Развіццё беларуска-кубінскіх адносін абмяркоўвалі сёння на сустрэчы Прэзідэнт Беларусі і спецыяльныя прадстаўнікі Фідэля Кастра. У тым, што Беларусь і Куба актывізуюць адносіны, няма ніякіх сумненняў. Перасякаючы адлегласць на 9 000 кіламетраў, бакі чарговы раз пацвярджаюць: для партнёрства перашкод не існуе. У маі нашу краіну наведвала дэлегацыя Кубы на чале з намеснікам старшыні Дзяржсавета гэтай краіны. І вось ізноў сустрэча на вышэйшым узроўні. Мінск і Гавана - партнёры не толькі палітычныя і эканамічныя. Паміж краінамі заўсёды былі і застаюцца добрыя сяброўскія адносіны. Тое, што ў супрацоўніцтве няма закрытых тэм, бакі пацвердзілі і сёння. Падрабязнасці - у Аляксея Адашкіна.
І месяца не прайшло з таго часу, як высокапастаўленая дэлегацыя Кубы на чале з фактычна другой афіцыйнай асобай дзяржавы наведала Беларусь. Віцэ-прэзідэнт Вострава свабоды выказаў тады жаданне, каб наша краіна стала сур'ёзным гульцом у інфраструктурным і сацыяльным развіцці Кубы. І вось сёння ў Палацы Незалежнасці - зноў госці з-за акіяна. Спецыяльныя прадстаўнікі Фідэля Кастра прыляцелі ў Мінск, каб больш дэталёва абмеркаваць двухбаковыя сяброўскія і выгадныя адносіны паміж дзвюма краінамі.
У планах - шматмільённыя кантракты на закупку тэхнікі мінскай вытворчасці. На Кубе добра знаёмыя з МАЗамі і трактарамі МТЗ. Менавіта гэтыя прадпрыемствы збіраюцца адкрыць свае прадстаўніцтвы ў Гаване. Тавараабарот з Востравам свабоды ў 2015 годзе атрымалася амаль падвоіць. Прычым беларускі экспарт вырас амаль утрая. Каб утрымаць гэтую планку, у пачатку мая ў Гаване правяла першую сустрэчу беларуска-кубінская камісія па супрацоўніцтве. Усе перспектыўныя праекты прапісалі ў праграме на наступныя 2 гады. Зараз час рэалізоўваць задуманае на практыцы. Сёння ў Палацы Незалежнасці Прэзідэнт Беларусі правёў перамовы адразу з двума памочнікамі Фідэля Кастра.
Раней перашкодай для актыўнага ўзаемадзеяння была нізкая плацежаздольнасць Кубы. Аднак атрымалася знайсці рашэнне гэтай праблемы. Крэдытаванне беларускага экспарту і сустрэчныя пастаўкі - гэта новыя формулы прасоўвання за акіян. Год таму наш Банк развіцця і Знешні банк Кубы падпісалі пагадненне аб умовах выдачы экспартных пазык для набыцця беларускіх тавараў.
Зараз вядуцца перамовы аб адкрыцці новай крэдытнай лініі. Распрацоўваюцца пастаўкі нашых станкоў, трактароў і рухавікоў ММЗ. Перспектыўным з'яўляецца і супрацоўніцтва ў сферы навукі. Куба валодае адной з лепшых медыцын у свеце. Акрамя таго, і ў даследаваннях сельскай гаспадаркі на Востраве свадобы дамагліся добрых вынікаў. У прыватнасці, беларускім селекцыянерам цікавыя напрацоўкі кубінскіх навукоўцаў у вырошчванні розных відаў культур, у тым ліку пшаніцы ў засушлівых умовах і на бедных глебах.
Куба актыўна развівае сельскую гаспадарку. Гэта выгадная ніша для беларускай прамысловасці. Акрамя таго, здыманне блакады з боку ЗША павінна актывізаваць эканоміку вострава. Кубе, апроч сельгастэхнікі, патрэбныя і ўгнаенні, і станкі, і харчовыя тавары. У гэтым бачная добрая перспектыва для беларускіх экспарцёраў. Спецыяльныя прадстаўнікі Фідэля Кастра сёння наведалі адно з лепшых беларускіх сельгаспрадпрыемстваў - "Азярыцкі-Агра". Тут вырошчваюць збожжа і атрымліваюць малако. Перадавы вопыт і тэхналогіі гэтай гаспадаркі цалкам могуць знайсці ўжыванне і за акіянам.
Адсутнасць праблем у палітычных адносінах Мінска і Гаваны - яшчэ адзін важны стымул для супрацоўніцтва. Рэспублікі падтрымліваюць адна адну ў ААН, Руху недалучэння і іншых міжнародных арганізацыях. Падабенства поглядаў і жыццёвых прынцыпаў аб'ядноўваюць не толькі ўлады дзвюх дзяржаў, але і народы.
Нягледзячы на амаль 9 000 кіламетраў, якія падзяляюць краіны, для шматлікіх кубінцаў Беларусь стала другой радзімай. Ажыццявіць кубінскую мару Хаўер Эстрада змог менавіта ў Беларусі. Лацінаамерыканец з музычным прозвішчам жыве ў беларускай вёсцы ўжо шэсць гадоў. Востраў у акіяне прамяняў на краіну азёр. Ажаніўся з гамяльчанкай і з'ехаў разам з жонкай на яе радзіму. Працаваў механізатарам, зараз працуе вадзіцелем.
Хаўер вяртацца на радзіму не плануе. Занадта шмат чаго яго зараз злучае з Беларуссю. Сіньёр Эстрада прызнаецца, што хацеў бы, каб ужо дзве родныя яму краіны працягвалі курс на збліжэнне, нягледзячы на геаграфічную адлегласць.
Беларусь і Куба абмяркоўваюць пераход ад гандлю да прамысловай кааперацыі. Перспектыўныя праекты - гэта сумесная вытворчасць аўтакампанентаў на востраве для МАЗаў і зборка сельгастэхнікі. Куба таксама гатовая пераняць наш вопыт па адраджэнні сяла і стварэнні новага - IT-сектара - у эканоміцы.
