Беларусь зацікаўленая ў стварэнні ўсёабдымнай сістэмы бяспекі Еўразійскага рэгіёна, заявіў Прэзідэнт Беларусі Аляксандр Лукашэнка, звяртаючыся з Пасланнем да беларускага народа і Нацыянальнага сходу.
У глабальным маштабе гэтай мэце служыць АДКБ. Павышэнне боегатоўнасці дазваляе супрацьстаяць такім выклікам, як тэрарызм, наркатрафік, пазапраўная міграцыя і арганізаваная злачыннасць. Беларусь з улікам абвастрэння сітуацыі ў далёкім і блізкім замежжы вымушана нарошчваць свой абаронны патэнцыял, каб не апынуцца безабароннай, заявіў Прэзідэнт. Бо сёння няма больш высокай каштоўнасці, чым мір і бяспека.
Галоўнай задачай унутры краін застаецца паніжэнне сабекошту прадукцыі, павышэнне яе канкурэнтаздольнасці, забеспячэнне нізкай інфляцыі і паніжэнне ставак па крэдытах пасля дэнамінацыі. Сёння трэба звярнуць увагу на падрыхтоўку спецыялістаў, адзначыў Прэзідэнт. Нельга ствараць разрыў паміж навукова-тэхнічным узроўнем новай вытворчасці і кваліфікацыяй кадраў. Таму перападрыхтоўку лепш весці не ў інстытутах павышэння кваліфікацыі, а на вытворчасці. Каб людзі бачылі новыя тэхналогіі, методыкі і ўзоры прадукцыі. Што тычыцца маладых спецыялістаў, Кіраўнік дзяржавы даручыў ураду выпрацаваць новыя крытэрыі аплаты іх працы.
Прэзідэнт лічыць, што Беларусі не варта бяздумна капіраваць заходнюю сістэму адукацыі. Наша вышэйшая школа мае багаты вопыт арганізацыі навучальнага працэсу, і яго нельга страчваць. Школа павінна навучыць моладзь жыць у цяперашнім насычаным і вельмі інфармацыйным асяроддзі. І выхоўваць маральную асобу, прывіваць пачуццё грамадзянскай адказнасці.
