Аляксандр Лукашэнка прыняў даверчыя граматы ад новых кіраўнікоў дыпламатычных місій у Беларусі

2 Кастрычніка 2017

Прэзідэнт Аляксандр Лукашэнка сёння прыняў даверчыя граматы ад новых кіраўнікоў дыпламатычных місій у Беларусі. У Палацы Незалежнасці сабраліся 11 прадстаўнікоў краін Еўропы, Азіі, Афрыкі і Паўднёвай Амерыкі. Для кожнага дыпламата ў Аляксандра Лукашэнкі асобнае пажаданне. Але галоўная аб'яднаўчая ідэя - афіцыйны Мінск заўсёды адкрыты для ўсіх партнёраў і гатовы да любых узаемавыгадных праектаў. Сёлета беларуская сталіца прымала два важныя міжнародныя форумы: сустрэчу міністраў замежных спраў Цэнтральна-Еўрапейскай ініцыятывы, дзе Беларусь упершыню старшынствуе, і сесію Парламенцкай асамблеі Арганізацыі па бяспецы і супрацоўніцтве ў Еўропе. Гэта эфектыўная пляцоўка для ўмацавання стабільнасці і бяспекі ў рэгіёне. Тым больш актуальнай бачыцца ініцыятыва беларускага лідара адмовіцца ад геапалітычнага суперніцтва і пашырыць еўрапейскую арганізацыю. Праект "Хельсінкі-2" мог бы стаць глабальнай дыскусійнай структурай.

Як заявіў сёння Аляксандр Лукашэнка, афіцыйны Мінск зацікаўлены ў тым, каб гэтая ініцыятыва была рэалізаваная.

Сёлетні год для беларускай дыпламатыі асаблівы - большасць дыпадносінаў Беларусь наладзіла 25 гадоў таму. І гэтыя чвэрць стагоддзя - сур'ёзны падмурак і для палітыкі, і для эканомікі. Сёння краіна падтрымлівае гандлёвыя адносіны з больш чым 190 дзяржавамі. Найважнейшыя экспартныя пазіцыі - нафта, калійныя ўгнаенні, грузавыя і легкавыя аўтамабілі, трактары, шыны, мэбля, малочная і мясная прадукцыя. Зрэшты, як сёння чарговы раз падкрэсліў Кіраўнік дзяржавы, Беларусь гатова развіваць супрацоўніцтва з краінамі на ўсіх кантынентах на аснове ўзаемапавагі і балансу інтарэсаў. Палітычныя, эканамічныя і гуманітарныя сувязі мы маем намер умацоўваць паміж краінамі і рознымі інтэграцыйнымі аб'яднаннямі як на Захадзе, так і на Усходзе.