Беларусь не адступіць ад рэалізацыі мірнай знешняй палітыкі. Гэтую заяву Прэзідэнт зрабіў сёння падчас сустрэчы з курсантамі, слухачамі і выкладчыкамі Ваеннай акадэміі.
Напярэдадні Дня абаронцаў Айчыны Аляксандр Лукашэнка наведаў гэтую ВНУ, дзе атрымліваюць адукацыю і павышаюць кваліфікацыю спецыялісты ваеннага профілю. Навучанне афіцэрскага складу тут праходзіць на высокім узроўні. Надаецца належная ўвага захаванню традыцый, вывучэнню сваёй ваеннай гісторыі, вопыту вядзення сучасных войнаў, лакальных канфліктаў, укараненню найноўшых тэхналогій. У зале эліта нацыянальнай арміі, якая фарміруе яе сучаснае аблічча. Па словах нашага Прэзідэнта, будучыя выпускнікі Ваеннай акадэміі павінны заўсёды быць гатовыя да любога павароту падзей, быць высокапрафесійнымі спецыялістамі і сапраўднымі патрыётамі. Падчас размовы з маладым пакаленнем вайскоўцаў Кіраўнік дзяржавы канстатаваў няпростую сітуацыю, што складваецца на кантыненце. Пашырэнне ваенных блокаў, распрацоўка і ўкараненне новых тэхналогій узброенага супрацьборства ўскладняюць сітуацыю ля нашых межаў.
Такія зносіны сталі магчымасцю абмеркаваць самыя розныя тэмы. Гаварылі курсанты пра тое, напрыклад, як пашырыць доступ да асабістых гаджэтаў і Інтэрнэту. З-за ваеннай спецыфікі ВНУ гэта не заўсёды дарэчы. Прэзідэнт даручыў паглядзець, наколькі гэта магчыма. У цэлым многія пытанні маладых вайскоўцаў так ці інакш датычыліся бяспекі і ваеннай палітыкі - ад нюансаў набору ў армію, сітуацыі ў рэгіёне да дыялогу з суседзямі і партнёрамі. Асновай устойлівасці Аляксандр Лукашэнка назваў эканоміку - ёй трэба займацца, больш актыўна ўкараняць сучасныя тэхналогіі, каб не адстаць ад сусветных дзяржаў, багатых прыроднымі рэсурсамі. І галоўнае - захаваць мір і стабільнасць.
Аляксандра Лукашэнку праінфармавалі, як сёння наладжана сістэма падрыхтоўкі ў Ваеннай акадэміі. Кіраўнік дзяржавы прысутнічаў на занятках курсантаў інфармацыйнай роты. Яна была створана нядаўна і прызначана для распрацоўкі сістэмнага і прыкладнога праграмнага забеспячэння сумесна з падраздзяленнямі Ваеннай акадэміі і іншымі навуковымі ўстановамі і ВНУ. Гэтае падраздзяленне дазволіць захаваць кадравы патэнцыял пры прызыве на ваенную службу IT-спецыялістаў. Прэзідэнту падрабязна расказалі аб задачах, падборы кадраў і праектах, якія выконваюцца. Ад IT-роты Ваеннай акадэміі Аляксандр Лукашэнка чакае практычных вынікаў, у тым ліку папулярызацыі распрацовак на сусветным рынку.
Прэзідэнт наведаў Залу ваеннай гісторыі Беларусі, што з'явілася ў ВНУ амаль два гады таму. Яе стварэнне было прымеркавана да 100-годдзя Узброеных сіл краіны, каб абуджаць цікавасць да нацыянальнай гісторыі беларускага народа, у тым ліку ваенна-гістарычнай спадчыны.
