Навука павінна ўносіць свой уклад у дасягненне дзяржаўных стратэгічных мэт. Пра гэта Прэзідэнт заявіў сёння на цырымоніі ўручэння дыпломаў доктара навук і атэстатаў прафесара навуковым і навукова-педагагічным работнікам.
Гэта стала добрай традыцыяй - перад Днём беларускай навукі адзначаць заслугі людзей, дзякуючы інтэлекту якіх наша краіна вядомая на сусветнай арэне сваімі дасягненнямі ў галіне медыцыны, АПК, касмічных даследаванняў і не толькі. Сярод узнагароджаных 19 чалавек. Гэта па праве краса беларускай навукі, людзі, якія аддалі гэтай дзейнасці не адно дзесяцігоддзе. Канструктыўныя прапановы і прарыўныя ідэі навукоўцаў дзяржава заўсёды гатова падтрымаць. Галоўнае, каб перспектыўныя распрацоўкі знаходзілі практычнае ўжыванне - укараняліся ў рэальным сектары і сацыяльнай сферы. Перад беларускімі навукоўцамі Прэзідэнт ставіць шэраг задач у маштабах краіны. Гэта павышэнне канкурэнтаздольнасці айчыннай эканомікі, гарантаванне нацыянальнай бяспекі, адкрыццё новых спосабаў прафілактыкі невылечных хвароб і барацьбы з імі.
Па традыцыі сустрэча не абмяжоўваецца толькі цырымоніяй. Гэта вялікая адкрытая і даверная размова Прэзідэнта і навукоўцаў, дзе гучаць як ініцыятывы, так і абгрунтаваная крытыка. Гаварылі аб інтэграцыі навукі і практыкі, стварэнні навуковых школ і аб тым, як зарабіць уласным інтэлектам.
Летась Вышэйшая атэстацыйная камісія Беларусі прысудзіла навуковую ступень 539 суіскальнікам, з іх 50 - дактары навук. Вялікую цікавасць да падрыхтоўкі кадраў вышэйшай кваліфікацыі ў нашай краіне выказваюць замежныя грамадзяне. Уладальнікамі навуковых ступеняў сталі 47 чалавек з 14 краін. Большасць дысертацый па-ранейшаму прысвечаная медыцынскай тэматыцы, машынабудаванню, папулярныя педагогіка і IT-сфера.
