Першы ў суверэннай гісторыі візіт Прэзідэнта Кубы ў Беларусь адбыўся напярэдадні. Аляксандр Лукашэнка і Мігель Дыяс-Канель абмеркавалі ўвесь спектр двухбаковых адносін: ад сельскай гаспадаркі да высокіх тэхналогій. І галоўнае, нягледзячы на некаторыя цяжкасці ў гандлі і невысокі паказчык тавараабароту, Мінск і Гавана маюць рашучы намер рухацца наперад і пашыраць узаемадзеянне.
Вольга Макей працягне. На гэтым здымку, зробленым у 2000 годзе ў Гаване, Фідэль Кастра ўручае Аляксандру Лукашэнку адзін з найвышэйшых ордэнаў краіны, названы ў гонар нацыянальнага героя Кубы Хасэ Марці, - "За цвёрдую прынцыповасць і абарону інтарэсаў свайго народа". Такое ж цвёрдае сяброўства і прынцыповая рашучасць развіваць адносіны - ужо доўгія гады паміж Мінскам і Гаванай.
Гэта падкрэслівае і сам візіт Прэзідэнта Кубы (вышэйшую пасаду Мігель Дыяс-Канель афіцыйна заняў два тыдні таму), і адна з першых замежных паездак менавіта ў Беларусь. Падпісаныя ўчора дакументы - а яны з самых розных сфер - толькі пацвярджаюць: краіны не пачынаюць з нуля, а добра ведаючы магчымасці адна адной, развіваюць супрацоўніцтва.
Мігель Дыяс-Канель Бермудэс, Прэзідэнт Кубы: "Дарагі сябар! Для нас гэты візіт у Беларусь вельмі значны! Як Вы адзначылі, гэта магчымасць працягнуць наша абмеркаванне, пачатае тры гады таму. У мяне вельмі цёплыя ўспаміны ад таго візіту, у рамках шматлікіх сустрэч я змог упэўніцца, якое сяброўства паміж нашымі народамі. Беларусь - гэта адна з першых краін, якую я наведваю пасля абрання. І гэта шмат гаворыць пра той прыярытэт, які мы аддаем адносінам з вашай краінай".
Беларусь - Куба: ад сельскай гаспадаркі да IT
Прэзідэнты тут жа даручаюць урадам, па-першае, стварыць міжурадавую камісію, якая зоймецца рашэннем праблемных пытанняў; па-другое, ужо да канца лістапада павінен быць распрацаваны план сумесных дзеянняў. І пачынаць яго рэалізацыю трэба, не чакаючы візіту Аляксандра Лукашэнкі на Кубу (дату такой паездкі хутка даведаемся). Наогул Востраву свабоды цікавы наш вопыт у вытворчасці электратранспарту, у сельскай гаспадарцы, навуцы і тэхналогіях, фармацэўтычнай прамысловасці. Дарэчы, свае магчымасці беларускія спецыялісты ў лістападзе пакажуць на выставе-кірмашы ў Гаване.
Вынікі візіту Прэзідэнта Кубы ў Беларусь
І вяртаючыся да фатаграфіі 2000 года: на памяць Прэзідэнту Кубы ў падарунак ад беларускага лідара карціна з выявай маладога Хасэ Марці, ордэнам імя якога Фідэль Кастра ўзнагароджваў нашага Прэзідэнта. А гэты дужы поціск рукі на цырымоніі фатаграфавання не проста папоўніць галерэю Палаца Незалежнасці, але дэманструе цвёрдую палітычную волю развіваць эканамічнае супрацоўніцтва на трывалым гістарычным падмурку.
