Прэзідэнт Беларусі Аляксандр Лукашэнка ў Пекіне прыняў удзел у II Форуме міжнароднага супрацоўніцтва "Пояс і шлях". Больш як пяць гадоў прайшло з моманту абвяшчэння Кітаем аднайменнай ініцыятывы - платформы для супрацоўніцтва. Беларусь адна з першых ацаніла і падтрымала ідэю кіраўніцтва Паднябеснай па стварэнні транснацыянальных гандлёвых калідораў. І сёння наша краіна стала галоўным еўрапейскім лагістычным хабам у рамках кітайскай ініцыятывы.
Аляксандр Лукашэнка сёння прыняў удзел у рабоце сесіі на вышэйшым узроўні. У сваім выступленні Прэзідэнт прадставіў прапановы беларускага боку па развіцці глабальнай ініцыятывы і паглыбленні супрацоўніцтва на еўразійскай прасторы з акцэнтам на стварэнні раўнапраўнай і празрыстай сістэмы міжнароднага гандлю. Беларускі лідар заклікаў да каардынацыі дзеянняў краін - удзельніц ініцыятывы "Пояс і шлях", каб максімальна садзейнічаць пашырэнню эканамічнага супрацоўніцтва і зняццю бар'ераў.
У Пекін гэтымі днямі прыехалі кіраўнікі дзяржаў і ўрадаў з 40 краін, у тым ліку з Азіі, Афрыкі, Еўропы, Лацінскай Амерыкі. Таму многія палітыкі выкарыстоўваюць гэтую магчымасць, каб правесці двухбаковыя перамовы. Напярэдадні ў Аляксандра Лукашэнкі ўжо адбылася сустрэча з вышэйшым кіраўніцтвам Кітая і Прэзідэнтам Узбекістана, а сёння і з Прэзідэнтам Сербіі Аляксандрам Вучычам. Паміж краінамі склаліся трывалыя палітычныя адносіны. Такі ж высокі ўзровень трэба надаць і эканоміцы. Летась узаемны тавараабарот склаў 148 мільёнаў долараў. Новыя напрамкі ўзаемадзеяння і перспектыўныя праекты бакі абмяркуюць падчас візіту Аляксандра Лукашэнкі ў Сербію. Зараз фарміруецца яго праграма.
Чакаецца, што на палях форуму "Пояс і шлях" у Аляксандра Лукашэнкі адбудзецца і шэраг іншых сустрэч. Да саміту прыкавана вялікая ўвага прэсы. Міжнародны медыяцэнтр падобны да вялікага інтэрнацыянальнага мурашніка. Менавіта адсюль журналісты сочаць за заявамі палітыкаў. На гэты час больш як 150 краін і міжнародных арганізацый падпісалі з Кітаем пагадненні аб сумеснай рэалізацыі ініцыятывы "Адзін пояс і адзін шлях".