Яшчэ адна арганізацыя ў Еўропе, якая часта выбірае Беларусь у якасці пляцоўкі для дыялогу, - Парламенцкая асамблея АБСЕ. Сёння Аляксандр Лукашэнка сустрэўся з яе старшынёй Георгіем Цэрэтэлі. Прэзідэнт адзначыў, што шмат у чым менавіта ад безыніціятыўнасці шэрагу дзяржаў - членаў АБСЕ ў зоне прамой адказнасці Арганізацыі не вырашаюцца замарожаныя канфлікты ў Нагорным Карабаху і Прыднястроўі, а наадварот, з'яўляюцца новыя - напрыклад, ва Украіне. АБСЕ, паводле слоў Прэзідэнта, заўсёды можа абаперціся на сумленную і шчырую пазіцыю Беларусі ў любым канфлікце і разлічваць на падтрымку ў яго пераадоленні. Аднак першым крокам павінна стаць сустрэча на вышэйшым узроўні ў фармаце АБСЕ. Яна магла б сур'ёзна прасунуць кантынент на шляху ўстанаўлення міру.
Старшыня Парламенцкай асамблеі АБСЕ адзначыў значны ўклад Беларусі ў рашэнне ключавых праблем рэгіёна. Толькі за апошнія гады Беларусь распрацавала і дамаглася прыняцця цэлага пакета рэзалюцый для зняцця напружанасці - ад барацьбы з гандлем людзьмі і новымі псіхатропамі да развіцця зялёнай энергетыкі і лічбавай эканомікі. Вельмі актуальнай у АБСЕ лічаць ініцыятыву Прэзідэнта Беларусі па перазагрузцы Хельсінскага працэсу. У канцы мінулага стагоддзя менавіта ён дапамог Еўропе выйсці з халоднай вайны з мінімальнымі стратамі.
Георгій Цэрэтэлі, Старшыня Парламенцкай асамблеі АБСЕ: "АБСЕ бачыць Беларусь як вельмі важнага партнёра ў тым, што датычыцца выканання мэт і асноўных прынцыпаў Хельсінкскага працэсу. Я рады бачыць, што Прэзідэнт падтрымлівае прынцыпы Хельсінкскага працэсу, якія зараз парушаюцца. Вітаю ідэю, якая была выказаная Кіраўніком дзяржавы, аб неабходнасці вярнуцца да выканання прынцыпаў Хельсінкскага працэсу. На мой погляд, іх не варта радыкальна змяняць, хутчэй, важней нагадаць пра неабходнасць выконваць гэтыя прынцыпы. Яны павінны быць узмоцненыя, магчыма, за кошт прэвентыўных механізмаў".
Георгій Цэрэтэлі прыбыў у Мінск для ўдзелу ў Міжнароднай парламенцкай канферэнцыі групы падтрымкі Шаўковага шляху. Гэты глабальны для Еўразіі праект, на думку Беларусі, не толькі стварае новую эканоміку, лагістыку і інфраструктуру на ўсёй прасторы ад Шанхая да Паўднёвай Еўропы, але і дазваляе пазбегнуць палітычнай і ваеннай канфрантацыі. Канферэнцыя пад эгідай АБСЕ ў Мінску - адзін з элементаў такой стратэгіі. Чакаецца, што яе ўдзельнікі ў беларускай сталіцы не толькі распрацуюць тэарэтычныя асновы кааперацыі, але і вывучаць вопыт рэальнага ўвасаблення ідэй новага Шаўковага шляху на базе індустрыяльнага парка "Вялікі камень".
