У развіцці супрацоўніцтва з Грузіяй адзін з галоўных акцэнтаў трэба зрабіць на падрыхтоўцы кадраў.
Аб гэтым Прэзідэнт Аляксандр Лукашэнка заявіў на сустрэчы з Прэм'ер-міністрам Грузіі Георгіем Квірыкашвілі. Перамовы сталі працягам маштабнага пакета дамоў і ініцыятыў, якія абмяркоўвалі лідары дзвюх краін. У прыватнасці, задача - выйсці на падваенне тавараабароту да 200 мільёнаў долараў і напоўніць пакет кантрактаў праектамі ў машынабудаванні, сельскай гаспадарцы і фармацэўтыцы. Аляксандр Лукашэнка падкрэсліў: беларускія ініцыятывы сустракаюць аператыўную і ўсебаковую падтрымку ад Грузіі.
Гутарцы аб эканоміцы з прэм'ерам Грузіі папярэднічалі некалькі адмысловых падзей. Аляксандр Лукашэнка ўшанаваў памяць загінуўшых за адзінства Грузіі герояў, а таксама сустрэўся з вышэйшым духавенствам Грузіі - Каталікосам-Патрыярхам Іліёй Другім. Кіраўнік Беларусі падкрэсліў вялізную ролю царквы ў станаўленні суверэннай грузінскай дзяржавы, распавёў аб перспектывах дзвюх краін і падзякаваў за магчымасць рэгулярнага абмену думкамі. Патрыярх высока ацаніў уклад нашага Прэзідэнта ў развіццё беларуска-грузінскіх адносін і выказаў надзею, што пазіцыя афіцыйнага Мінска і Аляксандра Лукашэнкі асабіста дапаможа згладзіць супярэчнасці паміж Грузіяй і Расіяй.
Афіцыйны візіт беларускага лідара ў Грузію выклікаў вялікую цікавасць з боку журналістаў. Аляксандр Лукашэнка адказаў на пытанні прадстаўнікоў грузінскага тэлебачання. Беларускі лідар адзначыў, што разлічвае на пазітыўнае развіццё беларуска-расійскіх адносін падчас новага прэзідэнцкага тэрміну Уладзіміра Пуціна. Таксама Прэзідэнт верыць, што пры актывізацыі дыялогу і пры наяўнасці палітычнай волі з двух бакоў могуць быць прыкметна палепшаныя адносіны афіцыйных Масквы і Тбілісі. Акрамя таго, Аляксандр Лукашэнка бачыць галоўную місію Беларусі як надзейнага партнёра ў цэнтры Еўропы для ўсіх краін, уключаючы Расію, Еўрасаюз, Кітай і Грузію.
