Умовы для беларускіх свабодных эканамічных зон на рынку Еўразійскага эканамічнага саюза трэба зрабіць як мінімум раўнацэннымі. Пра гэта Прэзідэнт Аляксандр Лукашэнка заявіў сёння на нарадзе наконт развіцця СЭЗ.
З 1 студзеня ўмовы працы рэзідэнтаў свабодных эканамічных зон істотна змяняюцца. Прынятыя ў рамках ЕАЭС дакументы касуюць некаторыя мытныя льготы. У гэтай сувязі ўрад падрыхтаваў праект указу, дзе адлюстраваныя прапановы для павышэння інвестпрывабнасці СЭЗ і стымулявання актыўнасці рэзідэнтаў. Сярод іх - вызваленне ад арэнднай платы за зямельныя ўчасткі да канца 2019 года, паніжэнне парогу аб'ёму інвестыцый пры рэгістрацыі ў СЭЗ з аднаго да паўмільёна еўра і пашырэнне меж СЭЗ - Брэст, Віцебск і Гроднаінвест. Цяперашнюю аддачу ад працы СЭЗ у Беларусі Кіраўнік дзяржавы назваў недастатковай. Аляксандр Лукашэнка падкрэсліў, што і ў плане прытоку інвестыцый няма чаканага выніку.
Падрабязнасцямі больш як двухгадзіннай дыскусіі з журналістамі падзяліўся міністр эканомікі Уладзімір Зіноўскі. Ініцыятывы ўрада Кіраўнік дзяржавы падтрымаў, акрамя таго, рэзідэнтам свабодных эканамічных зон падоўжаныя тэрміны прэферэнцый.
Сёння ў Беларусі дзейнічаюць 6 свабодных эканамічных зон. Рэзідэнты - амаль паўтысячы арганізацый, у якіх працуюць 124 000 чалавек. Гэта 4,3% ад колькасці занятых у эканоміцы краіны. Тэмп росту выпуску прампрадукцыі ў СЭЗ значна перавышае сярэднерэспубліканскі ўзровень. За 9 месяцаў года аб'ём вытворчасці склаў больш за 7,5 мільярда рублёў, у параўнанні з аналагічным перыядам мінулага года павялічыўся на 24%.