Другі дзень "Мінскага дыялогу" пройдзе ў пошуках парадку дня міру і супрацоўніцтва для Еўропы

8 Кастрычніка 2019

Сёння - другі дзень форуму "Мінскага дыялогу" на тэму "Еўрапейская бяспека: адысці ад краю прорвы".

У шырокай дыскусіі аб міжнародных адносінах і шляхах гарантавання бяспекі на еўрапейскім кантыненце прымаюць удзел больш чым паўтысячы палітыкаў і экспертаў з краін ЕС, Расіі, ЗША, Кітая, а таксама прадстаўнікі АБСЕ, АДКБ, НАТА. Галоўнае, што адзначаюць замежныя ўдзельнікі,  - унікальны фармат форуму, яго адкрытасць і свабода абмену меркаваннямі. 

Радэрых Кізеветэр, спецпрадстаўнік па знешняй палітыцы фракцыі ХДС/ХСС (Германія): "Я сапраўды перакананы ў тым, што форум "Мінскага дыялогу" прадстаўляе  Мінск у якасці выдатнага партнёра і, на мой погляд, адлюстроўвае еўрапейскія каштоўнасці. Гэта паказвае Беларусь як краіну, адкрытую новаму. Гэта выдатная пляцоўка, дзе могуць сустрэцца сябры і цікавыя людзі з усіх краін Еўразіі. Важна, каб мы былі на сувязі і адкрыта  абменьваліся поглядамі. Гэта выключыць раз'яднанасць краін. Тут мы ствараем культуру дэбатаў".

Жаклін Перкінс, Надзвычайны і Паўнамоцны Пасол Вялікабрытаніі ў Беларусі: "Сёння "Мінскі дыялог" - гэта новы фармат канферэнцыі. Невялікая краіна паміж двума вялікімі блокамі кантынента адыгрывае вялікую ролю ва ўсталяванні бяспекі і стабільнасці. Я згодна і я веру, што гэта добрая ідэя, сабраць усе краіны з процілеглымі поглядамі ў адным месцы і абмеркаваць усе  пытанні, якія цікавяць".

Частка сесій форуму "Мінскі дыялог" прысвечана праблеме гонкі ўзбраенняў і стратэгічнай стабільнасці. Важны складальнік - эканамічная бяспека. Беларусь заклікае ЕС пачаць прамы дыялог з Еўразійскім эканамічным саюзам па ключавых кірунках узаемнага інтарэсу. Важнае пытанне парадку дня - інфармацыйная бяспека.