Асноўныя ўрачыстасці прайшлі сёння ля стэлы "Мінск - горад-герой". Ваенны парад паказаў, што беларуская армія мабільная, добра навучаная і ўзброеная. Гэта падкрэсліў і Прэзідэнт падчас выступлення на парадзе. Калона тэхнікі цывільнага прызначэння паказала сілу і моц айчыннага машынабудавання. У небе вышэйшы пілатаж прадэманстраваў беларускі паветраны эшалон. Рота ганаровай варты здзівіла гледачоў новымі высокатэхнічнымі фігурамі. А моладзь - відовішчным паказам.
Алеся Высоцкая расказвае.
Тысячы гледачоў, як рэкі да аднаго сэрца, сцякаліся з самай раніцы да стэлы "Мінск - горад-герой". Святочныя мерапрыемствы ў Дзень Незалежнасці традыцыйна пачынаюцца на праспекце Пераможцаў.
Сёння менавіта сюды, да скрыжавання шырокіх сталічных праспектаў і мемарыяла ля сцен Музея гісторыі Вялікай Айчыннай вайны, накіраваныя пачуцці і погляды беларусаў. Выезд на плошчу картэжа Прэзідэнта Аляксандра Лукашэнкі дае старт урачыстым мерапрыемствам.
На праспект Машэрава выязджаюць дзве адкрытыя парадныя машыны. У адной - Міністр абароны генерал-лейтэнант Андрэй Раўкоў, які прымае парад, у другой - камандуючы парадам намеснік Міністра абароны генерал-маёр Сяргей Патапенка.
Беларусь адбылася як незалежная дзяржава, якая праводзіць міралюбную палітыку, падкрэслівае Прэзідэнт Аляксандр Лукашэнка ва ўрачыстай прамове. Нязменны прынцып беларускай дзяржавы - роўнасць усіх дзяржаў і іх неўмяшанне ва ўнутраныя справы адна адной.
Кіраўнік дзяржавы адзначыў высокую боегатоўнасць беларускай арміі. Яна пастаянна мадэрнізуецца, мабільная, добра навучаная і ўзброеная. Важкі ўклад у павышэнне боегатоўнасці арміі ўносіць айчынны абаронна-прамысловы комплекс. І сёння можна назваць больш за сто ўзораў беларускіх вырабаў ваеннага прызначэння, якія ўяўляюць сабой прынцыпова новую інавацыйную прадукцыю.
Беларусь ганарыцца сваёй арміяй і робіць усё неабходнае для павышэння яе баяздольнасці. Узброеныя Сілы абсталёўваюцца сучаснай ваеннай і спецтэхнікай, у сістэмы кіравання войскамі ўкараняюцца найноўшыя тэхналогіі. Гэта ярка пацвярджаюць удзельнікі парада.
Пешы парад традыцыйна адкрываюць самыя юныя ўдзельнікі - барабаншчыкі Мінскага сувораўскага ваеннага вучылішча. Перад трыбунамі сцяг Перамогі, дзяржаўны флаг Рэспублікі Беларусь і флаг Савецкага Саюза. За імі - штандары 1-га, 2-га, 3-га Беларускіх і 1-га Прыбалтыйскага франтоў, якія прымалі ўдзел у беларускай стратэгічнай наступальнай аперацыі "Баграціён".
Аддаючы даніну павагі пакаленню Вялікай Перамогі, праходзіць парадны разлік у форме воінаў Краснай арміі часоў Вялікай Айчыннай. Усяго ў парадзе задзейнічаны тры з паловай тысячы вайскоўцаў. У складзе пешай калоны 20 парадных разлікаў.
Самае відовішчнае - дэманстрацыя ваеннай тэхнікі. Перад гледачамі 222 адзінкі тэхнікі. Бронетранспарцёры, высокаманеўраныя недарожнікі, сучасныя танкі. Упершыню перад шырокай публікай распрацоўка 140-га рамонтнага завода.
Беларусі ёсць што паказаць. Састаў парадных разлікаў сёлета павялічаны ўдвая. Упершыню на парадзе беларускія беспілотнікі. Адзіны ў свеце ў сваім класе "Індэла Скай Бур" з оптыка-электроннай сістэмай прыцэльвання і далёкасцю стральбы да дзвюх тысяч метраў. А ўнікальны беспілотнік BELAR можа суткі лятаць з хуткасцю да 300 кіламетраў за гадзіну.
Грозная зброя - "Бялград", "Смерч", "Кропка", "Аса". Сярод беларускіх распрацовак, да якіх асаблівая цікавасць у гледачоў, таксама "Волат" вытворчасці МЗКЦ. На базе ўніфікаванага шасі лёгка стане рознае ўзбраенне. У аўтамабілі самая сучасная інфармацыйна-кіруючая сістэма. Па-за канкурэнцыяй па авацыях і рэактыўная сістэма залпавага агню "Паланэз". Яна здольная адначасова нанесці кропкавы ўдар адразу па васьмі цэлях на адлегласці да 200 кіламетраў.
Вышэйшы пілатаж прадэманстраваў у небе беларускі паветраны эшалон: верталёты, штурмавікі, вінтакрылыя ратавальнікі, ударныя верталёты, самалёты рознага класа, знішчальнікі. У тэлегледачоў ёсць перавага. Камеры здымалі пілотаў унутры самалётаў.
Майстэрству пілотаў не саступаюць і вайскоўцы роты ганаровай варты. Пляц-канцэрт здзівіў гледачоў новымі высокатэхнічнымі фігурамі і зладжанымі рухамі 117-ці чалавек. У руках самазарадны карабін Сіманава вагой амаль чатыры кілаграмы.
Калона тэхнікі цывільнага прызначэння прадэманстравала сілу і моц беларускага машынабудавання. Больш як сто аўтамабіляў, сярод якіх ільвіная доля - гэта навінкі, упершыню паказаныя шырокай публіцы. Сярод іх красоверы "БЕЛДЖЫ" - гэта новае слова ў айчынным аўтамабілебудаванні. Найноўшая флагманская распрацоўка МТЗ - самы магутны трактар Беларусі. Гомсельмаш, "Амкадор", МАЗ, БелАЗ - усе прадэманстравалі лепшыя ўзоры тэхнікі.
Шэсце завяршыў незвычайны балет, дзе ў класічным танцы закружыліся трактары "Беларус".
Масавая вакальна-харэаграфічная кампазіцыя "Красуй, Беларусь!" дадала фарбаў святу.
