Беларусь - Венгрыя: пункты судакранання
Адносінам Мінска і Будапешта - амаль тры дзясяткі гадоў. У краін нямала пунктаў судакранання. Але дасягнуты ўзровень кантактаў нядосыць высокі, пагадзіліся лідары. І ў палітыцы, і ў эканоміцы партнёры нацэленыя ўмацоўваць двухбаковыя сувязі. Лідары ўзаемна заявілі пра несумнеўныя перспектывы супрацоўніцтва і магчымасці падтрымаць той уздым у адносінах, які азначыўся ў апошнія гады. Аляксандр Лукашэнка асабліва адзначыў важнасць вяртання да фармату асабістых зносін паміж еўрапейскімі краінамі.
Беларусь - ЕС: умацаванне супрацоўніцтва
Венгрыя - блізкі для нас партнёр у ЕС, а Беларусь зацікаўленая ва ўмацаванні адносін еўрапейскай і еўразійскай інтэграцый. Адносіны афіцыйнага Мінска з аб'яднанай Еўропай на ўздыме, і ў гэтым таксама асабістая заслуга Віктара Орбана, зазначыў Прэзідэнт. Краіны збліжае падабенства палітычных поглядаў першых асоб. Асабістая сустрэча - гэта магчымасць зверыць пазіцыі ў шматлікіх аспектах рэгіянальнага і сусветнага парадку дня, актывізаваць эканамічныя сувязі.
Заўважым, што Венгрыя будуе атамную станцыю накшталт беларускай. Яе ядзерным сэрцам стануць расійскія рэактары, аналагічныя тым, што ўсталяваныя ў Астраўцы. І Беларусь гатовая дзяліцца сваім вопытам у гэтай сферы. Таксама краіны гатовыя развіваць прамысловае партнёрства. Яркі таму прыклад - пастаўкі ў Венгрыю цягнікоў “Штадлер". Сёлета падпісана новае пагадненне: у Будапешт адправяцца 40 саставаў. Партнёры разлічваюць на стабільны прырост узаемнага гандлю - да пяцісот мільёнаў еўра. Гэта амаль у два разы больш. Прэзідэнт нацэліў дасягнуць такога ўзроўню ў наступныя некалькі гадоў.
