Беларусь мае намер прыкласці максімум намаганняў для нарошчвання гандлю з Аб'яднанымі Арабскімі Эміратамі. Пра гэта сёння гаварыў Прэзідэнт Аляксандр Лукашэнка на сустрэчы з Надзвычайным і Паўнамоцным Паслом Эміратаў у Беларусі - у дыпламата заканчваецца час знаходжання ў нашай краіне. Кіраўнік дзяржавы высока ацаніў працу Мухамеда Абдалы Мухамеда аль-Гафлі і адзначыў, што дзвюм краінам удалося істотна прасунуцца ў адносінах. Нагадаем, аб гатоўнасці вывесці двухбаковыя адносіны на якасна новы ўзровень Прэзідэнт гаварыў з кіраўніцтвам Аб'яднаных Арабскіх Эміратаў у кастрычніку мінулага года, знаходзячыся з візітам у гэтай краіне. Тады была дасягнута дамоўленасць нарасціць аб'ём узаемнага гандлю да 500 мільёнаў долараў за год, а таксама ўмацаваць узаемадзеянне ў прыярытэтных сферах, такіх як сельская гаспадарка, прамысловасць, адукацыя. Гаварылі тады і аб эмірацкіх інвестыцыях. За мінулы час удалося зрабіць нямала. Аб планах на будучыню і падрабязнасцях сённяшняй сустрэчы - Сяргей Хамянтоўскі.
З 2009 года вось у гэтым сімпатычным катэджы размяшчаецца дыпмісія Аб'яднаных Арабскіх Эміратаў. Дарэчы, і назва вуліцы, дзе працуе эмірацкі пасол, гаворыць сама за сябе - "Прывабная". Адна з галоўных мэт, якую ставяць перад сабою дыпламаты з Персідскага заліва, гэта прыцягненне інвестыцый у Беларусь.
Аб'яднаныя Арабскія Эміраты - асноўны партнёр Беларусі сярод арабскіх дзяржаў Персідскага заліва. Летась дзве краіны нагандлявалі на 70 мільёнаў долараў. У параўнанні з 2012 рост двухразовы.
Адносіны Беларусі і Аб'яднаных Арабскіх Эміратаў - гэта як раз той выпадак, калі размова не толькі аб простым гандлі, хоць і гэта выгадна абодвум бакам. Летась эмірацкі бізнес інвеставаў у Беларусь амаль 100 мільёнаў долараў. Працуе 14 сумесных кампаній.
Арабскія бізнесмены высокага ўзроўню частыя госці ў Мінску. Прываблівае інвестклімат. "Вывучаць і інвеставаць" - іх галоўны прынцып.
Беларусь прыкладзе максімум намаганняў для нарошчвання гандлю з Аб'яднанымі Арабскімі Эміратамі. Гэта галоўны меседж, сказаны Прэзідэнтам на сустрэчы з паслом у нашай краіне Мухамедам Абдалой Мухамедам аль-Гафлі. У дыпламата заканчваецца трохгадовы тэрмін знаходжання ў Беларусі. Кіраўнік дзяржавы публічна даў высокую ацэнку дзейнасці пасла ў нашай краіне.
Мухамед Абдала Мухамед аль-Гафлі, Надзвычайны і Паўнамоцны Пасол ААЭ ў Беларусі: "Для мяне быў вялікі гонар прадстаўляць ААЭ ў вашай прыгожай дружалюбнай краіне. І я ні аднаго дня не адчуваў сябе тут, як у чужой дзяржаве. Мой перыяд дыпламатычнай дзейнасці ў Мінску быў вельмі актыўным дзякуючы імкненню сяброў з Беларусі і зацікаўленасці беларускага боку ў супрацоўніцтве".
Дзвюм краінам удалося істотна прасунуцца ў адносінах. Палітычныя традыцыйна былі вельмі ўстойлівымі, а для нарошчвання гандлёвых і фінансавых сувязяў Беларусь і Арабскія Эміраты змаглі стварыць трывалы фундамент. Пакуль ён складае сціплыя 70 мільёнаў долараў. Задача - дасягнуць тавараабароту ў паўмільярда долараў. Кіраўнік дзяржавы настойвае на больш актыўнай рэалізацыі дарожнай карты супрацоўніцтва.
Мухамед Абдала Мухамед аль-Гафлі, Надзвычайны і Паўнамоцны Пасол ААЭ ў Беларусі: "Эмірацкі бок дэталёва працуе над рэалізацыяй дамоўленасцяў паміж лідарамі дзвюх краін. Нашы бізнесмены будуць больш актыўна інвеставаць у Беларусь. Я не сумняваюся, што ўзровень узаемнага тавараабароту ў 500 мільёнаў долараў, як і дамаўляліся лідары дзвюх дзяржаў, будзе дасягнуты".
Даверныя і нават сяброўскія адносіны паміж кіраўнікамі Беларусі і Эміратаў ствараюць добрую аснову для прасоўвання беларускіх тавараў на адзін з самых плацежаздольных рынкаў свету.
Эксперты гавораць, што Аб'яднаныя Арабскія Эміраты сталі пунктам апоры ў рэгіёне і плацдармам для прасоўвання нашых экспарцёраў на рынак краін Персідскага заліва.
Адносіны паміж краінамі не абмяжоўваюцца сёння толькі эканомікай. Супрацоўніцтва мацнее і народнай дыпламатыяй. Да нас едуць вучыцца, заводзяць сем'і, застаюцца жыць і працаваць.
Сённяшняя сустрэча пацвердзіла, што Беларусь не толькі стратэгічна важны партнёр Аб'яднаных Арабскіх Эміратаў, але і сябар, у дыялогу з якім няма закрытых тэм.
