Гэтая дамоўленасць стала, бадай, галоўнай сёння на сустрэчы Аляксандра Лукашэнкі са старшынёй Сходу ісламскага савета гэтай краіны. Нас звязваюць не толькі сяброўскія адносіны, але і цесныя гандлёвыя кантакты. Сёння іранскія кампаніі інвестуюць у Беларусь больш за 700 мільёнаў долараў. Таксама планавалася сумесная здабыча нафты і газу, апрацоўка іранскіх алмазаў. Але летась тавараабарот паміж краінамі ўпаў, а рэалізацыя асобных праектаў прыпынілася.
Ці адновіць цяперашні візіт ранейшы ўзровень узаемадзеяння - аб гэтым Дар'я Белавусава-Пятроўская. Дыпламатычным адносінам Беларусі і Ірана больш за 20 гадоў. У 2010 - 2012 гадах штогадовы тавараабарот паміж краінамі перавышаў 100 мільёнаў долараў ЗША. Прычым, дамінаваў беларускі экспарт. Але ў 2013 годзе ЗША і ЕС увялі жорсткія эканамічныя санкцыі ў дачыненні Тэгерана. І эканамічнае супрацоўніцтва паміж краінамі знізілася.
Выйсці на ранейшы ўзровень узаемнага гандлю павінен дапамагчы сённяшні афіцыйны візіт дэлегацыі Ірана ў Беларусь. На сустрэчы са старшынёй Сходу ісламскага савета Алі Ларыджані Аляксандр Лукашэнка падкрэсліў: у нашых краін каласальныя магчымасці. І Іран для нас заўсёды перспектыўны партнёр.
Алі Ларыджані, старшыня Сходу ісламскага савета Ірана: Усім відаць, што адносіны паміж Беларуссю і Іранам у апошні час маюць добрую дынаміку наперад. Беларусь - гэта добры сябар і партнёр. У Іране зараз новы ўрад. І я ўпэўнены, што і ўрад, і парламент Ірана працягнуць развіваць адносіны паміж краінамі ва ўсіх сферах. Паміж намі існуюць моцныя палітычныя і эканамічныя сувязі. Мы паважаем вашу стабільнасць у адносінах. І вельмі важна, каб у эканоміцы мы знайшлі новыя шляхі супрацоўніцтва.
Сёння іранскія кампаніі інвестуюць у Беларусь больш як 700 мільёнаў долараў. Сярод знакавых праектаў - будаўніцтва адразу некалькіх гасцініц, буйных гандлёва-забаўляльнага і лагістычнага цэнтраў. Апошні раскінецца на 200 тысячах квадратных метрах. Аб'ект, які ўключае 14 складоў, звышсучасны. Пяціяруснае захоўванне сэканоміць плошчы, а значыць, сур'ёзна знізіць памер арэнды і сабекошт прадукцыі. Выкананы з унікальных матэрыялаў каркас будынка гарантуе якасць захоўвання, што забяспечыць яго поўную загрузку.
Новыя сумесныя эканамічныя праекты іранская дэлегацыя сёння абмяркоўвала і ў Доме ўрада на сустрэчы з прэм'ер-міністрам Міхаілам Мясніковічам, аб супрацоўніцтве міжпарламенцкім гаварылі ўжо ў Савеце Рэспублікі. Гаворка ішла і аб пашырэнні культурных сувязяў, сумесных адукацыйных праграмах. Тут ужо ёсць напрацоўкі. Напрыклад, у педагагічным універсітэце імя Максіма Танка зусім хутка адкрыецца кабінет іраназнаўства.
Перспектывы двухбаковага супрацоўніцтва Алі Ларыджані сёння абмеркаваў на сустрэчы з міністрам замежных спраў Беларусі Уладзімірам Макеем. Гаварылі аб актывізацыі палітычнага дыялогу паміж краінамі, самых актуальных міжнародных праблемах.
Ужо ў завяршэнні дня дэлегацыя Ірана адправілася на плошчу Перамогі, дзе ўсклала кветкі да падножжа манумента - як сведчанне сяброўства і павагі да гісторыі нашай краіны.