Усе кандыдаты на пасады ва ўрадзе пройдуць працэдуру абмеркавання і антыкарупцыйны фільтр.
Прынцыповымі для Прэзідэнта з'яўляюцца пытанні кіравальнасці на месцах і кантроль эканамічных працэсаў - у першую чаргу негатыўных. Аб гэтым сёння ішла размова на нарадзе, дзе Кіраўніку дзяржавы далажылі аб прапановах па кадравых рашэннях. Нагадаю, вакансіі ва ўрадзе з'явіліся адразу пасля рэзананснай інспекцыі Аляксандра Лукашэнкі па Аршанскім рэгіёне і сталі лагічным следствам фактычнага правалу даручэнняў беларускага лідара. У прыватнасці, сваіх пасад пазбавіліся міністры прамысловасці і архітэктуры.
Падчас нарады Прэзідэнт зрабіў акцэнт на публічнай дыскусіі вакол адставак ва ўрадзе і паабяцаў адрэагаваць на рыторыку асобных СМІ, уключаючы інтэрнэт-платформы. Даручэнне правесці падрабязны аналіз грамадскай думкі і прэс-кантэнт атрымалі адміністрацыя і прэс-служба Прэзідэнта. Аляксандр Лукашэнка не раз падкрэсліваў, што для яго важная зваротная сувязь, але ў такім прынцыповым пытанні, як камандная праца галін улады маніпуляцыі недапушчальныя.
Пры гэтым Кіраўнік дзяржавы адзначыў, што няправільна тлумачыць яго дзеянні як расправу над чыноўнікамі, хай і пагарэлымі на невыкананні даручэнняў і паказусе. У рэжыме асаблівага напружання, у які перавялі трохвугольнік Орша -Барань - Балбасава, павінны працаваць не толькі кіраўнікі, да якіх сапраўды шмат прэтэнзій, але і самі жыхары Віцебскай вобласці. Менавіта ў гэтым складаецца і логіка даручэнняў Прэзідэнта, і сутнасць асаблівага рэжыму кіравання рэгіёнам.
Нагадаем, на прыкладзе Аршанскага рэгіёна адпрацоўваецца сістэма вывядзення сярэдніх (па беларускіх мерках) гарадоў на ўстойлівае развіццё.
