Аляксандр Лукашэнка знаходзіцца з рабочай паездкай у Добрушы

Праблемы не толькі на паперы. Як удыхнуць новае жыццё ў галоўную вытворчасць Добруша? Прэзідэнт у гэтыя хвіліны з рабочай паездкай у Гомельскай вобласці.

У цэнтры ўвагі - інвестпраект па пераабсталяванні папяровай фабрыкі "Герой працы". Адно з найстарэйшых прадпрыемстваў галіны сёлета адзначыць сваё 150-годдзе. Задачай укараніць тут самыя сучасныя стандарты задаліся ўжо даўно. Але стварэнне вытворчасці мелаваных і немелаваных відаў кардону так і не было даведзена да канца. Усе тэрміны заканчэння работ мінулі яшчэ ў 2015. Генпадрадчык не выканаў абавязацельствы, і кантракт з ім быў скасаваны. Дагэтуль лініі не запушчаныя, і аналагічную прадукцыю прыходзіцца закупляць за мяжой. А гэта выдаткі на 100 мільёнаў долараў штогод. Свая ж вытворчасць дабудавана на 90 працэнтаў. І каб завяршыць, патрэбныя 83 мільёны долараў. Буйная еўрапейская кампанія гатовая ўзяцца за пуск і наладку абсталявання. Выконваць яе будуць асобнымі комплексамі. Прэзідэнт зазначыў, што і старыя плошчы вялікага завода таксама можна выкарыстаць пад імпартазамяшчальную вытворчасць. Адзін з варыянтаў - выпуск актуальнага і экалагічнага кардоннага пакавання. 

Запуск завода зойме прыкладна 12 месяцаў

Да канца года комплекс ужо ўвядуць у эксплуатацыю і атрымаюць таварную прадукцыю. Аб'ём вытворчасці складзе 200 000 тон кардону за год. Паводле разлікаў спецыялістаў, 30 працэнтаў новай прадукцыі будзе ісці на ўнутраныя патрэбы, 70 - на экспарт. Патэнцыяльныя пакупнікі ўжо ёсць. Вытворчасць унікальная для постсавецкай прасторы. Канкурэнтаў на гэтым рынку ў Беларусі не будзе.

Карупцыя ў цукровай галіне стала тэмай асобнай размовы

А вось пра скандальную і несумленную канкурэнцыю Прэзідэнта спыталі журналісты пасля наведвання папяровай фабрыкі. Карупцыя ў цукровай галіне стала тэмай асобнай размовы. Вакол затрымання дырэктараў заводаў у апошні час хадзіла шмат чутак і здагадак. Зусім хутка аб усім падрабязна распавядзе Камітэт дзяржбяспекі, адзначыў Прэзідэнт, а таксама падзяліўся некаторымі падрабязнасцямі.

На канец тыдня запланаваная сустрэча Аляксандра Лукашэнкі і Уладзіміра Пуціна

Таксама падчас размовы з журналістамі стала вядома, што на канец тыдня запланаваная сустрэча Аляксандра Лукашэнкі і Уладзіміра Пуціна. А па слядах перамоў з дзяржсакратаром ЗША беларускі лідар адзначыў, што перыяд холаду ў адносінах са Штатамі скончыўся. Не абмінулі і хвалюючую тэму распаўсюджвання каранавіруса. Усе падрабязнасці - у нашых наступных выпусках.