Беларусь адкрыта для новых ідэй і праектаў. З такімі словамі Прэзідэнт Аляксандр Лукашэнка звярнуўся да паслоў з дванаццаці краін падчас цырымоніі ўручэння даверчых грамат. Па сутнасці гэта акрэдытацыя дыпламатаў, якія толькі пачынаюць сваю місію.
Сярод іх прадстаўнікі постсавецкіх рэспублік - Грузіі, Таджыкістана і Казахстана. З імі настроены на паглыбленне кааперацыі. Свае паўнамоцтвы пацвердзілі і дэлегаты ад партнёраў па далёкай дузе беларускага экспарту - Камбоджа, Малайзія, Егіпет, Нігерыя, Куба і Калумбія. Кантакт з гэтымі краінамі наладжаны ўжо даўно, але заўсёды ёсць пункты дадатковага росту. Ад еўрапейскага рэгіёна даверчыя граматы ўручылі паслы Мальты, Харватыі і Ісландыі. У гэтым напрамку спектр супрацоўніцтва таксама становіцца ўсё шырэйшы: ад кантактаў на ўзроўні турызму і бізнесу да якаснага развіцця тавараабароту.
У розных частках свету ведаюць аб Беларусі як аб міралюбнай еўрапейскай дзяржаве, што выступае донарам бяспекі і пляцоўкай па ўрэгуляванні шэрагу канфліктаў у рэгіёне. А гэта немалаважна для пашырэння супрацоўніцтва.
Пра ўсё больш падрабязна раскажа наш палітычны аглядальнік Наталля Брэвус.
Пра традыцыі нацыянальнага чаявання дыпламатычна пачынаем гутарку з паслом Ертысбаевым. Сапраўдны казахскі чай - гэта калі спачатку наліваюць гарачае малако, змяшанае са смятанай або нават з маслам, а ўжо потым даліваюць чорны моцна завараны. Напрыканцы разводзяць кіпенем. Раней напой падавалі ў піялах, зараз усё часцей у звычайных кубках. Час мяняецца. У Казахстане хоць і паважаюць традыцыі, але накіраваныя на мадэрнізацыю эканомікі і грамадства.
Так спакойна разважае пасол наконт традыцый і новаўвядзенняў. Дыпламатычная вытрымка прыйшлася яму вельмі дарэчы, бо ўключыўся ў працу ў нашай краіне без разварушвання. І першай яго справай стала арганізацыя візіту на вышэйшым узроўні. Назарбаеў прыязджаў у Мінск у канцы лістапада. Менавіта тады прэзідэнтамі быў падпісаны маштабны дагавор аб супрацоўніцтве Мінска і Астаны да 2026 года.
Выкарыстоўваць на поўную моц збіраюцца перавагі Еўразійскага саюза. Стаўку гатовыя рабіць на лагістычныя магчымасці і патэнцыял ужо не проста транспартных, а лічбавых калідораў. Пра такую лічбавую трансфармацыю эканомікі амаль ва ўнісон гаварылі прэзідэнты на той лістападаўскай сустрэчы.
Усе даручэнні прэзідэнтаў трымаюць у галаве. Дарэчы, казахстанскае пасольства насупраць - праз праспект ад Палаца Незалежнасці. Тут вымалёўваецца цэлы дыпламатычны квартал.
Пасол Казахстана - адзін з 12 дыпламатаў, якія сёння прысутнічалі на цырымоніі ў Палацы Незалежнасці. Кожны прыбыў у Мінск, каб уручыць беларускаму Прэзідэнту даверчую грамату. Гэта, па сутнасці, пасведчанне, якое пацвярджае паўнамоцтвы. Толькі пачынаючы працу, замежныя паслы не атрымліваюць дакумент, а наадварот, здаюць яго. Вось такая традыцыя.
Ратацыя паслоў - звычайная справа. І перыядычна ў замежным дыпкорпусе з'яўляюцца новыя асобы. З прыездам пасла заўсёды звязаны асаблівыя чаканні. Ну як мінімум таго, што новы чалавек падштурхне развіццё двухбаковых адносін краін. Знаходзячыся ў цэнтры Еўропы, Беларусь разлічвае развіваць дыялог з усімі дзяржавамі, у якой бы частцы свету яны не знаходзіліся. На гэты раз - сапраўдны парад кантынентаў - дыпламаты з Еўропы, Азіі, Афрыкі, Лацінскай Амерыкі і краін Карыбскага басейна.
Нягледзячы на тое, што шматлікія дыпламаты ўжо некалькі тыдняў, і нават месяцаў як у краіне, афіцыйна і юрыдычна з гэтага аўторка пачынаецца адлік іх місіі. Некаторыя адначасова кіруюць пасольствамі ў іншых краінах. Як, напрыклад, Тончы Станічыч з Харватыі працуе і ў Расіі. Новы пасланец афіцыйнага Заграба шкадуе толькі пра страчаны час - трэба наганяць.
Пры ўручэнні даверчых грамат строга выконваюць цырыманіял. Некалькі крокаў, перадача ліста ад свайго прэзідэнта беларускаму лідару, поціск рукі і традыцыйнае фота. Усё гэта важна, але, звяртаючыся да дыпламатаў, Аляксандр Лукашэнка гаворыць, па сутнасці, аб універсальным правіле, якога афіцыйны Мінск прытрымваецца ў дыялогу з замежнымі партнёрамі. Галоўнае - Беларусь заўсёды адкрытая для новых ідэй, ініцыятыў і праектаў.
Менавіта бізнес-інтарэс звязвае Мінск і Рэйк'явік. Калі ў нашай рэспублікі рэнамэ донара стабільнасці ў рэгіёне, то вось Ісландыя - "краіна лёду" - славіцца сваёй рыбнай здабычай. Пастаўкі марскіх далікатэсаў наладжаныя і да нас. Пасол Ісландыі акрэдытаваная ў Беларусі пасля больш чым дзесяцігадовага перапынку. Вось ужо сапраўды - «между нами тает лед!».
На старце 2018 да працы ў нашай краіне прыступаюць пасланцы дзяржаў так званай далёкай дугі беларускага экспарту - Кубы, Калумбіі, Камбоджы, Егіпта, Нігерыі, Малайзіі. Прэзідэнт зазначыў, што Беларусь можа прапанаваць партнёрам самыя розныя мадэлі інтэграцыі. Для гэтага ёсць добры эканамічны падмурак. Таксама важную ролю ў развіцці міждзяржаўных адносін адыгрываюць ужо прынятыя рашэнні па развіцці дзелавой ініцыятывы і інвестклімату ў цэлым.
Каларытным касцюмам вылучаўся пасол 30-мільённай Малайзіі. Гаворыць дыпламат, што пры жаданні супрацоўнічаць адлегласць - не перашкода.
Прэзідэнт на гэтай сустрэчы анансіраваў шэраг замежных візітаў. У 2018 Аляксандр Лукашэнка мае намер наведаць Кубу. Гэтая краіна - саюзнік і беларускі плацдарм у Лацінскай Амерыцы.
Пільная ўвага лідараў заўсёды падганяе ўрады, міністраў, ды і дзелавыя колы. Так было з Грузіяй - у 2015 візіт Аляксандра Лукашэнкі ў гэтую краіну надаў імпульс дыялогу. Калі ў лічбах, то амаль удвая вырас тавараабарот. У тонусе трымае і запланаванае Прэзідэнтам наведванне гэтай краіны ўжо сёлета. Беларусь і Грузія маюць намер значна прасунуцца ў прамысловай кааперацыі. У Тбілісі ствараецца зборачная вытворчасць ліфтаў.
Пасля цырымоніі Кіраўнік беларускай дзяржавы пагутарыў з кожным паслом. Аляксандр Лукашэнка прывітаў гасцей сімвалічным бакалам шампанскага. Прызначэнне ў Беларусь можа стаць прыкметнай прыступкай у іх дыпламатычнай кар'еры. А намаганні пасланцоў замежных дзяржаў пойдуць на карысць двухбаковаму супрацоўніцтву з Беларуссю. З месца ў кар'ер - дыпламат з Нігерыі. Адразу загаварыў пра неабходнасць стварэння сумеснай вытворчасці.
Невялікая аўдыенцыя для кожнага дыпламата. З размовы з прадстаўніком Таджыкістана стала зразумела, дамоўленасці з калегам Рахмонам, які прыязджаў у канцы мінулага года, - у сіле. Зборка сельгастэхнікі ў Гісары - гэта агульны вынік, але тады прэзідэнты дамовіліся аб правядзенні маштабнай выставы, так сказаць "прэзентацыі магчымасцяў" у гэтай краіне.
Нягледзячы на ўласцівую гэтым людзям дыпламатычную вытрымку, было прыкметна, што настрой на працу баявы. Нават у нефармальнай размове імкнуліся пазначыць інтарэсы краіны. Старт дыпламатычнай місіі адзначылі і міні-флагі краін на капотах аўтамабіляў. Адразу прыкметна, хто якую дзяржаву прадстаўляе. Жадаецца верыць, што знакавай будзе і місія дыпламатаў у Беларусі.
