з намі. Мы за гэта вельмі ўдзячныя і шануем гэта. Тое, што мы ўжо зрабілі разам, - гэта аснова для ўмацавання і пашырэння нашых сувязяў. Я гатовы з вамі абмяркоўваць усе меры для паглыблення супрацоўніцтва".
Нягледзячы на геаграфічную аддаленасць, В'етнам і Беларусь развіваюць партнёрства ў шматлікіх сферах. Тут і падтрымка на сусветнай арэне - у рамках ААН і Руху недалучэння - і асабліва двухбаковыя адносіны. Кірункі рознапланавыя - ад эканомікі да адукацыі, культуры і турызму.
Менавіта В'етнам стаў першай краінай у свеце, якая склала пагадненне аб стварэнні зоны свабоднага гандлю з Еўразійскім эканамічным саюзам. Для Мінска праз Ханой адкрылася акно магчымасцяў доступу на вялізны рынак АСЕАН. Асацыяцыя дзяржаў Паўднёва-Усходняй Азіі - гэта шэсцьсот мільёнаў чалавек і два з паловай трыльёны долараў сукупнага ВУП.
У зоне свабоднага гандлю краіны абавязаліся адкрыць адна адной рынак тавараў прыкладна па 90 працэнтах тарыфных ставак. А гэта амаль увесь тавараабарот. Добры стымул для запуску нашых вытворчасцяў у гэтай азіяцкай краіне. Пастаўляючы па льготных мытах машынакамплекты і збіраючы з іх грузавікі і аўтобусы, мы атрымліваем канкурэнтную перавагу на рынку АСЕАН. СП "Маз Азія" яшчэ дабудоўваецца, але менеджмент прадпрыемства ўжо дамовіўся аб продажах беларуска-в'етнамскай тэхнікі і ў Інданезію, і на Філіпіны, і ў Камбоджу.
У 2016 тавараабарот паміж Беларуссю і В'етнамам перавысіў 120 мільёнаў долараў. Пачатак гэтага года дэманструе аптымізм у лічбах. Аб'ём узаемнага гандлю павялічыўся са студзеня па красавік на 35 працэнтаў. Прычым беларускі экспарт вырас на траціну. Мы пастаўляем у В'етнам калійныя ўгнаенні, машынакамплекты грузавой тэхнікі, кар'ерныя самазвалы, шыны, трактары, металапрадукцыю і прадукты харчавання. Закупляем у гэтай азіяцкай краіне сродкі сувязі, офіснае абсталяванне, абутак, адзенне, натуральны каўчук, морапрадукты, рыс, гарбату і каву.
Сёння па выніках перамоў Прэзідэнт Аляксандр Лукашэнка заве новы арыентыр - 500 мільёнаў долараў. Менавіта такі тавараабарот адпавядае патэнцыялу дзвюх краін.
Галоўны вынік перамоў - Беларусь і В'етнам ідуць шляхам устанаўлення стратэгічнага партнёрства. У прысутнасці лідараў дзвюх краін сёння падпісана 10 міжнародных дакументаў. Кожны дапаможа пашырыць узаемадзеянне ў пэўных сферах. Сярод іх - машынабудаванне, геалогія, навука, спорт, турызм, ваенна-тэхнічнае супрацоўніцтва і міжрэгіянальныя сувязі.
Чан Дай Куанг, Прэзідэнт В'етнама: "У В'етнама і Беларусі традыцыйна дружалюбныя адносіны, ёсць вялізны патэнцыял для развіцця супрацоўніцтва ў многіх сферах. Я хачу заявіць аб жаданні і рашучасці кіраўніцтва і народа В'етнама ўмацоўваць эфектыўнае супрацоўніцтва з Беларуссю ў інтарэсах абодвух бакоў. Нашы перамовы з Кіраўніком беларускай дзяржавы прайшлі ў адкрытай і давернай атмасферы, былі плённымі і эфектыўнымі".
Аднойчы беларуская тэхніка ўжо здзейсніла ў В'етнаме адну транспартную рэвалюцыю. Матацыклы "Мінск" тут прадмет асобнага культу. У свой час менавіта на іх пераселі з веласіпедаў в'етнамцы. Фан-клуб такой тэхнікі аб'ядноўвае каля паўтысячы в'етнамцаў. Найбуйнейшыя гарады краіны - Ханой і Хашымін - плануюць абзавесціся метро. І тут могуць спатрэбіцца беларускія вопыт і тэхналогіі. Аб з'яўленні станцый "Мінская" і "Беларуская" ў в'етнамскай падземцы гаварылі сёння ў Палацы Незалежнасці.
Чан Туан Ань, Міністр прамысловасці і гандлю В'етнама:
"У нас распрацаваны план па паляпшэнні транспартнай сістэмы нашых двух самых буйных гарадоў. Мы ведаем, што вашы прадпрыемствы валодаюць неабходнымі магчымасцямі. Таму мы хацелі б запрасіць беларускіх спецыялістаў паўдзельнічаць у стварэнні праекта па мадэрнізацыі транспартнай інфраструктуры Ханоя і Хашыміна".
В'етнам валодае багатымі прыроднымі рэсурсамі. Тут ёсць запасы нафты, газу, баксітаў, волава, золата. У адной з правінцый краіны знаходзіцца і найбуйнейшае на тэрыторыі Паўднёва-Усходняй Азіі радовішча каменнага вугля. Акрамя таго, сельская гаспадарка вывела В'етнам у сусветныя лідары па продажах рысу, кавы, гарбаты, спецый. Менавіта таму ў краіне попыт на грузавую тэхніку і трактары толькі расце. Беларускія вытворцы аператыўна падстройваюцца пад запыты азіяцкага рынку.
Віталь Воўк, Міністр прамысловасці Беларусі: "Трактарны завод зрабіў спецыяльны трактар для в'етнамскага рынку і рынку Паўднёва-Усходняй Азіі. Спецыяльнае патрабаванне - гэта павінен быць лёгкі, мець канкурэнтаздольную цану. Мы разам з в'етнамскімі спецыялістамі зрабілі такі трактар, ён зараз плыве ў В'етнам, у гэтым сезоне выпрабуем. Будуць поспехі, рынак адкрыецца масавы для гэтай тэхнікі".
Беларускія трактары і В'етнам традыцыйна злучаюць у прамым сэнсе грашовыя адносіны.
Трактар МТЗ красуецца на купюры 200 донгаў з 1987 года. Беларускую тэхніку на в'етнамскія грошы змясцілі ў знак падзякі за дапамогу ў адраджэнні сельскай гаспадаркі. Новым сімвалам адносін Мінска і Ханоя можа стаць грузавы аўтамабіль. Хто ведае, магчыма, у хуткім часе на в'етнамскай валюце з'явяцца МАЗы або БелАЗы.
Хутка ў В'етнаме з'явіцца і сумеснае прадпрыемства па вытворчасці малочнай прадукцыі з беларускай сыравіны. Толькі за мінулы год наш экспарт прадуктаў харчавання ў гэту азіяцкую краіну вырас амаль у тры разы.
Леанід Заяц, Міністр сельскай гаспадаркі і харчавання Беларусі: "Ёсць вялікая зацікаўленасць в'етнамскага боку ў прасоўванні нашай малочнай прадукцыі на в'етнамскі рынак, а таксама ў стварэнні СП на тэрыторыі В'етнама па вытворчасці малочных прадуктаў з сухога малака, вырабленага ў РБ, па беларускіх тэхналогіях. Магутнасць - 100 тон гатовай прадукцыі за суткі".
Пасля насычаных перамоў лідары Беларусі і В'етнама прагуляліся сёння па тэрыторыі Палаца Незалежнасці. Тут у фае на бачным месцы захоўваецца і мастацкая часцінка В'етнама. Падарунак генеральнага сакратара Камуністычнай партыі гэтай азіяцкай краіны. На Алеі ганаровых гасцей Палаца Незалежнасці на памяць аб візіце кожны прэзідэнт пакідае елку. Сваё дрэва зараз ёсць і ў кіраўніка В'етнама.
У вышэйшых эшалонах улады В'етнама ёсць моцнае беларускае лобі. У яго склад уваходзяць выпускнікі нашых ВНУ, якія пасля вяртання на радзіму ўзляцелі па кар'ернай лесвіцы. І супрацоўніцтва ў навукова-тэхнічнай сферы працягваецца.
Перспектыўныя інавацыйныя праекты Прэзідэнт В'етнама сёння абмеркаваў з беларускім прэм'ер-міністрам. Мінск прапаноўвае Ханою кааперацыю ў здабычы нафты.
Паміж Беларуссю і В'етнамам заключана больш як 65 пагадненняў - у тым ліку міждзяржаўных, міжурадавых і міжведамасных. Гэта значыць, для ўмацавання гандлёва-эканамічнага супрацоўніцтва існуе надзейны прававы падмурак. Гэтую тэму Прэзідэнт В'етнама сёння падрабязна абмеркаваў са Старшынёй Палаты прадстаўнікоў Уладзімірам Андрэйчанкам.
Візіт Прэзідэнта В'етнама ў нашу краіну працягнуўся традыцыйнай і сімвалічнай цырымоніяй. Чан Дай Куанг усклаў вянок на плошчы Перамогі ў Мінску. Памятаць, паважаць мінулае і ніколі не забываць гісторыю, якімі бы горкімі не былі яе ўрокі - гэта агульная рыса нацыянальных характараў беларусаў і в'етнамцаў.
В’етнамскі дракон і імклівы беларускі бусел рухаюцца ў адным кірунку. Дзесяцігоддзі сумеснай гісторыі даказалі, што Мінск і Ханой не толькі добрыя сябры, але і добрыя дзелавыя партнёры.
