Лідары правялі перамовы ў вузкім і пашыраным фарматах. На парадку дня былі 23 пытанні: у прыватнасці, ён уключаў падвядзенне вынікаў года пад старшынствам Казахстана, агульную дэкларацыю і заяву аб скаардынаваных мерах у дачыненні ўдзельнікаў тэрарыстычных фарміраванняў. Саюзнікі зацвердзілі статусы назіральнікаў і партнёраў АДКБ - гэта пашырыць магчымасці арганізацыі на міжнароднай арэне. Дарэчы, гэтая ініцыятыва была агучаная летась нашай краінай у перыяд яе старшынства. У прыярытэтах таксама - мадэрнізацыя структуры кіравання АДКБ і Калектыўных сіл аператыўнага рэагавання. Кіраўнікі дзяржаў прынялі рашэнне аб палажэнні аб Цэнтры крызіснага рэагавання АДКБ. Дакументам вызначаныя арганізацыйныя і прававыя асновы дзейнасці гэтай структуры. Абмеркавалі і актуальныя праблемы міжнароднай і рэгіянальнай бяспекі. Зацверджаная стратэгія па барацьбе з незаконнай міграцыяй да 2025 года. Старшынства ў арганізацыі на наступны год пераходзіць Кыргызстану.
Нурсултан Назарбаеў, прэзідэнт Казахстана: "Падчас першай часткі сесіі мы правялі грунтоўны абмен меркаваннямі па дзейнасці АДКБ у кантэксце забеспячэння міжнароднай і рэгіянальнай бяспекі. Па ўсіх пытаннях парадку дня дасягнута паразуменне. Казахстан разглядае АДКБ у якасці аўтарытэтнай і эфектыўнай структуры. Пры актыўнай і ўсебаковай падтрымцы дзяржаў - членаў арганізацыі былі паспяхова рэалізаваныя прыярытэты Казахстана ў перыяд старшынства".
Не вырашылася адна з галоўных інтрыг саміту - пасада генеральнага сакратара арганізацыі па-ранейшаму вакантная. Рашэнне аб прызначэнні новага галоўнага сілавіка АДКБ адклалі да наступнай сустрэчы прэзідэнтаў - яна павінна адбыцца ў снежні ў Санкт-Пецярбургу. Па выніках саміту ў Астане кіраўнікі дзяржаў падпісалі шэраг міжнародных дакументаў.
