Прэзідэнт Венесуэлы 5 кастрычніка наведае Беларусь з афіцыйным візітам. У гэты дзень у Палацы Незалежнасці пройдуць перамовы Аляксандра Лукашэнкі і Нікаласа Мадуры, паведамілі ў прэс-службе Прэзідэнта Беларусі.
Кіраўнікі дзяржаў сустрэнуцца ў фармаце адзін на адзін, затым - у пашыраным складзе - з удзелам дэлегацый. Бакі разгледзяць пытанні гандлёва-эканамічнага супрацоўніцтва, у тым ліку рэалізацыю двухбаковых праектаў, функцыянаванне сумесных зборачных вытворчасцяў, развіццё ўзаемадзеяння ў сельскагаспадарчай, будаўнічай, нафтагазавай і іншых сферах.
Алег Пафераў, Надзвычайны і Паўнамоцны Пасол Беларусі ў Венесуэле: "У прамысловасці, пэўна, самы дасягальны вынік - мы пабудавалі там тры заводы, найбуйнейшыя заводы па зборцы аўтамабіляў МАЗ з магутнасцю 5000 аўтамабіляў за год. Завод па вытворчасці і зборцы трактароў: мы там тры віды трактароў збіраем, яго магутнасць - 10 000 трактароў за год. Завод па зборцы дарожнай тэхнікі, які дазваляе збіраць як дарожную тэхніку: пагрузчыкі, грэйдары, каткі і таксама дызельныя ўстаноўкі для малых прадпрыемстваў".
Беларусь і Венесуэла ажыццяўляюць каля 85 сумесных праектаў. Нашы спецыялісты ўзводзяць у Баліварыянскай Рэспубліцы шматкватэрныя дамы, дзеляцца вопытам у сельскай гаспадарцы. Ёсць агульныя праекты ў нафтагазавай сферы. Вядома, што асобная ўвага будзе нададзена і міжнароднаму парадку дня. Акрамя таго, плануецца, што ў чацвер Нікалас Мадура прыме ўдзел у цырымоніі адкрыцця ў Мінску помніка нацыянальнаму герою Венесуэлы Сімону Балівару.
