Беларусь гатовая да цеснага супрацоўніцтва са Шры-Ланкой, а праз яе з іншымі дзяржавамі рэгіёну. Пра гэта сёння заявіў Прэзідэнт Беларусі Аляксандр Лукашэнка на сустрэчы са сваім ланкійскім калегам Махіндам Раджапаксам. Асаблівая цікавасць у ланкійцаў да нашай машынабудаўнічай класікі. Сёння падчас перамоў два прэзідэнты дамовіліся стварыць пляцоўкі па выпуску беларускай тэхнікі ў Шры-Ланцы. Дзякуючы асабліваму падатковаму рэжыму і зоне свабоднага гандлю з Індыяй, Бангладэш і Лаосам астраўная дзяржава можа стаць добрай пляцоўкай для гандлю на паўднёваазіяцкім рынку. Гаварылі сёння і пра новы кірунак узаемадзеяння - турызм. Бакі абмеркавалі магчымасць адкрыцця прамога авіярэйсу паміж краінамі. Як эканоміка перамагае геаграфію, распавядзе Сяргей Хамянтоўскі.
За 13 гадоў дыпламатычных адносін паміж Беларуссю і Шры-Ланкой гэта першая сустрэча прэзідэнтаў дзвюх краін. Без сумнення - момант гістарычны.
Першы візіт з нацыянальным ланкійскім каларытам. На перамовы Махінда Раджапакса прыбыў у белым саронгу. На шыі курахан саатакая - бардовы шалік, сімвал прэзідэнцкай сям'і. Чырвоная дарожка, рота ганаровай варты і гімны дзвюх краін. Нягледзячы на не зусім ланкійскае надвор'е, высокаму госцю Беларусь аказвае цёплы прыём.
Паміж Мінскам і Каломба 7 тысяч кіламетраў. Шры-Ланка для нас партнёр экзатычны, праўда, ад гэтага не менш перспектыўны. Стрымаць супрацоўніцтва кіламетры не павінны, упэўнены Аляксандр Лукашэнка. Па выніках мінулага года дзве краіны нагандлявалі на 46 мільёнаў долараў, 35 з іх - экспарт беларускі. Цікава, але гандаль дзвюх краін робяць усяго толькі два тавары. Калій з нашага боку, са Шры-Ланкі чай.
На сустрэчы ў вузкім складзе Аляксандр Лукашэнка заяўляе аб зацікаўленасці ў развіцці цеснага супрацоўніцтва са Шры-Ланкой, а праз яе і з іншымі дзяржавамі рэгіёну.
Махінда Раджапакса, Прэзідэнт Рэспублікі Шры-Ланка: Па-першае, хачу падзякаваць вам, спадар Прэзідэнт, ад сябе і ад імя ўсёй дэлегацыі за такі сардэчны прыём, які нам аказалі тут, на беларускай зямлі. Я з'яўляюся першым прэзідэнтам Шры-Ланкі, які наведвае вашу краіну. І я дзякую за гэтую магчымасць быць тут і гутарыць з вамі асабіста. Я цалкам згодны з вашымі словамі, калі ў краіне няма міру, тады і немагчымы прагрэс. У маёй краіне амаль 30 гадоў быў унутраны канфлікт, мы з-за гэтага вельмі пацярпелі. Але сёння ў краіне мір, ідзе развіццё ўсіх рэгіёнаў. Мы з вялікай павагай ставімся да прагрэсу ў вашай дзяржаве. Адносіны паміж нашымі краінамі сапраўды сяброўскія. Мы і далей павінны рабіць крокі ў гэтым кірунку, каб паміж нашымі народамі ўсталяваўся нейкі мост. Мы павінны заняць вызначаныя пазіцыі на міжнароднай арэне.
У Беларусі і Шры-Ланцы усё пачыналася з палітыкі. Дзве краіны дагэтуль актыўна падтрымліваюць адна адну на міжнароднай арэне.
Пад палітыку трэба падвесці эканамічную базу. Надышоў час. Ад беларусаў ланкійцы чакаюць тэхналогій. Адкрыццю вытворчых пляцовак Махінда Раджапакса абяцае зялёнае святло. Асаблівая цікавасць у ланкійскага кіраўніцтва да беларускай машынабудаўнічай класікі. Тры гады таму ў Шры-Ланцы адкрыты новы і самы глыбокі порт Паўднёвай Азіі, побач міжнародны аэрапорт. Дзякуючы асабліваму падатковаму рэжыму і зоне свабоднагаа гандлю з Індыяй, Бангладэш і Лаосам астраўная дзяржава можа стаць для беларускіх экспарцёраў добрай пляцоўкай для гандлю на паўднёваазіяцкім рынку.
У сваю чаргу Мінск зацікаўлены ў інвестыцыях з боку ланкійскіх бізнесменаў. З улікам удзелу Беларусі ў Мытным саюзе і ЕЭП з Расіяй і Казахстанам выгаднасць такіх інвестыцый відавочная.
Махінда Раджапакса, Прэзідэнт Рэспублікі Шры-Ланка: Цяперашні візіт - першы ў гісторыі двухбаковых адносін Беларусі і Шры-Ланкі. Ён пацвярджае зацікаўленасць абедзвюх дзяржаў ва ўмацаванні ўзаемавыгадных кантактаў.
У краін ёсць значны патэнцыял у развіцці адносін у шматлікіх галінах. Гаворачы аб супрацоўніцтве ў ваенна-тэхнічнай сферы, Аляксандр Лукашэнка адзначыў, што закрытых тэм у адносінах няма. Беларусь будзе і далей аказваць падтрымку ў падрыхтоўцы спецыялістаў. У пашане ў ланкійцаў беларуская медыцынская адукацыя. Сёння ў краіне навучаюцца 262 студэнты з гэтай азіяцкай краіны, і лічба будзе расці.
Па выніках перамоў на вышэйшым узроўні бакі падпісалі 8 міжнародных дакументаў аб супрацоўніцтве па розных кірунках. Прэзідэнты Беларусі і Шры-Ланкі ў сумеснай заяве выказалі гатоўнасць супрацоўніцтва пашыраць.
Першы візіт прэзідэнта Шры-Ланкі ў Беларусь можа мець выключнае значэнне для ўмацавання беларускіх пазіцый на новым рынку. Калі зусім нядаўна беларусы адкрывалі для сябе Лацінскую Амерыку, то гэтым разам сур'ёзна і надоўга прыйшлі ў азіяцкі рэгіён.
Махінда Раджапакса, Прэзідэнт Рэспублікі Шры-Ланка: Я ўскладваю вялікія надзеі на перамовы дэлегацыі бізнесменаў, якія суправаджаюць мяне падчас візіту. Спадзяюся, дзелавыя людзі дзвюх краін змогуць усталяваць адносіны для далейшага развіцця кантактаў. Беларусь дасягнула высокага ўзроўню эканамічнага развіцця, які адзначаецца на міжнародным узроўні. І ў гэтым немалая Ваша заслуга, спадар Прэзідэнт. Я прыехаў у Мінск як сябар вашай краіны і хачу запэўніць у рашучым намеры Шры-Ланкі развіваць усебаковыя адносіны з Беларуссю.
Выхад на рынак Шры-Ланкі адкрывае для Беларусі добрыя перспектывы наконт доўгатэрміновай прысутнасці ў рэгіёне. Няцяжка здагадацца, што беларускія тавары, трапляючы ў Шры-Ланку, дзякуючы зоне свабоднага гандлю з Індыяй і Бангладэш бесперашкодна пранікаюць на рынак з насельніцтвам у паўтара мільярда чалавек.
.
