Працягваецца афіцыйны візіт Прэзідэнта Беларусі ў Пакістан. Учора Кіраўнік дзяржавы сустрэўся з прэм'ер-міністрам гэтай краіны.
Гутаркі прайшлі ў вузкім і пашыраным складзе. Як адзначыў Аляксандр Лукашэнка, Мінск і Ісламабад плануюць выходзіць на цесную кааперацыю з трэцімі краінамі. Прыклад таму - кітайска-пакістанскі эканамічны калідор - ён звяжа дзве дзяржавы сеткай аўтамабільных дарог і чыгунак, газа- і нафтаправодаў. Бакі абмеркавалі і магчымасці стварэння сумесных прадпрыемстваў у харчовай сферы. Вынік - паўтара дзясятка падпісаных міжнародных дакументаў у сферах гандлю, навукі, транспарту, адукацыі.
Перспектыўнасць інвестыцыйнага супрацоўніцтва Беларусі і Пакістана Аляксандр Лукашэнка адзначыў на адкрыцці бізнес-форуму. Прэзідэнт падкрэсліў, што Мінск можа стаць для Ісламабада зручным акном у Еўропу. Кіраўнік дзяржавы нагадаў пра беларуска-кітайскі праект - міжнародны індустрыяльны парк "Вялікі камень". Аляксандр Лукашэнка заклікаў бізнесменаў больш шырока выкарыстоўваць прамысловыя магчымасці Беларусі.
На фінішы насычанага перагаворнага дня прайшла сустрэча двух лідараў - Аляксандра Лукашэнкі і Мамнуна Хусейна. Прэзідэнт Беларусі ўпэўнены, што ўзаемадзеянне з Пакістанам выйдзе на ўзровень палітычных адносін. У сваю чаргу Мамнун Хусейн падкрэсліў, што візіт Аляксандра Лукашэнкі ўмацуе не толькі гандлёва-эканамічныя кантакты, але і ўзаемадзеянне ў навуковай, культурнай, адукацыйнай сферах. А крыху пазней поціскі рукі са спікерам Нацыянальнай асамблеі парламента ісламскай рэспублікі. Сардар Аяз Садзік і Аляксандр Лукашэнка правялі шчырую гутарку.
