Падчас рабочай паездкі ёсць магчымасць ацаніць сацыяльна-эканамічнае развіццё рэгіёна ў цэлым. Прэзідэнта цікавіла не толькі праца над знакавымі праектамі, але і паказчыкі вытворчай сферы. Аляксандр Лукашэнка наведаў завод "Гомсельмаш", дзе ішла размова аб перспектывах развіцця прадпрыемства. Яго Кіраўнік дзяржавы назваў няйначай як народным набыткам. Найбліжэйшыя гады будуць не самымі простымі для прамыслоўцаў - трэба выстаяць, павышаючы якасць і хутчэй вырабляючы новыя мадэлі тэхнікі. Прэзідэнт даручаў да цяперашняга аграрнага сезона паказаць у працы новы сучасны суперкамбайн, які не будзе саступаць сусветным аналагам, але будзе каштаваць больш танна. Такі экзэмпляр ужо сышоў з канвеера гэтым летам. Навінкі, павышэнне надзейнасці машын, пошук новых рынкаў збыту - усё гэта разам дазволіць забяспечыць устойлівую працу завода. Прадоўжыць Андрэй Крывашэеў.
Генадзь Кот - хлебароб са стажам у чвэрць стагоддзя. Прадаўжальнік дынастыі. Асабіста адкатаў 5 пакаленняў камбайнаў. Гаворыць, гэты - самы лепшы. Так, складаная электроніка, але асвоіў за 10 хвілін. Мадэль класа "люкс". Шумаізаляцыйная кабіна, клімат-кантроль, магнітола, мікрахвалёўка і нават халадзільнік. Часам машына можа абыходзіцца і без механізатара. Аўтапілот, як у спарткары, уручную толькі разварочваецца.
Гэтая машына сёння на верхняй прыступцы мадэльнага раду. Да стварэння суперкамбайна Беларусь і Гомсельмаш ішлі 88 гадоў. Вырашальным стала слова Прэзідэнта: зрабіце лепш за немцаў і амерыканцаў. І зрабілі. А пачыналі нават не з камбайна.
Гэта саломарэзка - першая тэхніка, якая сышла з канвеера. Нават трактароў тады не было. Цягнулі людзі і коні. Але ўжо да вайны Гомсельмаш выпускаў 26 відаў тэхнікі і вялікую частку прадаваў на экспарт.
Сёння Гомсельмаш на палях усіх кантынентаў планеты. За апошнія пару гадоў засвоеныя экзатычныя для Беларусі Эфіопія, Судан і Егіпет. Кормаўборачныя "Палессе" - гэта ўжо 40% рынку далёкай Аргенціны. А яшчэ - упершыню Сахалін. Не кожны чалавек даедзе.
Далёкія рынкі - добра. У крызісны 2015-ы выратавалі калектыў менавіта дзякуючы іншым кантынентам. Свой - еўразійскі - суперканкурэнтны. Таму і патрэбныя новыя машыны з ноу-хау сусветнага ўзроўню. Напрыклад, картыраванне. Дазваляе атрымліваць карты ўраджайнасці і вільготнасці збожжа. А гэта дакладнасць уборкі і дакладныя прагнозы будучых пасяўных.
Сёння супермашыну выпрабоўваюць на высокаўраджайных палях. Тут, напрыклад, 67 цэнтнераў з гектара. Але ідэал для тэхнікі - 100-120. Хуткасць вышэйшая ўдвая - страты не больш за працэнт. Адгэтуль рэнтабельнасць і прыстаўка "супер". Гэта эмоцыя аграрыяў.
Па ўсіх параметрах машына на адным узроўні з сусветнымі лідарамі, акрамя аднаго - цаны. У 2,5 раза таннейшая. У серыйную вытворчасць камбайн пойдзе праз год, перш абкатаюць на доследных палях. Машына стане візітнай карткай, іміджавай мадэллю Гомсельмаша.
Якасць, канкурэнцыя і калектыў - тры словы, на якіх сёння стаіць Гомсельмаш. Так, дзякуючы падтрымцы выйшлі з піке 2015 года, але наперадзе гады не больш лёгкія - нядобрасумленная канкурэнцыя на асноўных рынках зашкальвае. Так, тут стварылі новую лінейку тэхнікі ад суперкамбайна да агранавінкі - 2 у 1: і трактар, і камбайн на ўвесь аграсезон. Так, захавалі калектыў: ніводнага таленавітага канструктара і спецыяліста не страцілі. Але калі сёння не дадаць у якасці, не замацавацца на новых і традыцыйных рынках і не знайсці новы, як гавораць тут, фронт прац, прадпрыемства зноў прыйдзецца ратаваць. Менавіта каб гэтага не прыйшлося рабіць паслязаўтра, Прэзідэнт прыехаў на Гомсельмаш сёння.
Поспехамі новых машын Прэзідэнт цікавіцца з парога Гомсельмаша. Гэта не проста машыны з прыстаўкай "супер" - гэта пытанне выжывання калектыву і прадпрыемства ва ўмовах суперканкурэнцыі, часта нядобрасумленнай.
Суперкамбайн Прэзідэнт абяцае выпрабаваць асабіста ўжо ў найбліжэйшыя выхадныя. А пакуль яшчэ адна навінка - машына з газаматорным рухавіком. На метане. Дазваляе эканоміць да паловы ў паліве. Запраўка ад 8 да 20 хвілін. Канструктар абяцае надзейнасць і бяспеку. Пераканаўча? Не цалкам. Прэзідэнт даручае эксперымент. Толькі навінкі на палях адной гаспадаркі Гомельшчыны на ўвесь наступны аграсезон. А там відаць будзе.
Безумоўна, у прадпрыемства ёсць і праблемы. Аб гэтым - у дакладзе гендырэктара холдынга. Напрыклад, патрэбная гарантыя дзяржавы пад 3 інвестпраекты. Прэзідэнт патрабуе гарантый звароту грошай і ад самога Гомсельмаша. Яшчэ - даўгі за ўжо пастаўленую тэхніку. Лідар прапаноўвае не наракаць на дылераў, калі трэба мяняць іх і бачыць зварот кожнага ўкладзенага рубля. Канкурэнцыя і субсідыі - прасцей, чым зараз, не будзе.
Напрыклад, галоўны партнёр-канкурэнт на ўсходзе - Рассельмаш. Мала таго, што на трэць субсідзіруецца ў парушэнні норм і правіл Еўразійскага саюза, так яшчэ выштурхвае гомельскіх калегаў з усіх магчымых ніш і праектаў.
Каб у меншай ступені залежаць ад дзівацтваў знешніх рынкаў, патрэбен унутраны. Прычым не толькі новай тэхнікі. Кіраўнік дзяржавы даручае заняцца "рэанімацыяй" тэхнікі трухлявай. Такую можна знайсці практычна ў кожнай другой гаспадарцы.
Толькі за апошнія 7 гадоў Гомсельмаш выйграў ад імпартазамяшчэння больш як 2 мільярды долараў. І гэта не проста грошы - гэта працоўныя месцы і тэхналогіі для 4 сотняў пастаўшчыкоў камплектуючых. Ад гідраўлікі да навігацыі.
І гэта толькі камплектуючыя. Частка сур'ёзнай тэхнікі ў Беларусі не выраблялася зусім. Гаспадаркі захапіліся імпартам, але пастаўшчыкі літаральна "пасадзілі на іголку" паслягарантыйнага рамонту і запчастак. Адгэтуль гэткая пільная ўвага лідара да кожнай імпартазамяшчальнай навінкі.
Яшчэ адна навінка - рэвалюцыйная ў сваім класе. Замяняе і трактар, і камбайн. Кабіна паварочваецца на 180 градусаў, навясное абсталяванне дазваляе выпускаць у поле, як універсальнага працоўнага коніка. Праўда, яна такая пакуль адна ў краіне. Прэзідэнт даручае выпрабаваць ноу-хау ў рэальных умовах. Калі пойдзе і як трактар не саступіць МТЗ, і дзяржзаказ, і знешні рынак у машыны будуць.
У цэлым адчуванне ад аграгіганта ў Прэзідэнта склалася станоўчае - аб гэтым лідар гаворыць калектыву. Відаць, што завод дыхае, і гэтае дыханне глыбокае і рытмічнае - гэта значыць, здаровае. Так, Гомсельмашу дапамагла дзяржава, так, сёння падціскаюць канкурэнты, але ёсць стратэгія развіцця, а навінкі гарантуюць месца на рынках будучыні.
Роўнае развіццё холдынга - адна з прычын, чаму яго не будуць прадаваць нават самавітаму фундатару. Бо гэта народны набытак, прычым не аднаго пакалення. Галоўнае даручэнне калектыву адно - якасць, толькі так сёння можна канкурыраваць і развівацца. Падчас зносін з лідарам завадчане папрасілі аб рэкламе: Кіраўнік дзяржавы за штурвалам Гомсельмаша, ды яшчэ ў асабістай гаспадарцы - лепшае прасоўванне брэнда. Прэзідэнт аджартаваўся: задорага, ды і такія гіганты для гаспадаркі не падыходзяць. Хоць паабяцаў не толькі і надалей падтрымліваць калектыў, але і асабіста выпрабаваць суперкамбайн, плюс прымусіць Оршу выпускаць якасны інструмент. Орша, дарэчы, наступны пункт прэзідэнцкага маршруту.
Падкрэслена гаворачы Прэзідэнту "да спаткання", завадчане дораць макет новага камбайна і адкрыта прызнаюцца: гэтыя зносіны пакінулі шмат пазітыўных эмоцый. А даручэнне па якасці ўжо прынята да выканання.
Гомель даўно і па праве мянуюць аграпрамысловай сталіцай Беларусі. І не толькі таму, што мясцовыя машыны дазваляюць убіраць ураджай і даюць працу яшчэ амаль 4 сотням сумежных прадпрыемстваў. Свой хлеб, тэхналогіі, занятасць - гэта ўсе складальнікі рэальнага суверэнітэту. Таму любыя званні тут апраўданыя.
Практычна заўсёды Кіраўнік дзяржавы ў сваіх рабочых паездках мае зносіны з мясцовымі жыхарамі або рабочымі калектывамі прадпрыемстваў. Гэта добрая магчымасць атрымаць інфармацыю з першых рук - ад тых, хто больш востра і выразна бачыць і ўспрымае падзеі мясцовага значэння. Часта падчас такіх размоў прымаюцца важныя рашэнні аж да канкрэтных даручэнняў службовым асобам. Аб хвалюючых тэмах і ацэнках беларускага лідара спыталі і сёння. Вядома, адкрыццё новага корпуса сучаснай бальніцы - падзея для абласнога цэнтра. Карыстацца паслугамі, вядома, будуць і сем'і работнікаў вялізнага калектыву Гомсельмаша. Пытанне ацэнкі новабудоўлі прагучала адным з першых.
На слыху сёння і спартыўнае жыццё краіны. Па-першае гэта, вядома, відовішчны футбольны матч, які напярэдадні адбыўся на сталічным стадыёне "Дынама", дзе беларуская каманда сенсацыйна ўзяла верх над расійскім грандам. Гэтая перамога нарабіла шмат шуму і ў каляспартыўным асяроддзі. Яркі, але рэдкі прыклад таго, як парадак перамагае грошы, заўсёды дэтануе ў інфармацыйнай прасторы. Ды так, што нават тыя, хто не асабліва цікавіцца футболам, сёння ведаюць, як мінскае "Дынама" перайграла піцерскі "Зеніт". А новы галоўны стадыён краіны ўпершыню сабраў аншлаг на матчы Еўракубка. Ці будуць аншлагі праз год, калі тут жа стартуюць II Еўрапейскія гульні, наколькі статусныя ў прынцыпе гэтыя спаборніцтвы? Яшчэ адно пытанне Кіраўніку дзяржавы.
Нагадаем, Мінск прыме II Еўрапейскія гульні ў канцы чэрвеня будучага года. На спаборніцтвах будуць разыграныя дзве сотні камплектаў медалёў. Больш за 4 тысячы атлетаў з 50 краін выступяць у 15 відах спорту. У 4 відах спорту вызначацца чэмпіёны Еўропы. Яшчэ ў 10 разыгрываюць ліцэнзіі на Алімпіяду ў Токіа.
