Дамовіцца аб дакладным узаемадзеянні пагранічнікаў неабходна на пасяджэнні Вышэйшага Дзяржсавета Саюзнай дзяржавы. Сёння гэта заявіў Прэзідэнт Аляксандр Лукашэнка падчас наведвання пагранзаставы "Дзівін" Пінскага пагранатрада.
Прэзідэнту далажылі аб мерапрыемствах па ахове дзяржмяжы на гэтым участку, а таксама аб гарантаванні пагранбяспекі Беларусі ў цэлым. Пагранічная застава "Дзівін" уведзена ў эксплуатацыю летась у маі, ахоўвае ўчастак дзяржмяжы з Украінай працягласцю больш за 30 кіламетраў. Гэта сучасны высокатэхналагічны комплекс, што ўключае сістэму жыццезабеспячэння, найноўшыя ўзоры тэхнічных сродкаў аховы мяжы, аўтамабільнай тэхнікі. На ўчастку адказнасці 8 населеных пунктаў. Аляксандр Лукашэнка звярнуў увагу на стан дзяржмяжы на ўсходнім напрамку. Ёсць падстава абмеркаваць гэтае пытанне з Расіяй на маючым адбыцца пасяджэнні Вышэйшага Дзяржсавета ў Мінску.
Кіраўнік дзяржавы азнаёміўся і з узорамі тэхнікі. Некаторыя з іх выкананы па спецзаказе пагранічных войскаў. Таксама Прэзідэнту прадэманстравалі інтэграваныя сістэмы аховы і тэхналогіі анлайн-назірання за межамі дзяржавы. Ахоўваць мяжу дапамагае штучны інтэлект. Спецпрыборы аўтаматычна вызначаюць характар парушэння. Сёння ішла размова і наконт эфектыўнасці падрыхтоўкі кадраў. Аляксандр Лукашэнка адзначыў: на мяжы вайсковец атрымлівае часам больш вопыту, чым ва Узброеных сілах, таму варта скаардынаваць колькасць на карысць пагранічных войскаў.
Пасля наведвання заставы Кіраўнік дзяржавы пагутарыў з вайскоўцамі-пагранічнікамі і іх сем'ямі. На сустрэчу з Прэзідэнтам далёка ісці не прыйшлося: за хвіліну хады прама ля заставы пабудаваны жылы дом на 16 кватэр. Яго здалі летась у прамым сэнсе пад ключ. У зносінах з Прэзідэнтам адчувалася: служба ў гэтым камфортным месцы ўплывае і на баявы дух байцоў, і на настрой сваякоў. Вядома, паўплываў і той факт, што Аляксандр Лукашэнка сам служыў у гэтых мясцінах. Таму сур'ёзныя тэмы чаргаваліся з душэўнымі гісторыямі, успамінамі і перажываннямі.
Падрабязнасці рабочай паездкі Кіраўніка дзяржавы ў Брэсцкую вобласць сёння ў "Панараме".
